Read Kurmanji Încîl Padîşah I, 21 Bible Online

Padîşah I, 21 - Kurmanji Încîl bible

Padîşah I, 21

¹Li Yîzreyêlê li ba qesra Ahavê Padîşahê Sameryayê, rezekî Navotê Yîzreyêlî hebû.

²Ahav ji Navot re got: «Rezê xwe bide min. Bila ji min re bibe bostanê sewzeyan, çimkî ew nêzîkî mala min e. Ezê li cihê wî rezekî çêtir bidim te. Yan jî, heger tu bixwazî ezê heqê wî bi zîvan bidim te.»

³Navot ji Ahav re got: «Xudan neke ku ez milkê bav û kalên xwe bidim te.»

⁴Ji ber ku Navotê Yîzreyêlî gotibû: «Ez milkê bav û kalên xwe nadim te», Ahav xeyidî û bi hêrs ket qesra xwe. Li ser nivînan xwe pal da, mirûzê xwe tirş kir û nan nexwar.

⁵Jina wî Îzabel hat ba wî û jê re got: «Çima wisa aciz î û nan naxwî?»

⁶Wî jê re got: «Çimkî min ji Navotê Yîzreyêlî re got: ‹Rezê xwe bi zîv bide min; an jî li cihê wî ez rezekî din bidim te› lê wî got: ‹Ez nadim te.›»

⁷Jina wî Îzabelê jê re got: «Ma ne tu yî Padîşahê Îsraîlê? Rabe nan bixwe û bila dilê te xweş be. Ezê rezê Navotê Yîzreyêlî bidim te.»

⁸Li ser navê Ahav name nivîsandin û bi mora wî ew mor kirin û name ji rîspî û pêşengên bajarê Navot re şandin.

⁹Di nameyan de wiha nivîsandin: «Rojiyekê îlan bikin û Navot jî deynin ser gel.

¹⁰Li pêşberê wî du şahidên derewîn bidin rûniştandin. Bila bêjin: ‹Te nalet li padîşah û Xwedê kir› bila li dijî wî şahidiyê bikin û wî derxin derve. Paşê wî bidin ber keviran û bikujin.»

¹¹Zilamên bajêr, rîspî û pêşengên ku li bajarê wî diman, çawa ku Îzabelê ji wan re nivîsandibû û gotibû kirin. Wekî di nameyan de hat nivîsandin,

¹²wan rojî îlan kir û Navot danîn ser gel.

¹³Du şahidên derewîn hatin û li pêşberî wî rûniştin. Van zilaman li ber gel li ser Navot gotin: «Navot nalet li padîşah û Xwedê kir.» Bi vî awayî şahidî kirin. Li ser vê yekê wan ew derxist derveyî bajêr, da ber keviran û kuşt.

¹⁴Ji Îzabelê re xeber şandin û gotin: «Navot hat kevirkirin û kuştin.»

¹⁵Gava Îzabelê bihîst ku Navot hatiye kevirkirin û kuştin, wê ji Ahav re got: «Rabe, rezê ku Navotê Yîzreyêlî nexwest bifiroşe te, ji xwe re bike milk. Çimkî êdî Navot ne sax e, ew mirî ye.»

¹⁶Gava Ahav bihîst ku Navot miriye, rabû çû ku rezê wî ji xwe re bike milk.

¹⁷Peyva Xudan ji Êlyasê Tîşbeyî re hat û got:

¹⁸«Rabe, here Sameryayê ba Ahavê Padîşahê Îsraîlê. Ew di nav rezê Navot de ye. Ew ji bo ku wê derê ji xwe re bike milk li wir e.

¹⁹Tê jê re bêjî: ‹Xudan wiha dibêje: Te kuşt û ji xwe re kir milk jî?› Tê jê re bêjî: ‹Xudan wiha dibêje: Li cihê ku kûçikan xwîna Navot alast, wê li wê derê xwîna te jî bialêsin.›»

²⁰Ahav ji Êlyas re got: «Ya dijminê min, tu hatî dîtina min?» Wî got: «Belê ez hatim dîtina te. Çimkî te xwe firot ku tu tiştên di çavê Xudan de xerab in bikî.

²¹Xudan dibêje: ‹Ezê xerabiyê bînim serê te. Ezê te derxim û bajom. Ezê çi ciwan çi jî kal[61] hemû mêrên ji ziriyeta Ahav ên li Îsraîlê tune bikim.

²²Ezê mala te wek Mala Yarovamê kurê Nevat û wek Mala Baeşayê kurê Ahiya bikim, çimkî te ez hêrs kirim û bi Îsraîlê guneh da kirin.›

²³«Xudan ji bo Îzabelê jî got: ‹Li ber dîwarê Yîzreyêlê wê kûçik Îzabelê bixwin.›

²⁴Herçî kesên ji malbata Ahav in, gava li bajêr bimirin, wê kûçik wan bixwin. Heger li çolê bimirin wê teyrên ezmanan wan bixwin.»

²⁵Di çavê Xudan de tu kesê wek Ahav ku xwe firotibû xerabiyê tunebû. Jina wî Îzabelê ew sor dikir.

²⁶Ahav wek Amoriyên ku Xudan li ber Îsraîliyan qewirandibûn da pey pûtan. Ev karekî kirêt bû.

²⁷Piştî gotinên Êlyas, Ahav cilê xwe veçirand, çûx li xwe kir û rojî girt. Di nav çûxê de raza û da ser riya nefsbiçûkiyê.

²⁸Peyva Xudan ji Êlyasê Tîşbeyî re hat û got:

²⁹«Ahav çawa li ber min nizim bû te dît? Madem li ber min nizim bû, ezê di rojên wî de xerabiyê neşînim. Lê ezê di rojên kurê wî de xerabiyê bişînim ser mala wî.»