Read Kurmanji Încîl Padîşah I, 11 Bible Online

Padîşah I, 11 - Kurmanji Încîl bible

Padîşah I, 11

¹Silêmanê Padîşah tevî keça Firewn, ji gelek keçên xerîb hez kir ku di nav wan de Moavî, Ammonî, Edomî, Saydayî û Hîtîtî jî hebûn.

²Ew ji wan miletan bûn ku Xudan ji Îsraîliyan re gotibû: «Hûnê nekevin nav wan û ewê jî nekevin nav we. Çimkî wê teqez dilên we bizivirînin îlahên xwe.» Silêman bi hezkirin bi wan ve girêdayî bû.

³Heft sed jinên Silêman hebûn ku keçên padîşahan bûn, sê sed jî cariyên wî hebûn û jinên wî dilê wî ji rê derxist.

⁴Diyar bû ku jinên Silêman di kalîtiya wî de dilê wî ber bi îlahan ve ji rê derxistin û çawa ku bavê wî Dawid dilê xwe bi tevahî spartibû, wî bi tevahî dilê xwe nespart Xwedayê xwe Xudan.

⁵Silêman perizî Eştoreta îlaha Saydayiyan û da pey Molekê îlahê kirêt ê Ammoniyan[53].

⁶Silêman tiştên di çavê Xudan de xerab in, kirin. Wî wekî Dawidê bavê xwe nekir û bi tevahî li pey Xudan neçû.

⁷Wê gavê Silêman li çiyayê rojhilatê Orşelîmê, bilindciyên perizînê çêkirin ku biperize Kemoşê îlahê kirêt ê Moavê û Molekê îlahê kirêt ê Ammoniyan.

⁸Wî ji bo hemû jinên xwe yên xerîbî ku ji bo îlahên xwe bixûr dişewitandin û qurban serjê dikirin wisa kir.

⁹Xudan li Silêman hêrs bû. Çimkî dilê wî ji riya Xwedayê Îsraîl Xudan derket ku du caran li wî xuya bûbû û

¹⁰emir kiribû û gotibû: «Li pey îlahan neçe!» Lê Silêman emrên Xudan bi cih neanî.

¹¹Xudan ji Silêman re got: «Madem te ev tişt bi qestî kir û te peymana min û qanûnên min ên ku min spartibûn te, bi cih neanîn, ezê esse padîşahiyê ji destê te derxim û bidim xulamê te.

¹²Lê ji bo qedrê bavê te Dawid ezê vê yekê di rojên te de nekim. Ezê wê ji destê kurê te derxim.

¹³Lê ezê bi tevahî ji destê wî dernexim. Ji bo qedrê xulamê xwe Dawid û Orşelîma ku min hilbijartiye, ezê eşîrekê bidim wî.»

¹⁴Xudan Hadadê Edomî li dijî Silêman rakir. Ew li Edomê ji ziriyeta padîşah bû.

¹⁵Çimkî gava Dawid li Edomê bû, Yoavê serfermandar ku ji bo miriyan binax bike çûbû wir, hemû zilamên Edomî kuştibûn.

¹⁶Yoav û hemû Îsraîlî şeş mehan li wê derê man û di wî wextî de qira hemû mêrên Edomî anîn.

¹⁷Lê Hadad û hin Edomiyên ji xulamên bavê wî, pê re reviyan Misrê. Hadad hê zaro bû.

¹⁸Ew ji Mîdyanê rabûn û hatin Paranê û bi xwe re ji Paranê zilam hildan û hatin Misrê ba Firewnê Padîşah. Wî erd, xanî û xwarin da Hadad.

¹⁹Hadad ket çavê Firewn. Firewn dişa xwe ya xwişka Şahbanû Tahpenêsê da wî.

²⁰Ji xwişka Tahpenêsê kurê wî Genûvat çêbû. Tahpenêsê li mala Firewn ew mezin kir[54] û Genûvat li mala Firewn bi zarokên Firewn re mezin bû.

²¹Çaxê Hadad li Misrê bihîst ku Dawid miriye û gihîştiye bav û kalên xwe û bi ser de Yoavê fermandar jî miriye, wî ji Firewn re got: «Bihêle ez herim welatê xwe.»

²²Firewn jê re got: «Li ba min çi kêmahiya te heye ku tu dixwazî herî welatê xwe?» Wî got: «Tuneye, lê bihêle ez herim.»

