Read Kurmanji Încîl Padîşah I, 7 Bible Online

Padîşah I, 7 - Kurmanji Încîl bible

Padîşah I, 7

¹Lê Silêman di sêzdeh salan de mala xwe çêkir û qedand.

²Silêman Mala Daristana Lubnanê jî çêkir. Bilindahiya wê sî gaz[19], berfirehiya wê pêncî gaz[20], dirêjahiya wê jî sed gaz[21] bû. Ew li ser çar rêzestûnên dara sedrê bû û kêranên dara sedrê jî li ser stûnan hatibû danîn.

³Serê çil û pênc kêranên li ser stûnan bi dara sedrê hatibû nixamtin. Di her rêzekê de panzdeh kêran hebûn.

⁴Çarçove sêrêzî û li pêşberî hev bûn.

⁵Tevahiya derî û zirzeyan çargoşe bûn. Herçî pencere bûn wekî sêrêzî li pêşberî hev hatibûn çêkirin.

⁶Silêman eywaneke bi stûn çêkir. Dirêjahiya wê pêncî û berfirehiya wê jî sî gaz bû. Li ber eywanê, eywaneke biçûk a bi stûn çêkir û bersifkekê li ber eywana biçûk danî.

⁷Wî Eywana Text jî çêkir. Li vê Eywana Dadbariyê wê biryar bihatana dayîn. Ev eywan jî ji serî heta binî bi dara sedrê hatibû nixamtin.

⁸Qesra lê dima jî, di hewşa din de li pişt eywanê bi eynî awayî hatibû çêkirin. Silêman maleke wekî wê eywanê, ji keça Firewn re jî çêkir ku pê re zewicîbû.

⁹Ji derve heta hewşa mezin, ji serî heta binî tevahiya van malan bi kevirên mezin ên bijare hatibûn çêkirin. Kevir bi bireka keviran hatibûn birîn, ser û binê keviran bi pîvan hatibûn birîn.

¹⁰Hîmê malê bi kevirên mezin ên bijare hatibû avêtin. Hinek ji wan keviran heşt gaz[22], hinek ji wan jî deh gaz[23] dirêj bûn.

¹¹Li ser wan, kevirên bijare yên ku bipîvan hatibûn birîn û texteyên ji dara sedrê hebûn.

¹²Hewşa mezin bi dîwarekî hatibû çeperkirin ku ji sê rêzik kevirên qewartî û rêzikek kêranên ji dara sedrê pêk dihat. Eywana navîn a Mala Xudan û dîwarên wê wekî hev bûn.

¹³Silêmanê Padîşah şand pey Hîram û ew ji Sûrê anî.

¹⁴Hîram, ji eşîra Neftelî kurê jinebiyekî bû, bavê wî yekî Sûrî bû û hosteyekî tûncan bû. Ew di tevahiya karên çêkirina tûncê de, şehreza, fêmdar û bi huner bû. Ew hat ba Silêmanê Padîşah û hemû karên wî kirin.

¹⁵Wî du stûnên tûncîn çêkirin. Bilindahiya her stûnekî hijdeh gaz[24], çermedora her yekî ji wan duwanzdeh gaz[25] bû.

¹⁶Ji bo ku deyne serê stûnan, ji tûncê helandî du serik çêkirin. Bilindahiya her serikekî ji wan pênc gaz[26] bû.

¹⁷Serê her stûnekê bi torekê hatibû pêçandin.

¹⁸Seranserê torê bi heft rêzikên zincîran hatibû xemilandin û bi du rêz şiklên hinaran jî hatibû nexişandin.

¹⁹Serikên li ser stûnên li eywanê, ji çar gazan[27] pêk dihatin û di şiklê sosinan de bûn.

²⁰Di serikê herdu stûnan de, li ser giloka li kêleka torê, bi awayê çermedorkirî du sed şiklên hinarên rêzkirî hebûn.

²¹Hîram stûn li eywana Perestgehê daçikandin. Ji stûna rastê re got Yaxîn[28], ji ya çepê re jî got Bowaz[29].

²²Li ser serikên stûnan şiklê sosinan hebûn. Bi vî awayî karê stûnan bidawî bû.

²³Wî ji tûncê helandî hewzekî gilover çêkir ku ji keviyekê heta keviya din berfirehiya wê deh gaz[30] bû. Kûrahiya wê pênc gaz û hawirdora wê jî sî gaz[31] bû.

²⁴Li binê çermedora keviya wê, di her gaza ku ew dorpêç dikir de, deh sêvik hebûn. Sêvik du rêzik bûn û ji tûncê helandî bûn.

²⁵Hewiz li ser duwanzdeh peykerên gayan hatibû rûniştandin ku berê sisêyan li bakur, sisê li rojava, sisê li rojhilat, berê sisêyan jî li başûr bû. Newqa gayan ber bi navê ve bû.

