Read Kurmanji Încîl Padîşah II, 10 Bible Online

Padîşah II, 10 - Kurmanji Încîl bible

Padîşah II, 10

¹Her heftê kurên Ahav li Sameryayê bûn. Yêhû name nivîsandin û ew şandin Sameryayê, serekên Yîzreyêlê, rîspiyan û parêzvanên zarokên Ahavê. Yêhû di nameyan de wiha got:

²«Madem kurên xweyê we li ba we ne. Madem erebeyên şer, hesp, bajarê bisûr û çekên we hene, gava ev name gihîşt we,

³ji kurên xweyê xwe yê herî baş û hêja hilbijêrin, deynin ser textê bavê wî û ji bo mala xweyê xwe şer bikin.»

⁴Ew gelekî tirsiyan û gotin: «Du padîşah bi Yêhû nikaribûn, emê çawa pê bikaribin?»

⁵Berpirsiyarê qesrê, peywirdarê bajêr, rîspî û parêzvanên zarokên Ahav, xeber ji Yêhû re şand û got: «Em xulamên te ne, çi tiştê tu ji me re bêjî emê bikin. Em tu kesî nakin padîşah. Çi bi ya te baş e, wê bike.»

⁶Yêhû ji wan re nameya diduyan nivîsî û got: «Heger hûn bi min re bin û guhdariya gotina min bikin, serê kurên xweyê we jê bikin û sibe vî wextî werin Yîzreyêlê, ba min.» Heftê kurên padîşah li ba mezinên bajêr bûn ku berpirsên mezinkirina wan bûn.

⁷Gava name ji wan re hat, kurên padîşah girtin, her heftêyan jî serjê kirin. Serê wan xistine selikan û ji bo Yêhû şandin Yîzreyêlê.

⁸Qasid hat, jê re got: «Serên kurên padîşah anîn.» Yêhû got: «Li ber dergehê bajêr wek du lodan, heta serê sibê bihêlin.»

⁹Serê sibê Yêhû derket derve û ji tevahiya gel re got: «Hûn mirovên bêsûc in. Min fen li xweyê xwe kir û ew kuşt. Lê kê ev hemû kuştin?

¹⁰Bizanibin tu peyvek ji peyvên Xudan a li ser Mala Ahav hatiye gotin, li erdê nakeve. Xudan peyva xwe ya bi riya xulamê xwe Êlyas got, bi cih anî.»

¹¹Yêhû, hemû kesên Mala Ahavê li Yîzreyêlê mayî kuştin. Heta ku tu kesê jê nemîne, hemû mezinên wî, dostên wî yên nêzîk û kahinên wî kuştin.

¹²Yêhû rabû çû Sameryayê. Di rê de, gava li Bêt-Êqeda Şivanan bû,

¹³Yêhû rastî merivên Padîşahê Cihûdayê Ahazya hat û got: «Hûn kî ne?» Wan got: «Em merivên Ahazya ne. Em diçin ku silavê li kurên padîşah û kurên şahbanû bikin.»

¹⁴Yêhû ferman da û got: «Van bi saxî bigirin!» Wan ew bi saxî girtin. Çil û du kesan, li ba bîra Bêt-Êqedê serjê kirin. Wî kesek sax bernade.

¹⁵Gava Yêhû ji wê derê çû, rastî Yehonadavê kurê Rêxav hat ku hatibû pêşwaziya wî. Silavê lê kir û got: «Bi qasî ku dilê min bi te re rast e, gelo dilê te jî bi min re rast e?» Yehonadav got: «Belê, bi te re rast e.» Yêhû jê re got: «Naxwe ka destê xwe bide min.» Yehonadav destê xwe da wî. Yêhû ew li ba xwe li erebeyê siwar kir.

¹⁶Yêhû got: «Bi min re were û xîretkêşiya min a ji bo Xudan bibîne.» Bi vî awayî li erebeyê siwar kir.

¹⁷Hat Sameryayê û li gorî peyva Xudan a ku Xudan ji Êlyas re got, li merivên din ên Ahav xist û qira wan anî.

