Read Kurmanji Încîl Padîşah I, 18 Bible Online

Padîşah I, 18 - Kurmanji Încîl bible

Padîşah I, 18

¹Piştî demeke dirêj, di sê saliya xelayê de gotina Xudan ji Êlyas re hat û got: «Here xwe nîşanî Ahav bide. Ezê baranê bibarînim ser axê.»

²Êlyas çû ku xwe nîşanî Ahav bide. Li Sameryayê xela dijwar bû.

³Ahav gazî Ovadya kir ku berpirsê qesrê bû. Ovadya ji Xudan gelekî ditirsiya.

⁴Gava Îzabelê pêxemberên Xudan dikuştin, Ovadya sed pêxember birin, ew pêncî pêncî di şikeftan de veşartin û ew bi nan û av kirin.

⁵Ahav ji Ovadya re got: «Were em herin li hemû kaniyên avê û newalên welêt bigerin. Belkî em giya bibînin û hesp û hêstiran têr bikin ku em heywên winda nekin.»

⁶Herduyan di nav xwe de welat parve kir ku lê bigerin. Ahav tenê bi riyekê ve çû, Ovadya jî tenê bi riyeke din ve.

⁷Ovadya di rê de rastî Êlyas hat. Wî ew nas kir, deverû çû erdê û jê re got: «Ya Êlyas, ezbenî ev tu yî?»

⁸Got: «Belê ez im. Here ji xweyê xwe re bêje: ‹Êlyas li vir e.›»

⁹Ovadya got: «Çi gunehê min heye ku tu vî xulamê xwe didî destê Ahav ku min bikuje?

¹⁰Bi navê Xudanê Jîndar, Xwedayê te tu milet û tu welat nema ku xweyê min ji bo li te bigere zilam neşandinê û dema gotin: ‹Ew ne li vir e› jî, wî ew dan sondê ku wan tu nedîtine.

¹¹Lê tu niha dibêjî: ‹Here, ji xweyê xwe re bêje ku Êlyas li vir e!›

¹²Gava ez ji ba te herim, wê Ruhê Xudan te bibe cihekî ku ez pê nizanim. Gava ez bêm ji Ahav re bêjim û ew te nebîne, wê min bikuje. Lê ev xulamê te ji zarokatiya xwe ve ji Xudan ditirse.

¹³Ezbenî ma te nebihîst ku gava Îzabelê pêxemberên Xudan dan kuştin, min sed pêxemberên Xudan pêncî pêncî di şikeftan de veşartin û ew bi nan û av kirin?

¹⁴Niha tu dibêjî: ‹Here, ji xweyê xwe Ahav re bêje: Êlyas li vir e.› Wê rabe û min bikuje.»

¹⁵Êlyas got: «Bi navê Xudanê Karîndar yê Jîndar ku ez li ber sekinî me, ezê bi rastî îro xwe jê re kifş bikim.»

¹⁶Ovadya çû û Ahav dît. Wî jê re got. Li ser vê yekê Ahav çû ku pêşwaziya Êlyas bike.

¹⁷Gava Ahav Êlyas dît jê re got: «Ew zilamê ku Îsraîlê xistiye nav derdan tu yî?»

¹⁸Êlyas got: «Min Îsraîlê nexistiye nav derdan. Lê te û mala bavê te Îsraîlê xist nav derdan. We dev ji emrên Xudan berda û da pey Baalan.

¹⁹Niha tevahiya Îsraîlê pê bihesîne ku tevî çar sed û pêncî pêxemberên Baal û çar sed pêxemberên Aşêrayê ku li ser sifreya Îzabelê xwarin dixwin, li Çiyayê Karmelê li ba min bicivîne.»

²⁰Ahav tevahiya Îsraîliyan û pêxemberan li Çiyayê Karmelê civandin.

²¹Êlyas nêzîkî gel bû û got: «Heta kengê hûnê di navbera du aliyan de bi dudilî herin û werin? Heger Xudan, Xwedê ye, li pey wî bimeşin. Lê heger Baal Xwedê ye li pey wî bimeşin.» Gel tiştekî negot.

²²Êlyas ji gel re got: «Ji pêxemberên Xudan ez tenê mame. Lê pêxemberên Baal çar sed û pêncî kes in.

²³Ji me re du conega bînin, bila yekî ji xwe re hildin, perçe bikin û deynin ser êzingan û êgir pê nexin. Ezê conegayê din bavêjim ser êzingan û êgir pê nexim.

²⁴Hûn gazî îlahê xwe bikin, ezê jî gazî Xudan bikim. Kîjan ji wan êgir pêxe Xwedê ew e.» Tevahiya gel got: «Ev gotin baş e.»

