Read Kurmanji Încîl Padîşah I, 12 Bible Online

Padîşah I, 12 - Kurmanji Încîl bible

Padîşah I, 12

¹Rehovam çû Şexemê çimkî tevahiya Îsraîlê[56] çûbû Şexemê ku wî bikin padîşah.

²Gava Yarovamê kurê Nevat ev yek bihîst, biryar da ku li Misrê bimîne. Çimkî ew ji ber Silêmanê Padîşah reviyabû û xwe li wir girtibû.

³Civaka Îsraîlê şand pey Yarovam. Bi hev re hatin ba Rehovam û jê re gotin:

⁴«Bavê te nîrekî giran xistiye stûyê me. Niha tu vê xulamiya bavê xwe ya dijwar û nîrê giran ku xistiye stûyê me sivik bike û emê ji te re xulamiyê bikin.»

⁵Rehovam ji wan re got: «Niha herin û piştî sê rojan werin ba min.» Gel rabû çû.

⁶Rehovamê Padîşah ji rîspiyên ku di dema bavê wî Silêman de şêwirmendî dikirin re got: «Hûnê şîreteke çawa li min bikin ku ez bersiva vî gelî bidim?»

⁷Wan jê re got: «Heger îro tu ji vî gelî re bibî xulam û ji wan re xulamî bikî û bi peyvên xweş bersiva wan bidî, wê herdem ji te re bibin xulam.»

⁸Lê wî dev ji şîreta zilamên rîspî berda û bi peywirdarên ciwan re şêwirî ku pê re mezin bûbûn.

⁹Wî ji wan re got: «Gelo şîreta we çi ye? Ez bersiveke çawa bidim vî gelê ku ji min re dibêje: ‹Nîrê ku bavê te daniye ser me sivik bike›?»

¹⁰Ciwanên ku pê re mezin bûbûn jê re gotin: «Ji wî gelê ku ji te re dibêje: ‹Bavê te nîr li ser me giran kir, tu nîrê me sivik bike› re, wisa bêje: ‹Tiliya min a qilîçanê, ji navtenga bavê min stûrtir e!

¹¹Bavê min nîrê li ser we giran kir, ezê wî nîrî hê girantir bikim. Bavê min bi qemçiyan hûn terbiye kirin, lê ezê bi dûpişkan we terbiye bikim.›»

¹²Çawa ku padîşah gotibû: «Di roja sisêyan de dîsa werin ba min», Yarovam bi tevahiya gel re, di roja sisêyan de hat ba Rehovam.

¹³Padîşah bi dijwarî bersiv da gel û dev ji şîreta rîspiyan berda.

¹⁴Wî li gorî şîreta ciwanan ji wan re got: «Bavê min nîrê li ser we giran kir, lê ezê wî nîrî hê girantir bikim; bavê min bi qemçiyan hûn terbiye kirin, lê ezê we bi dûpişkan terbiye bikim.»

¹⁵Padîşah guh neda gel. Xudan ev yek pêk anî ku peyva xwe bi riya Ahiyayê Şîloyî ji Yarovamê kurê Nevat re bîne cih.

¹⁶Dema ku tevahiya Îsraîlê dît padîşah li wan guhdarî nake, gel bersiv da padîşah û got: «Çi para me ji Dawid heye, Çi mîrasa me ji kurê Yêşa? Ya Îsraîl, bila herkes vegere konê xwe! Ya Dawid, tu jî hay ji mala xwe hebe.» Paşê gel vegeriya konên xwe.

¹⁷Loma jî Rehovam bi tenê li ser Îsraîliyên li bajarên Cihûdayê diman re padîşahî kir.

¹⁸Gava Rehovamê Padîşah Adoramê sersuxrevanan şand, tevahiya Îsraîl ew da ber keviran û kuşt. Li ser vê yekê Rehovamê Padîşah yekser li erebeya xwe ya şer siwar bû û reviya Orşelîmê.

¹⁹Ji wê rojê vir ve Îsraîl li dijî Mala Dawid serhildêr e.

²⁰Gava tevahiya Îsraîlê bihîst Yarovam vegeriyaye, wan ji bo civînê şand pey wî û ew li ser tevahiya Îsraîlê kirin padîşah. Ji bilî eşîra Cihûda tu kes li pey Mala Dawid neçû.

²¹Gava Rehovam hat Orşelîmê, ji tevahiya Mala Cihûda û Eşîra Binyamîn sed û heştê hezar leşkerên bijare dan hev ku li dijî Mala Îsraîl şer bikin û padîşahiyê li Rehovamê kurê Silêman vegerînin.

²²Lê peyva Xwedê ji zilamê Xwedê Şemaya re hat û got:

²³«Ji Rehovamê kurê Silêmanê Padîşahê Cihûdayê û ji tevahiya Mala Cihûda û Binyamîn û ji yên mayîn ên din re bêje:

²⁴‹Xudan wiha dibêje: Hûnê ranebin û li dijî birayên xwe Îsraîliyan şer nekin. Vegerin, bila herkes here mala xwe! Çimkî ev karê min bû.›» Wan guh da gotina Xudan. Ew li gorî gotina Xudan vegeriyan.

²⁵Yarovam li herêma çiyayî ya Efrayîmê, bajarê Şexemê çêkir û li wir ma. Paşê ji wir çû û bajarê Penûêlê çêkir.

²⁶Yarovam di dilê xwe de got: «Wê padîşahî dîsa vegere Mala Dawid.

²⁷Heger ev gel ji bo serjêkirina qurbanan wekî berê dîsa here Mala Xudan a li Orşelîmê, dilê vî gelî wê vegere xweyên wan Rehovamê Padîşahê Cihûdayê. Wê min bikujin û vegerin ber bi Rehovamê Padîşahê Cihûdayê.»

²⁸Padîşah şêwirî û du golikên zêrîn çêkirin û ji gel re got: «Çûyîna Orşelîmê ji bo we zêde ye. Ya gelê Îsraîl, va ye ev in îlahên we yên ku hûn ji welatê Misrê derxistin!»

²⁹Yekî li Bêt-Êlê bi cih kir; yê din jî anî Danê.

³⁰Ev yek bû sedema gunehan. Ji bo perizîna li ber yekî ji wan, gel heta Danê diçû.

³¹Herwiha Yarovam li bilindciyan perestgeh çêkirin û ji nav tevahiya gel kesên ne Lêwiyî bûn, kahin kifş kirin.

³²Yarovam di roja panzdehê meha heştan de, wek cejna li Cihûdayê cejnek çêkir. Wî li gorîgeha çêkiriye qurban pêşkêş kirin. Ji golikên zêrîn ku li Bêt-Êlê çêkiriye re qurban pêşkêş kirin û ji bo bilindciyên ku li Bêt-Êlê ava kiriye, kahin danîn ser kar.

³³Di roja panzdehê meha heştan a ku wî bi xwe kifş kir de, ew çû gorîgeha li Bêt-Êlê çêkiribû. Wî ew roj kir cejneke ji bo gelê Îsraîlê. Çû gorîgehê û bixûr şewitand.