Read Kurmanji Încîl Padîşah II, 11 Bible Online

Padîşah II, 11 - Kurmanji Încîl bible

Padîşah II, 11

¹Gava Etalyaya dayika Ahazya mirina kurê xwe dît, rabû ku koka tevahiya ziriyeta padîşah tune bike.

²Lê Yehoşevaya keça Yehoramê Padîşah ku xwişka Ahazya ye, Yoaşê kurê Ahazya ji nav kurên padîşah ên ku Etalyayê dixwest wan bikuje, hilda û revand. Wê ew û dadika wî birin odeya razanê. Bi vî awayî ew ji Etalyayê hat veşartin û nehat kuştin.

³Ew şeş salan pê re, di Mala Xudan de ma. Etalyayê jî li ser welêt şahbanûtî kir.

⁴Di sala heftan de Yehoyada xeber şand û gazî sersedên Kariyan[17] û sersedên hêza parastinê kir. Wî ew anîn Mala Xudan, ba xwe. Wî bi wan re peymanek çêkir û li Mala Xudan ew dan sondê. Paşê kurê padîşah Yoaş nîşanî wan da.

⁵Li wan emir kir û got: «Divê hûn wiha bikin: Ji sisêyan yekê we yên ku Roja Septê nobedariyê dikin, bila qesra padîşah biparêzin.

⁶Ji sisêyan yekê we, bila li Dergehê Sûrê bisekine. Ji sisêyan yekê mayîn jî, bila li pişt dergehê leşkerên piyade amade be. Bi vî awayî hûnê qesrê[18] biparêzin.

⁷Herwiha tevahiya leşkerên herdu beşên we yên ku Roja Septê nobedarî nakin, bila ji bo padîşah Mala Xudan biparêzin.

⁸Her kesekî ji we bila çekê wî di destan de bin û padîşah dorpêç bikin. Kesê nêzîkî sefa we bibe bikujin. Padîşah here ku derê, pê re bin.»

⁹Sersedan her tiştên ku Yehoyadayê Kahin ferman kiriye, bi cih anîn û her yek ji wan, zilamên xwe yên ku Roja Septê nobedarî dikin û yên ku nakin hildan û hatin ba Yehoyadayê Kahin.

¹⁰Kahin rim û mertalên Dawidê Padîşah ên li Mala Xudan dan sersedan.

¹¹Leşkerên piyade ji milê rastê Malê heta milê çepê, li ba gorîgehê û Malê, li dorhêla padîşah, her kesek çekê wî di destan de sekinî.

¹²Yehoyadayê Kahin, Yoaşê kurê padîşah derxist derve û tac danî serê wî, Şerîet spart wî, ew bi rûn kifş kir û kir padîşah. Li çepikan xistin û gotin: «Her bijî padîşah!»

¹³Gava Etalyayê, qelebalixa leşkerên piyade û gel bihîst, hat Mala Xudan, ba wan.

¹⁴Bala xwe dayê, va ye padîşah li gorî kevneşopiyê, li ber stûnê sekiniye. Sersed û borîvan li ba padîşah bûn. Tevahiya gelê welêt şa dibûn, li boriyan dixistin. Etalyayê rabû kincên xwe qetandin û kire qîrîn: «Ev xiyanet e! Xiyanet!»

¹⁵Yehoyadayê Kahin, ferman da sersedên leşkeran û ji wan re got: «Wê ji sefa xwe derxin û kî li pey wê here bi şûran bikujin.» Çimkî kahin gotibû: «Bila ew li Mala Xudan neyê kuştin.»

¹⁶Etalya hate girtin. Wan ew bir ber deriyê hespan ê qesrê û li wir hate kuştin.

¹⁷Yehoyada di navbera Xudan, gel û padîşah de peymanekê çêkir ku gel bibe gelê Xudan. Herwiha di navbera padîşah û gel de jî peymanekê çêkir.

¹⁸Tevahiya gelê welêt rabû çû perestgeha Baal û ew der hilweşand. Gorîgeh û pûtên perestgehê parî parî kirin. Mattanê kahinê Baal li ber gorîgehan kuştin. Yehoyadayê Kahin, nobedar danî ber Mala Xudan.

¹⁹Paşê wî gazî sersed, Karî, leşkerên piyade û tevahiya gelê welêt kir û padîşah ji Mala Xudan derxistin. Ji riya dergehê leşkerên piyade hatin qesra padîşah. Piştre jî ew li ser textê padîşahiyê rûnişt.

²⁰Tevahiya gelê welêt kêfxweş bû. Aramiyek li bajêr peyda bû. Çimkî Etalya li qesrê bi şûr hatibû kuştin.