Read Kurmanji Încîl Padîşah I, 2 Bible Online

Padîşah I, 2 - Kurmanji Încîl bible

Padîşah I, 2

¹Çaxê rojên mirina Dawid nêzîk bûn, wî emir da Silêmanê kurê xwe û got:

²«Wekî her kesî ezê jî ji vê dinyayê herim. Tu hêzdar û mêrxas be.

³Peywira ku Xwedayê te Xudan daye te bîne cih. Bide ser riya wî û çawa ku di Şerîeta Mûsa de hatiye nivîsandin, guhdariya qanûn, emir, hikim û şahidiyên Xwedê bike ku tu di her karê dikî û riya dimeşî de bi ser bikevî.

⁴Wê Xudan vê gotina xwe ya li ser min bike: ‹Heger ziriyeta te, bi tevahiya dilê xwe û bi tevahiya canê xwe, miqateyê riya xwe be û bi dilsozî bi min re bimeşe, wê ji ziriyeta te mirovê li ser textê Îsraîlê kêm nebe.›

⁵ «Tiştê ku Yoavê kurê Serûyayê bi min kir, tu jî dizanî. Wî herdu fermandarên artêşa Îsraîlê, Avnêrê kurê Nêr û Emasayê kurê Yeter kuşt. Di dema aştiyê de çawa di şer de be, xwîn rijand. Piştek û çaroxa Yoav di nav xwînê de ma.

⁶Tu li gorî şehrezabûna xwe bike, lê porê wî yê spî bi dilekî rihet nexe diyarê miriyan.

⁷«Lê kerema xwe nîşanî kurên Barzîllayê Gîladî bike. Bila ji kesên li ser sifra te bin. Çimkî gava ez ji ber birayê te Avşalom reviyam, ew hatin hewara min.

⁸ «Roja çûm Mahanayîmê, Şîmiyê kurê Gêrayê ji eşîra Binyamînê Bahurîmî ku naleta giran li min kiribû jî niha li ba te ye. Gava ew li ber Çemê Ûrdunê hatibû pêşiya min, min bi navê Xudan sond xwaribû û gotibû: ‹Ez te bi şûr nakujim.›

⁹Tu jî wî bêceza nehêle. Tu mirovekî şehreza yî, tu dizanî pê çi dikî. Serê wî yê porspî, tevî xwînê bixe diyarê miriyan.»

¹⁰Dawid mir û gihîşt bav û kalên xwe. Li Bajarê Dawid hat veşartin.

¹¹Wî çil salan li ser Îsraîlê padîşahî kir; heft salan li Hevronê û sî û sê salan jî li Orşelîmê.

¹²Silêman li ser textê bavê xwe Dawid rûnişt û padîşahiya wî pir xurt bû.

¹³Adoniyayê kurê Haggîtê hat ba Bat-Şevaya dayika Silêman. Wê jê re got: «Hatina te ji bo xêrê ye gelo?» Wî got: «Belê ji bo xêrê ye.»

¹⁴Paşê got: «Çend gotinên min ji te re hene.» Wê got: «Bêje.»

¹⁵Wî got: «Wek tu dizanî padîşahî di destê min de bû. Çavê tevahiya Îsraîlê li ser min bû ku ez bibim padîşah. Lê padîşahî guherî û ket destê birayê min. Xudan wisa dixwest.

¹⁶Niha tenê daxwazeke min ji te heye. Lê daxwaza min piştguh neke!» Bat-Şevayê jê re got: «Bêje.»

¹⁷Wî got: «Silêmanê Padîşah ji te re nabêje na. Lava dikim jê re bibêje bila Avîşaga Şûnêmî ji bo zewacê bide min.»

¹⁸Bat-Şevayê jê re got: «Baş e, ezê ji bo xatirê te ji padîşah re bêjim.»

¹⁹Bat-Şeva ji bo daxwaza Adoniya jê re bibêje çû ba Silêmanê Padîşah. Padîşah ji ber dayika xwe ve rabû, xwe jê re tewand û dîsa li ser textê xwe rûnişt. Ji bo dayika padîşah jî textek danîn û ew li milê wî yê rastê rûnişt.

²⁰Dayika wî jê re got: «Tenê daxwazeke min a biçûk ji te heye. Lê vê daxwazê piştguh neke!» Padîşah jê re got: «Keremke dayê bêje, ez daxwaza te piştguh nakim.»

²¹Bat-Şevayê got: «Avîşaga Şûnêmî ji bo zewacê bide Adoniyayê birayê xwe.»

²²Silêmanê Padîşah got: «Ji bo Adoniya tu tenê Avîşaga Şûnêmî dixwazî? Hema padîşahiyê jî jê re bixwaze! Jixwe birayê mezin e jî! Aviyatarê Kahin û Yoavê kurê Serûyayê jî pê re ne.»

²³Silêmanê Padîşah bi navê Xudan sond xwar û got: «Heger Adoniya ji bo vê daxwazê, ji canê xwe nebe, bila Xwedê jê xerabtir bîne serê min.

