Read Kurmanji Încîl Padîşah I, 16 Bible Online

Padîşah I, 16 - Kurmanji Încîl bible

Padîşah I, 16

¹Peyva Xudan bi riya Yêhûyê kurê Hananî ji Baeşa Padîşahê Îsraîlê re hat û got:

²«Tu ne tiştek bûyî, min tu rakirî û li ser gelê xwe Îsraîlê kir serwer. Lê te da ser riya Yarovam ku guneh bi Îsraîlê dabû kirin. Gunehên we ez hêrs kirim.

³Loma jî çawa min anî serê Mala Yarovamê kurê Nevat, ezê koka te û mala te jî biqelînim.

⁴Ji malbata Baeşa kesên li bajêr bimirin wê kûçik bixwin, kesên li çolê bimirin wê teyrên ezmanan bixwin.»

⁵Qewimînên din ên di padîşahiya Baeşa de, hemû kirinên wî û serketinên wî, di Nivîsa Qewimînên Padîşahên Îsraîlê de hatine nivîsandin.

⁶Ew mir û gihîşt bav û kalên xwe. Li Tîrsayê hat veşartin. Kurê wî Ela li cihê wî bû padîşah.

⁷Herwiha ji ber her xerabiyên Baeşa yên di çavê Xudan de, gotina Xudan bi riya Yêhûyê Pêxemberê kurê Hananî, ji wî û mala wî re hat. Çimkî Baeşa bi xerabiyên xwe Xudan hêrs kiribû û bibû wekî Mala Yarovam. Wî jî ev mal ji holê rakiribû.

⁸Di bîst û şeş saliya padîşahiya Asayê Padîşahê Cihûdayê de, Elayê kurê Baeşa li Tîrsayê li ser Îsraîlê bû padîşah. Wî du salan padîşahî kir.

⁹Xulamê wî Zîmriyê fermandarê nîvê erebeyên wî yên şer, fen lê kir. Ela wî çaxî li Tîrsayê li mala Arsayê berpirsê qesrê vexwaribû û serxweş bibû.

¹⁰Zîmrî ket hûndir Ela kuşt û li cihê wî bû padîşah. Wî çaxî bîst û heft saliya padîşahiya Asayê Padîşahê Cihûdayê bû.

¹¹Gava Zîmrî bû padîşah û hat ser text, koka tevahiya Mala Baeşa anî. Tu mêrekî ji meriv û hevalên wî nehiştin.

¹²Zîmrî koka tevahiya Mala Baeşa anî, wekî Xudan bi peyva xwe bi riya Yêhûyê Pêxember ji Baeşa re gotibû.

¹³Baeşa û Elayê kurê wî ji ber ku guneh kirin û bi Îsraîlê dane kirin û ji ber pûtên xwe, Xwedayê Îsraîl Xudan hêrs kir.

¹⁴Qewimînên din ên di padîşahiya Ela de û hemû kirinên wî, di Nivîsa Qewimînên Padîşahên Îsraîlê de hatine nivîsandin.

¹⁵Di sala bîst û heftan a Asayê Padîşahê Cihûdayê de, Zîmrî bû padîşah. Zîmrî li Tîrsayê bi tenê heft rojan padîşahî kir. Artêşa Îsraîlê nêzîkî bajarê Gîbbetona Filîstiyan artêşgeh ava kiribû.

¹⁶Kesên li artêşgehê gava bihîstin ku Zîmrî fen kiriye û padîşah kuştiye, hema wê rojê, Omriyê serfermandarê artêşê li wê derê li ser Îsraîlê kirin padîşah.

¹⁷Omrî û hemû Îsraîliyên pê re, ji Gîbbetonê rabûn û çûn Tîrsayê dorpêç kirin.

¹⁸Gava Zîmrî dît bajar tê standin, ket birca qesrê, qesir bi ser xwe de şewitand û hema li wir jî mir.

¹⁹Çimkî wî guneh û tiştên di çavê Xudan de xerab in kirin. Wî da ser riya Yarovam û gunehê wî ku bi Îsraîlê dabû kirin.

²⁰Qewimînên din ên di padîşahiya Zîmrî de û fenekiya wî, di Nivîsa Qewimînên Padîşahên Îsraîlê de hatine nivîsandin.

²¹Gelê Îsraîlê bû du beş. Nîvê gel ji bo ku Tîvniyê kurê Gînat bike padîşah li pey wî çû û nîvê mayî jî da pey Omrî.

²²Gelê ku xwe li Omrî girtibû, li dijî gelê ku xwe li Tîvniyê kurê Gînat girtibû bi ser ket. Tîvnî mir û Omrî bû padîşah.

²³Di sî û yekemîn saliya padîşahiya Asayê Padîşahê Cihûdayê de, Omrî li ser Îsraîlê bû padîşah. Wî duwanzdeh salan padîşahî kir ku şeş salên padîşahiyê li Tîrsayê derbas bû.

²⁴Omrî du telant[58] zîv da kesekî bi navê Şemer û Girê Sameryayê jê kirî. Wî li ser gir bajarekî ava kir. Ji ber ku navê xweyê berê yê wî girî Şemer bû, Omrî navê bajêr kir Samerya.

²⁵Omrî tiştên di çavê Xudan de xerab in, kirin û ji her kesên beriya xwe zêdetir xerabî kir.

²⁶Wî da ser hemû riyên Yarovamê kurê Nevat û gunehê ku bi Îsraîlê dabû kirin. Bi vî awayî Îsraîliyan Xwedayê Îsraîl Xudan, bi pûtên xwe hêrs kiribû.

²⁷Qewimînên din ên di padîşahiya Omrî de, kirin û serketinên wî, di Nivîsa Qewimînên Padîşahên Îsraîlê de hatine nivîsandin.

²⁸Omrî mir û gihîşt bav û kalên xwe. Li Sameryayê hat veşartin. Kurê wî Ahav li cihê wî bû padîşah.

²⁹Ahavê kurê Omrî, di sî û heşt saliya padîşahiya Asayê Padîşahê Cihûdayê de, li ser Îsraîlê bû padîşah. Wî li Sameryayê li ser Îsraîlê bîst û du salan padîşahî kir.

³⁰Ahavê kurê Omrî ji hemû kesên beriya xwe zêdetir tiştên di çavê Xudan de xerab in, kirin.

³¹Ahav, çawa ku gunehên bi çûna Yarovamê kurê Nevat ne bes bin, rabû bi ser de jî keça Etbaalê Padîşahê Saydayiyan Îzabelê ji xwe re anî. Piştre ji Baal re xulamî kir û perizî wî.

³²Wî li perestgeha Baal ku li Sameryayê çêkiriye ji bo Baal gorîgehek ava kir.

³³Ahav pûtê Aşêrayê jî çêkir. Wî ji tevahiya padîşahên Îsraîlê yên berê zêdetir, Xwedayê Îsraîl Xudan hêrs kir.

³⁴Di padîşahiya Ahav de Hiyêlê Bêt-Êlî bajarê Erîhayê ji nû ve ava kir. Li gorî gotina Xudan ku bi riya Yêşûyê kurê Nûn gotibû, gava wî bingeha bajêr danî, kurê wî yê mezin Avîram û gava dergehên bajêr danî, kurê wî yê biçûk Segûv mir.