¹⁸Yêhû tevahiya gel berhev kir û ji wan re got: «Ahav, ji Baal re hindik xulamî kir, lê wê Yêhû jê re xulamiya zêdetir bike.

¹⁹Niha gazî hemû pêxemberên Baal, tevahiya kesên diperizin wî û hemû kahinan bikin. Bila kesek ne kêm be. Çimkî ji Baal re qurbaneke min a mezin heye. Kî neyê wê bê kuştin.» Lê Yêhû, ev yek ji bo ku kesên diperizin Baal tune bike, bi fen kir.

²⁰Yêhû got: «Ji bo rûmeta Baal civîneke mezin amade bikin.» Wan ev yek ragihand.

²¹Yêhû xeber şand Îsraîlê û tevahiya kesên ku diperizîn Baal hatin. Kesê nehat nema. Ew hatin perestgeha Baal. Mala Baal, heta bi dev tije bû.

²²Yêhû ji berpirsê zilamê kincên pîroz re got: «Ji her kesên ku diperizin Baal re kincan derxe.» Ji bo wan kinc derxistin.

²³Yêhû bi Yehonadavê kurê Rêxav re ket perestgeha Baal. Ji kesên diperizin Baal re got: «Lê bikolin û binêrin. Li vê derê bila ji xulamên Xudan kesek bi we re nemîne, tenê bila yên ku diperizin Baal bimînin.»

²⁴Ji bo ku qurbanên şewitandinê û qurbanên din pêşkêş bikin, ketin hûndir. Yêhû li derve ji bo xwe heştê zilam danîbû. Wî got: «Heger ji van zilamên ku min dan destê we, kesek bireve, wê di ber canê wî de, canê xwe bide.»

²⁵Gava Yêhû qurbana şewitandinê qedand, ji leşkerên piyade û şervanan re got: «Bikevin hûndir û wan bikujin, bila tu kes ji wan nefilite.» Wan ew dan ber şûran. Leşkerên piyade û şervanan ew avêtin derve. Paşê ketin beşê navê yê perestgeha Baal.

²⁶Kêlên kevirîn ji perestgeha Baal derxistin û ew şewitandin.

²⁷Kêlên kevirîn ên Baal hilweşandin. Mala Baal rûxandin, ew der kirin avrêj û heta îro jî ew der wisa ye.

²⁸Bi vî awayî Yêhû Baal ji Îsraîlê tune kir.

²⁹Lê Yêhû ji gunehên perizîna golikên zêrîn ên li Bêt-Êl û Danê ku Yarovamê kurê Nevat bi Îsraîlê dabû kirin, xwe neda alî.

³⁰Xudan ji Yêhû re got: «Ji ber ku te qenc kir û tiştên di çavên min de rast in kirin, her tiştê li gorî dilê min, te bi Mala Ahav kir, wê ziriyeta te, çar nifş li ser textê Îsraîlê rûne.»

³¹Lê Yêhû li Şerîeta Xwedayê Îsraîl Xudan miqate nebû, ji dil û can nemeşiya. Ji gunehên Yarovam ku bi Îsraîlê dabû kirin, xwe neda alî.

³²Xudan, di wan rojan de, dest bi biçûkirina welatê Îsraîlê kir. Hazaêl li seranserê Îsraîlê li wan xist.

³³Ji Çemê Ûrdunê û wir ve, heta rojhilat li tevahiya diyarê Gîladê, li Gadiyan, li Rûbêniyan, li Minaşşeyiyan, ji Eroêra ku li kêleka Newala Arnonê ye û wir ve, li Gîlad û Başanê jî xist.

³⁴Qewimînên din ên di padîşahiya Yêhû de, hemû kirin û serketinên wî, di Nivîsa Qewimînên Padîşahên Îsraîlê de hatine nivîsandin.

³⁵Ew mir û gihîşt bav û kalên xwe. Li Sameryayê hat veşartin. Kurê wî Yehoahaz li cihê wî bû padîşah.

³⁶Yêhû li Sameryayê bîst û heşt salan li ser Îsraîlê padîşahî kir.