²⁶Çepera hewzê çar tilî bû. Keviyên wê wek keviyên tasê bûn û dirûvê sosinan bi wan diket. Du hezar bat[32] av hildida.

²⁷Hîram ji tûnc deh binik çêkirin. Dirêjahiya her binikê çar gaz, berfirehiya wê çar gaz û bilindahiya wê sê gaz[33] bû.

²⁸Binik wiha hatibûn çêkirin: Çarçik bûn û di navbera çikan de lewhe hebûn.

²⁹Li ser lewheyên kêlekê yên di navbera çikan de şiklên şêran, gayan û xerûban hebûn. Di çarçoveyan de, li jêr û li jora şêr û gayan, rêzekulîlkên serberjêrkî hatibûn nexşkirin.

³⁰Çar tekel û bistikên her binikî hebûn û ji tûnc bûn. Ji bo çar binikan jî destekên ji bo teştekê hatibûn çêkirin. Her destek bi rêzekulîlkan hatibûn nexişandin.

³¹Devê wê di nav serikê de bû û bilindahiya wê gazek[34] bû. Ev dev wekî binikê gurnê gilover bû. Binê devê wê gazek û nîv[35] berfireh bû. Li dora devê wê şiklên qewartî hebûn. Lewheyên wê ne gilover bûn lê çargoşe bûn.

³²Çar tekel di bin lewheyên kêlekê de bûn. Bistikên tekelan bi binikan ve hatibûn girêdan. Bilindahiya tekelekê gazek û nîv bû.

³³Ew tekel mîna tekelên erebeyên şer bûn. Tevahiya bistik, derxûn, tilî û serikên tekelan qewirandî bûn.

³⁴Ji çar aliyan ve di her binikê de çar destek hebûn, destekên her binikê jê bi xwe bûn.

³⁵Li ser binik, şiklekî gilover ya nîv gaz[36] bilind hebû. Destekên serê binik û lewheyên li kêlekê bi hev ve bûn.

³⁶Wî li gorî berfirehiya her yekê ji wan, li ser destek û lewheyan, li hawirdorê xerûb, şêr, darên xurmê û rêzekulîlk çêkirin.

³⁷Bi vî awayî deh binik çêkirin. Tevahiya tûncên wan yek, pîvanên wan yek, şiklên wan yek bû.

³⁸Hîram ji tûnc deh teşt çêkirin. Her teştek çil bat[37] av hildida. Berfirehiya her teştek çar gaz bû û li ser her deh binikan teştek hebû.

³⁹Pênc jê li rastê malê, pênc jê li çepê Malê binik danîn. Wî hewza li rasta Malê, ber bi rojhilatê başûr ve danî.

⁴⁰Hîram teşt, bêr û tas çêkirin. Wî tevahiya karên ku li Mala Xudan, ji bo Silêmanê Padîşah çêkirin û qedandin.

⁴¹Du stûnan, du giloverên serikên li ser stûnan û karê du torên serikên li ser stûnan ku giloveran dinixumandin,

⁴²ji bo karên du toran çar sed hinarên — ku du rêzên ji bo herdu torên serikên giloverên li ser stûnan bûn —

⁴³deh binik û deh teştên li ser binikan,

⁴⁴hewzek, li bin hewzê duwanzdeh peykerên gayan,

⁴⁵sîtil, bêr, tas û tevahiya van taximên Mala Xudan ku Hîram ji bo Silêmanê Padîşah çêkiribûn, ji tûncê biriqandî bûn.

⁴⁶Padîşah ev ji gila axa li navbera Sûkkot û Saretanê dabû çêkirin. Ev der li Deşta Ûrdunê ye.

⁴⁷Tişt ewqas zêde bûn ku Silêman hemûyan nepîva. Giraniya tûncê hatibû bikaranîn bêhesab bû.

⁴⁸ Taximên zêrîn ên Silêman ji bo Mala Xudan çêkirin ev in: Gorîgeh, maseya ku Nanê Hizûrê datanîn ser,

⁴⁹şamdankên ku pênc li rastê, pênc li çepê û li ber deriyê odeya hûndirîn bûn, kulîlk, find û maşikên ji zêrê xas yên şamdankan.

⁵⁰Herwiha tasik, meqesên fitîlan, tas, firaxên bixûrê û bixûrdankên ji zêrê xas. Odeya hûndirîn a Malê yanî Cihê Herî Pîroz ê Malê û zirzeyên deriyên odeya mezin ji zêr bûn.

⁵¹Li Mala Xudan, tevahiya karên ku Silêmanê Padîşah çêkirin bidawî bûn. Silêman çi zîv, çi zêr tiştên ku bavê wî Dawid bexişandibûn, tevî hemû taximan anî hûndir û ew xistin xezîneya Mala Xudan.