Read Kurmanji Încîl Padîşah I, 14 Bible Online

Padîşah I, 14 - Kurmanji Încîl bible

Padîşah I, 14

¹Wan çaxan Aviyayê kurê Yarovam nexweş ket.

²Yarovam ji jina xwe re got: «Rabe, kincên xwe biguherîne ku te nas nekin û nizanibin tu jina min î û here Şîloyê. Ahiyayê Pêxember li wir e ku ji min re got: ‹Tê bibî padîşahê vî gelî.›

³Bi destê xwe jê re deh nan, çend kulîçe û cerek hingiv bibe. Wê ji te re bibêje wê çi were serê kurik.»

⁴Jina Yarovam wisa kir; rabû çû Şîloyê mala Ahiya. Ahiya êdî nedidît çimkî kal bibû.

⁵Xudan ji Ahiya re wiha got: «Wê niha jina Yarovam were û pirsa kurê xwe ji te bike, çimkî ew nexweş e. Tê jê re wiha bibêjî. Gava ew bê, wê xwe wekî jineke din nîşan bide.»

⁶Dema jinik ji derî ket hûndir, Ahiya dengê lingên wê bihîst û jê re got: «Were hûndir, jina Yarovam. Te çima xwe wekî jineke din nîşan da? Ez hatime şandin ku xeberên xerab ji te re bêjim.

⁷Here ji Yarovam re bêje ku Xwedayê Îsraîl Xudan wiha dibêje: ‹Min tu ji nav gel hilbijart û li ser gelê xwe, Îsraîlê kir serwer.

⁸Min padîşahiyê ji Mala Dawid stand û da te. Lê tu nebûyî wek xulamê min Dawidê ku emrên min bi cih anî, bi hemû dilê xwe li pey min hat û bi tenê tiştên di çavê min de rast in kir.

⁹Te ji tevahiya kesên beriya xwe zêdetir xerabî kir. Te îlah û pûtên rijandî ji xwe re çêkirin. Bi vî awayî te ez hêrs kirim û pişta xwe da min.

¹⁰«‹Ji ber vê yekê, ezê belayan bînim serê Mala Yarovam û li Îsraîlê çi ciwan çi jî kal[57] ezê her mêrê Yarovamî tune bikim. Çawa ku kesek zibil dişewitîne ezê Mala Yarovam bişewitînim û ji holê rakim.

¹¹Kesên ji Mala Yarovam ên li bajaran bimirin wê kûçik, kesên li çolan bimirin jî wê teyrên ezmanan bixwin.› Çimkî Xudan wiha gotiye.

¹²«Niha tu rabe here mala xwe. Gava lingên te bikevin bajêr, wê kurik bimire.

¹³Wê tevahiya Îsraîlê şîna wî bike û wî veşêre. Ji Mala Yarovam wê bi tenê ew bikeve gorê. Çimkî ji Mala Yarovam kesê ku dilê Xwedayê Îsraîl Xudan pê xweş bû, ew bû.

¹⁴«Herwiha Xudan wê ji bo xwe padîşahekî deyne ser Îsraîlê. Ew padîşah wê hema wê rojê koka Mala Yarovam bîne. Kengê? Hema niha!

¹⁵Wê Xudan li gelê Îsraîlê bixe, çawa ku qamîşê di nava avê de diheje, wê biheje. Wê gel ji vî diyarê baş derxe ku dabû bav û kalên wan û wan belav bike û bavêje aliyê din a Firatê. Çimkî bi daçikandina pûtên xwe yên Aşêrayê, wan Xudan hêrs kirin.

¹⁶Ji ber gunehên ku Yarovam kirin û bi Îsraîlê dabû kirin, wê Xudan dev ji Îsraîlê berde.»

¹⁷Jina Yarovam rabû vegeriya Tîrsayê. Gava wê lingê xwe avêt ber şêmika malê kurik mir.

¹⁸Li gorî gotina ku wî bi riya xulamê xwe Ahiyayê Pêxember got, tevahiya gelê Îsraîlê şîna wî kir û ew veşart.

¹⁹Qewimînên din ên di padîşahiya Yarovam de, çawa şer kiriye, çawa padîşahî kiriye, di Nivîsa Qewimînên Padîşahên Îsraîlê de hatine nivîsandin.

²⁰Yarovam bîst û du salan padîşahî kir. Ew mir û gihîşt bav û kalên xwe. Kurê wî Nadav li cihê wî bû padîşah.

²¹Rehovamê kurê Silêman li Cihûdayê padîşahî kir. Gava ew bû padîşah çil û yek salî bû. Wî li Orşelîmê hivdeh salan padîşahî kir. Xudan ji bo navê wî tê de be, ji hemû derên eşîrên Îsraîlê ew bajar hilbijartibû. Dayika wî Naemaya Ammonî bû.

²²Cihûdayiyan tiştên di çavê Xudan de xerab in, kirin. Bi gunehên xwe, ji bav û kalên xwe zêdetir Xudan hêrs kir.

²³Li ser her girê bilind û li bin her dara şîn, ji xwe re cihê perizînê, kêlên kevirîn û pûtên Aşêrayê çêkirin.

²⁴Li welêt jin û mêrên laşfiroş ên pûtperestiyê jî hebûn. Cihûdayî wekî miletên din ku Xudan ew li ber gelê Îsraîlê qewirandibûn, her kirêtî kirin.

²⁵Di sala pêncan a padîşahiya Rehovam de, Şîşaqê Padîşahê Misrê êrîşê Orşelîmê kir.

²⁶Wî mertalên zêrîn ku Silêman dabûn çêkirin û hemû xezîneyên Mala Xudan û qesrê talan kir û bir.

²⁷Rehovamê Padîşah li cihê wan, mertalên tûnc çêkirin û dan fermandarên parêzvanên dergehê qesra padîşah.

²⁸Gava padîşah diçû Mala Xudan parêzvanan ew mertal hildidan û piştre dîsa dibirin odeya xwe.

²⁹Qewimînên din ên di padîşahiya Rehovam de û hemû kirinên wî, di Nivîsa Padîşahên Cihûdayê de hatine nivîsandin.

³⁰Di navbera Rehovam û Yarovam de herdem şer hebû.

³¹Rehovam mir û gihîşt bav û kalên xwe. Li Bajarê Dawid, li ba pêşiyên xwe hat veşartin. Dayika wî Naemaya Ammonî bû. Kurê wî Aviyam li cihê wî bû padîşah.