Read Kurmanji Încîl Padîşah I, 15 Bible Online

Padîşah I, 15 - Kurmanji Încîl bible

Padîşah I, 15

¹Di hijdeh saliya padîşahiya Yarovamê kurê Nevat de, Aviyam li ser Cihûdayê bû padîşah.

²Wî li Orşelîmê sê salan padîşahî kir. Dayika wî Maexaya keça Avşalom bû.

³Wî da ser riya hemû gunehên bavê xwe ku beriya wî kiribû. Wî dilê xwe bi tevahî nespart Xwedê Xudan, mina Dawidê bavkalê xwe.

⁴Lê ji bo xatirê Dawid, Xwedayê wî Xudan ji bo xurtkirina Orşelîmê, piştî wî kurê wî kir padîşah û bi vî awayî li Orşelîmê çirayek da wî.

⁵Çimkî Dawid ji bilî karê Ûriyayê Hîtîtî, tevahiya rojên xwe tiştên di çavê Xudan de rast in, kiribûn. Ew tu caran ji emrên wî derneketibû.

⁶Şerê di navbera Rehovam û Yarovam de, di tevahiya rojên Aviyam de berdewam kir.

⁷Qewimînên din ên di padîşahiya Aviyam de û hemû kirinên wî, di Nivîsa Qewimînên Padîşahên Cihûdayê de hatine nivîsandin. Şerê di navbera Aviyam û Yarovam de berdewam kir.

⁸Aviyam mir û gihîşt bav û kalên xwe. Li Bajarê Dawid hat veşartin. Kurê wî Asa li cihê wî bû padîşah.

⁹Di bîst saliya padîşahiya Yarovamê Padîşahê Îsraîlê de, Asa bû Padîşahê Cihûdayê.

¹⁰Asa li Orşelîmê çil û yek salan padîşahî kir. Pîrika wî Maexaya keça Avşalom bû.

¹¹Wî tiştên di çavê Xudan de rast in kirin, wekî tiştên bavkalê xwe Dawid kirin.

¹²Wî jin û mêrên laşfiroş ên pûtperestiyê ji welêt qewirandin. Hemû pûtên ku bav û kalên wî çêkirine ji holê rakirin.

¹³Pîrika xwe Maexa ji şahbanûtiyê avêt. Ji ber ku wê ji bo Aşêrayê pûtekî kirêt dabû çêkirin. Asa pûtê wê şikand, hûr û hela kir û ew li Newala Qîdronê şewitand.

¹⁴Tevî ku bilindciyên perizînê ranekirin jî, Asa di hemû rojên xwe de, dilê xwe bi tevahî spart Xudan.

¹⁵Wî zêr, zîv û taximên ku wî û bavê wî bexişandine, anî Mala Xudan.

¹⁶Şerê di navbera Asa û Baeşa Padîşahê Îsraîlê de heta ew sax bûn berdewam kir.

¹⁷Baeşa Padîşahê Îsraîlê dixwest êrîşî Cihûdayê bike. Wî bajarê Ramayê zexim kir ku tu kes nikaribe here ba Asayê Padîşahê Cihûdayê û were.

¹⁸Asa rahişt hemû zêr û zîvên xezîneya Mala Xudan û xezîneya qesra padîşah ê mayîn û da destê xulamên xwe ku ji Ben-Hadadê Tavrîmmonê Hezyonê Padîşahê Aramê re bibin ku li Şamê dima. Jê re ev xeber şand:

¹⁹«Di navbera min û te de, di navbera bavê te û bavê min de peyman heye. Va ye, ez zêr û zîv ji te re wekî diyarî dişînim ku tu peymana xwe ya bi Baeşa Padîşahê Îsraîlê re xera bikî ku ew jî belaya xwe ji min veke.»

²⁰Ben-Hadad guh da Asayê Padîşah û fermandarên xwe bi ser bajarên Îsraîlê ve şandin. Wî êrîşê bajarên Îyon, Dan û Avêl-Bêtmaexa û herêmên Kînneret û Nefteliyê kir.

²¹Gava Baeşa ev bihîst, dev ji çêkirina Ramayê berda û li Tîrsayê rûnişt.

²²Asayê Padîşah gazî tevahiya kesên li Cihûdayê kir ku herkes were. Wan kevir û depên ku Baeşa pê Ramayê çêkiribû, birin. Asayê Padîşah bi wan Gevaya Binyamînê û Mîspayê çêkirin.

²³Hemû qewimînên din ên di padîşahiya Asa de; kirin, hemû serketin û bajarên ava kirine, di Nivîsa Qewimînên Padîşahên Cihûdayê de hatine nivîsandin. Asa di kalîtiya xwe de ji lingên xwe nexweş ket.

²⁴Ew mir û gihîşt bav û kalên xwe. Li Bajarê Dawidê bavkalê xwe, li ba pêşiyên xwe hat veşartin. Kurê wî Yehoşafat li cihê wî bû padîşah.

²⁵Nadavê kurê Yarovam, di du saliya padîşahiya Asayê Padîşahê Cihûdayê de, li ser Îsraîlê bû padîşah. Nadav du salan padîşahî kir.

²⁶Wî tiştên di çavê Xudan de xerab in, kirin. Wî da ser riya bavkalê xwe û gunehê ku wî bi Îsraîlê dabû kirin.

²⁷Gava Nadav û tevahiya Îsraîlê bajarê Gîbbetona Filîstiyan dorpêç dikir, Baeşayê kurê Ahiyayê ji Mala Îssexar, fen li Nadav kir û ew li Gîbbetonê kuşt.

²⁸Di sê saliya padîşahiya Asayê Padîşahê Cihûdayê de, Baeşa Nadav kuşt û li cihê wî bû padîşah.

²⁹Gava Baeşa bû padîşah, qira tevahiya Mala Yarovam anî. Li gorî gotina Xudan ku bi riya xulamê xwe Ahiyayê Şîloyî gotibû, ji Mala Yarovam kesek nehişt, wî hemû kuştin.

³⁰Ev tişt ji ber gunehên Yarovam kiribû û bi Îsraîlê dabû kirin û ji ber ku Xwedayê Îsraîl Xudan hêrs kiribû, pêk hatin.

³¹Qewimînên din ên di padîşahiya Nadav de û hemû kirinên wî, di Nivîsa Qewimînên Padîşahên Îsraîlê de hatine nivîsandin.

³²Şerê di navbera Asa û Baeşa Padîşahê Îsraîlê de heta sax bûn berdewam kir.

³³Di sala sisêyan a Asayê Padîşahê Cihûdayê de, Baeşayê kurê Ahiya li Tîrsayê li ser Îsraîlê bû padîşah. Baeşa bîst û çar salan padîşahî kir.

³⁴Wî tiştên di çavê Xudan de xerab in, kirin. Wî da ser riya Yarovam û gunehê ku wî bi Îsraîlê dabû kirin.