²³Xwedê dijminekî din li dijî Silêman rakir. Ew jî Rezonê kurê Êlyada ku ji xweyê xwe Hadadezerê Padîşahê Sovayê reviyabû.

²⁴Dema Dawid li Sovayiyan xist, Rezon zilam li ba xwe berhev kirin û bû serekê rêbiran. Ew çûn Şamê û li wir rûniştin. Wan ew li Şamê kirin padîşah.

²⁵Ligel tevahiya xerabiyên Hadad, di hemû rojên Silêman de Rezon jî bû dijminê Îsraîlê. Wî ji Îsraîlê nefret kir û li ser Aramê padîşahî kir.

²⁶Yarovamê kurê Nevatê Efrayîmî yê Serêdayî xulamê Silêmanê li dijî padîşah serî hilda. Dayika wî jinebiyeke bi navê Serûa bû.

²⁷Sedema ku wî serî li dijî padîşah rakir ev bû ku Silêman Mîllo[55] çêkiribû û sûra Bajarê Dawidê bavê xwe temîr kiribû.

²⁸Herwiha Yarovam wêrek û jêhatî bû. Silêman dît ku zilamê ciwan bikêrhatî ye, wî ew danî ser hemû karên giran ên Mala Ûsiv.

²⁹Rojekê dema ku Yarovam ji Orşelîmê derket, Ahiyayê Pêxemberê ji Şîloyê rastî wî hat. Ahiya kincekî nû li xwe kiribû. Herdu jî li çolê bi tenê bûn.

³⁰Ahiya bi kincê xwe yê nû girt, ew çirand û kir duwanzdeh perçe.

³¹Ji Yarovam re got: «Ji xwe re deh perçeyan hilde; çimkî Xwedayê Îsraîl Xudan wiha dibêje: ‹Va ye ezê ji destê Silêman padîşahiya wî derxim û ezê deh eşîran bidim te.

³²Lê ji bo qedrê xulamê xwe Dawid û Orşelîma bajarê ku min ji hemû eşîrên Îsraîl hilbijartiye, wê eşîrek jê re be.

³³Çimkî wan dev ji min berda, perizîn Eştoreta îlaha Saydayiyan, Kemoşê îlahê Moaviyan û Molekê îlahê Ammoniyan. Wekî bavê wî Dawid tiştên di çavê min de rast in kirin, nekirin. Wan qanûn û rêbazên min pêk neanîn û di riya min de nemeşiyan.

³⁴Ezê hemû padîşahiyê ji destê wî dernexim. Lê ji bo qedrê xulamê xwe Dawidê ku min hilbijart û emir û qanûnên min bi cih dianî, ezê wî di hemû rojên jiyana wî de bikim serwer.

³⁵Ezê padîşahiyê ji destê kurê wî derxim û deh eşîran bidim destê te.

³⁶Ezê eşîrekê bidim kurê wî ku li ber min ji bo xulamê min Dawid çirayeke herheyî hebe. Li Orşelîma bajarê ku min ji bo xwe hilbijartiye, ji bo ku navê min tê de be.

³⁷Herçî tu yî, ezê te bikim Padîşahê Îsraîlê. Tê li gorî dilê xwe serweriyê bikî.

³⁸Heger tu jî wek xulamê min Dawid hemû tiştên ku ez emir dikim guhdarî bikî û di riya min de bimeşî, tiştên di çavên min de rast in bikî û emir û qanûnên min bi cih bînî, ezê bi te re bim û wekî min ji bo Dawid kir, ezê ji bo te jî xanedaneke saxlem ava bikim û Îsraîlê bidim te.

³⁹Ji ber vê ezê ziriyeta Dawid nizim bikim, lê ne herdem.›»

⁴⁰Silêman xwest ku Yarovam bikuje lê Yarovam reviya çû Misrê ba Şîşaqê Padîşahê Misrê. Heta mirina Silêman ew li Misrê ma.

⁴¹Qewimînên din ên di padîşahiya Silêman de, hemû kirin û şehrezabûna wî, di Nivîsa Qewimînên Silêman de hatine nivîsandin.

⁴²Silêman li Orşelîmê li seranserê Îsraîlê çil salan padîşahî kir.

⁴³Ew mir û gihîşt bav û kalên xwe. Li Bajarê Dawidê bavê xwe hat veşartin. Kurê wî Rehovam li cihê wî bû padîşah.