²⁴Niha bi navê Xudanê Jîndar yê ku hêz daye min û li ser textê bavê min Dawid ez dame rûniştandin û her wek ku gotiye xanedanek ji min re daniye, ez sond dixwim ku wê îro Adoniya bê kuştin.»

²⁵Silêmanê Padîşah, Benayayê kurê Yehoyada peywirdar kir û şand. Wî jî Adoniya kuşt.

²⁶ Padîşah ji Aviyatarê Kahin re got: «Biqeşte here Enatotê! Here ser zeviyên xwe. Tu yê kuştinê yî, lê îro ez te nakujim. Çimkî te li pêş bavê min Dawid, Sindoqa Reb Xudan hilgirt û di hemû tengasiyan de bi bavê min re zehmetî dît.»

²⁷Silêman, Aviyatar ji kahintiya Xudan avêt û bi vî awayî gotina Xudan a ku li Şîloyê li ser Mala Elî gotibû pêk hat.

²⁸Gava xeber gihîşt Yoav, ew reviya Konê Xudan û xwe li qiloçên gorîgehê girt[3]. Çimkî Yoav pişta Avşalom negirtibû, lê piştgiriya Adoniya kiribû.

²⁹Ji Silêmanê Padîşah re gotin: «Yoav reviya Konê Xudan û li ber gorîgehê ye.» Silêman, Benayayê kurê Yehoyada şand û got: «Here wî bikuje!»

³⁰Benaya hat Konê Xudan û ji Yoav re got: «Padîşah dibêje: ‹Bila derkeve!›» Lê wî got: «Ez bimirim jî ji vir dernakevim!» Benaya hat ba padîşah û got: «Yoav bersiva min da û got: ‹Ez bimirim jî ji vir dernakevim!›»

³¹Padîşah got: «Naxwe çawa gotiye bike. Here wî bikuje û veşêre. Xwîna ku Yoav bêsedem rijand ji ser min û mala bavê min rake.

³²Wê Xudan heyfa xwîna ku wî rijandiye jê bistîne. Çimkî bêyî haya bavê min Dawid, wî serfermandarê artêşa Îsraîlê Avnêrê kurê Nêr û serfermandarê artêşa Cihûdayê Emasayê kurê Yeter dabû ber şûran û ew kuştibûn. Herdu jî jê rastir û çêtir bûn.

³³Wê xwîna wan heta hetayê bikeve stûyê Yoav û ziriyeta wî. Lê wê Xudan heta hetayê silametiyê bide Dawid, ziriyeta wî, malbata wî û textê wî.»

³⁴Benayayê kurê Yehoyada çû, li Yoav xist û kuşt. Ew li mala xwe ya li derveyî bajêr hat veşartin.

³⁵Padîşah li cihê Yoav, Benayayê kurê Yehoyada anî ser artêşê û Sadoqê Kahin jî anî cihê Aviyatar.

³⁶Padîşah şand pey Şîmî û got: «Li Orşelîmê ji xwe re malekê çêke û li wir bimîne. Bi tu awayî ji bajêr dernekeve û virde wêde neçe.

³⁷Roja tu derketî û te Newala Qîdronê derbas kir, bizanibe ku tê esse bimirî. Wê xwîna te bikeve stûyê te.»

³⁸Şîmî ji padîşah re got: «Baş e. Xweyê min padîşah çawa gotibe, wê xulamê te wiha bike.» Ew demeke dirêj li Orşelîmê rûnişt.

³⁹Lê di dawiya sala sisiyan de, du xulamên Şîmî reviyan ba Axîşê kurê Maexayê Padîşahê Gatê. Gava ji Şîmî re gotin: «Va ye, xulamên te li Gatê ne»

⁴⁰Şîmî rabû kerê xwe palan kir ku here Gatê ba Axîş û li xulamên xwe bigere. Ew hat û xulamên xwe ji Gatê anîn.

⁴¹Gava ji Silêman re gotin ku Şîmî ji Orşelîmê çûye Gatê û vegeriyaye,

⁴²Padîşah şand pey Şîmî û got: «Ma min li ser navê Xudan, bi te sond neda xwarin? Ma min ji te re negotibû û li te şîret nekiribû ku roja derkevî û virde wêde herî, bizanibe ku tê esse bimirî? Te jî ji min re gotibû: ‹Baş e, ezê bi ya te bikim.›

⁴³Madem wisa ye, te çima sonda xwe ya ku te bi navê Xudan xwar û emrê min pêk neanî?»

⁴⁴Padîşah ji Şîmî re got: «Bêguman tu hemû xerabiyên ku te li bavê min Dawid kirin ji dil dizanî. Ji ber xerabiyên te, wê Xudan xerabiya te bîne serê te.

⁴⁵Lê wê Silêmanê Padîşah pîroz be û textê Dawid li ber Xudan heta hetayê xurt bimîne.»

⁴⁶Padîşah emir da Benayayê kurê Yehoyada. Ew jî rabû çû û Şîmî kuşt. Padîşahî di destê Silêman de xurt bû.