Read Kurmanji Încîl Padîşah II, 1 Bible Online

Padîşah II, 1 - Kurmanji Încîl bible

Padîşah II, 1

¹Piştî mirina Ahav, Moav li dijî Îsraîlê serî rakir.

²Ahazyayê Padîşahê Îsraîlê, li Sameryayê li odeya jorîn a qesra xwe, ji şibakeya bi çarçoveyên çaxkirî ket û birîndar bû. Wî qasid şandin û ji wan re got: «Herin ji Baal-Zevûvê îlahê Eqronê bipirsin, gelo ezê ji vê birînê xilas bibim an na?»

³Milyaketê Xudan ji Êlyasê Tîşbeyî re got: «Rabe, here pêşwaziya şandiyên Padîşahê Sameryayê bike û ji wan re bêje: ‹Ma li Îsraîlê Xwedê tuneye ku hûn ji Baal-Zevûvê îlahê Eqronê dipirsin?

⁴Ji ber vê yekê Xudan wiha dibêje: Tê ji wê nivîna li ser î, ranebî û esse bimirî.›» Êlyas rabû çû.

⁵Qasid vegeriyan ba padîşah û wî ji wan re got: «Hûn çima vegeriyan?»

⁶Wan got: «Zilamek hat pêşwaziya me û ji me re got: ‹Herin ba padîşahê ku hûn şandin û jê re bêjin: Xudan wiha dibêje: Ma li Îsraîlê Xwedê tuneye ku te qasid şandin Baal-Zevûvê îlahê Eqronê û jê dipirsî? Loma tê ji wê nivîna li ser î, ranebî û esse bimirî.›»

⁷Padîşah got: «Ew zilamê ku hat pêşwaziya we û ji we re wiha got, zilamekî çawa bû?»

⁸Wan got: «Xiftanekî bipirç lê bû û piştêneke çermîn li navtengê girêdayî bû.» Wî got: «Ew Êlyasê Tîşbeyî ye.»

⁹Pêncî zilamên xwe û fermandarê wan şandin ba wî. Fermandar çû ba Êlyasê li ser girekî rûniştibû. Fermandar jê re got: «Ya zilamê Xwedê, padîşah dibêje: ‹Bila were xwarê!›»

¹⁰Êlyas li fermandar vegerand û got: «Heger ez zilamê Xwedê me, bila ji ezmanan agir bibare, te û pêncî zilamên te bişewitîne û tune bike.» Ji ezmanan agir bariya, wî û her pêncî zilamên wî daqurtandin û tune kirin.

¹¹Padîşah careke din pêncî zilamên din û fermandarê wan şandin. Fermandar ji Êlyas re got: «Ya zilamê Xwedê, padîşah wiha dibêje: ‹Bila zû were xwarê!›»

¹²Êlyas bersiv da û ji wan re got: «Heger ez zilamê Xwedê me, bila ji ezmanan agir bibare, te û pêncî zilamên te daqurtîne û tune bike.» Ji ezmanan agirê Xudan bariya, wî û her pêncî zilamên wî daqurtandin û tune kirin.

¹³Cara sisiyan pêncî zilamên xwe û fermandarê wan şand. Fermandarê sisêyan a her pênciyan hat li ber Êlyas çok da û jê lava kir û got: «Ya zilamê Xwedê, lava dikim, bila heyfa te li min û li van pêncî xulamên te bê.

¹⁴Rast e, berê ji ezmanan agir bariya û herdu fermandarê pênciyan û mirovên wan şewitand û tune kir. Lê niha bila heyfa te bi min were.»

¹⁵Milyaketê Xudan ji Êlyas re got: «Pê re berjêr be, jê netirse.» Êlyas rabû pê re çû ba padîşah.

¹⁶Wî jê re got: «Xudan wiha dibêje: ‹Ma li Îsraîlê Xwedê tuneye ku te qasid şandin ba Baal-Zevûvê îlahê Eqronê û jê bipirsin? Loma tê ji wê nivîna li ser î, ranebî û esse bimirî.›»

¹⁷Li gorî peyva Xudan a ku Êlyas got, padîşah mir. Yoramê birayê Ahazya li cihê wî bû padîşah, çimkî kurê wî tunebû. Ev yek di du saliya padîşahiya Yehoramê kurê Yehoşafatê Padîşahê Cihûdayê de pêk hat.

¹⁸Qewimînên din ên di padîşahiya Ahazya de ku wî kirin, di Nivîsa Qewimînên Padîşahên Îsraîlê de hatine nivîsandin.