²⁵Êlyas ji pêxemberên Baal re got: «Berê hûn ji xwe re conegayekî hildin û amade bikin. Çimkî hûn gelek in, gazî îlahê xwe bikin, lê êgir pê nexin.»

²⁶Conegayê xwe hildan û amade kirin. Ji sibê heta nîvro navê Baal hildan û gotin: «Ya Baal, bersiva me bide.» Lê tu deng nehat û kesekî ku bersivê bide tunebû. Ew li dor gorîgeha xwe direqisîn.

²⁷Dema bû nîvro Êlyas tinazê xwe bi wan kir û got: «Bi dengê bilind gazî bikin çimkî ew îlahek e, an kûr difikire, an li daşirê ye, an rêwîtî dike. Dibe di xew de be, divê hûn wî hişyar bikin.»

²⁸Wan bi dengê bilind gazî kir û li gorî adetan heta ku ji wan xwîn birije bi şûr û riman xwe birîndar kirin.

²⁹Ji nîvro heta dema pêşkêşiya êvarê bi cezba ketin. Lê ne deng hebû, ne bersivek. Kesî guhdariya wan nedikir.

³⁰Êlyas ji tevahiya gel re got: «Nêzîkî min bibin.» Tevahiya gel nêzîkî wî bû. Wî gorîgeha hilweşiyayî ya Xudan ji nû ve ava kir.

³¹Li gorî hejmara eşîrên kurên Aqûb ê ku gotina Xudan jê re hatibû û gotibû: «Navê te wê bibe Îsraîl», Êlyas rahişt duwanzdeh keviran.

³²Bi wan keviran gorîgeha li ser navê Xudan çêkir û li dora gorîgehê çalekê kola ku bi qasî du sea[59] tov hilde.

³³Êzing danî ser hev, conega perçe kir û danî ser êzingan. Paşê got: «Çar cer av dagirin û bi ser qurbana şewitandinê û êzingan ve birijînin.»

³⁴Êlyas got: «Dubare bikin.» Wan jî dubare kirin. Got: «Dîsa bikin.» Cara sisêyan jî eynî tiştî kirin.

³⁵Av li dora gorîgehê herikî û çal jî bi avê tije bû.

³⁶Dema ku pêşkêşiya êvarê bê pêşkêşkirin Êlyasê Pêxember nêzîkî gorîgehê bû, dua kir û got: «Ya Xudan, Xwedayê Îbrahîm, Îshaq û Îsraîl, bila îro bê zanîn ku li Îsraîlê tu Xudan î, ez xulamê te me û min tevahiya van tiştan bi gotina te kir.

³⁷Bersivê bide min ya Xudan! Bersivê bide min û bila ev gel bizanibe ku tu Xwedê yî ya Xudan û te kir ku dilê wan li te vegere.»

³⁸Agirê Xudan daket û qurbana şewitandinê, êzingan, keviran û axê xwar. Wî ew qedandin û ava di çalê de jî ziwa kir.

³⁹Tevahiya gel dît û deverû çû erdê û got: «Xudan, Xwedê ye! Xudan, Xwedê ye!»

⁴⁰Êlyas ji wan re got: «Pêxemberên Baal bigirin, bila tu kes ji wan nereve û nefilite.» Wan ew girtin. Êlyas ew birin Newala Qîşonê û ew li wir serjê kirin.

⁴¹Êlyas ji Ahav re got: «Rabe bixwe û vexwe. Çimkî dengê taviya baranê tê.»

⁴²Ahav ji bo xwarin û vexwarinê rabû. Êlyas jî derket ser Çiyayê Karmelê, deverû çû erdê û serê xwe xist nav çokên xwe.

⁴³Ji berdestiyê xwe re got: «Niha rabe berê xwe bide aliyê deryayê.» Berdestî rabû bala xwe da deryayê û got: «Tiştek tuneye.» Êlyas heft caran jê re got: «Dîsa here.»

⁴⁴Di cara heftan de berdestî got: «Va ye, ji deryayê ewrekî biçûk ê bi qasî kulma mirovan xuya dibe.» Êlyas jê re got: «Here ji Ahav re bêje: ‹Li erebeya xwe siwar be hê ku baran rê li ber te negire.›»

⁴⁵Wê gavê ezman bi ba û ewrên reş û tarî tije bû û baraneke giran bariya. Ahav siwar bû û berê xwe da Yîzreyêlê.

⁴⁶Destê Xudan li ser Êlyas bû. Wî piştêna xwe şidand û heta Yîzreyêlê li pêşiya Ahav beziya.