Read Kurmanji Încîl Padîşah II, 12 Bible Online

Padîşah II, 12 - Kurmanji Încîl bible

Padîşah II, 12

¹Gava Yoaş bû padîşah heft salî bû[19]. Yoaş di heft saliya padîşahiya Yêhûyê Padîşahê Îsraîlê de bibû Padîşahê Cihûdayê. Wî li Orşelîmê çil salan padîşahî kir. Dayika wî Sîvyaya Bîr-Şevayî bû.

²Wî di tevahiya rojên xwe de, tiştên di çavê Xudan de rast in kirin, çimkî Yehoyadayê Kahin hînî wî dikir.

³Wî bi tenê bilindciyên perizînê ji holê ranekirin. Gel hê jî li bilindciyan qurban serjê dikirin û bixûr pêdixistin.

⁴Yoaş ji kahinan re got: «Pereyê tevahiya tiştên pîroz yê dikeve Mala Xudan, pereyê ji serjimariya her kesî û tevahiya pereyê bi dilxwazî dihat Mala Xudan,

⁵bila kahin van pereyan ji peywirdarên xezîneyê bistînin û li Mala Xudan li temîrkirina her dera xerabe xerc bikin.»

⁶Heta bîst û sê saliya padîşahiya Yoaş, kahinan hê jî dest bi temîra Malê nekiribûn.

⁷Li ser vê yekê Yoaşê Padîşah bi Yehoyadayê Kahin re gazî wan kahinên din kir û ji wan re got: «Hûn çima temîra Malê nakin? Êdî ji peywirdarên xezîneyê pere nestînin, pereyên we standin li temîra Malê xerc bikin.»

⁸Kahin razî bûn ku êdî ji gel pere nestînin û ew bi xwe Malê temîr nekin.

⁹Yehoyadayê Kahin rahişt sindoqekê û di deriyê wê de qulek vekir. Wî sindoq li ber gorîgehê, gava mirov dikeve Mala Xudan li milê rastê danî. Dergevan tevahiya pereyên hatine Mala Xudan xistin nava wê sindoqê.

¹⁰Gava didîtin ku di sindoqê de pere gelek e, nivîsendeyê padîşah û serkahin diçûn, pereyên li Mala Xudan dihejmartin û dixistin kîsikan.

¹¹Pereyên dihatin jimartin, didan destên serkarên Mala Xudan. Wan jî ew didan necar û karkerên Mala Xudan

¹²û didan kevirbir û hosteyên dîwaran. Herwiha ji bo temîra Mala Xudan dar, kevirên qewartî û çi lazim bûya li wan xerc dikirin.

¹³Lê ji pereyên hatina Mala Xudan, bi tasikên zîvîn, meqesên fitîlan, tas, borî û tiştên ku ne ji zêr û zîv hatine çêkirin nehat xerckirin.

¹⁴Çimkî pere dane kesên ku dixebitîn û bi wan Mala Xudan temîr dikirin.

¹⁵Serkarên pere didan karkerên Mala Xwedê, ewqas dirust bûn ku kesek ji wan hesab nedipirsiya.

¹⁶Pereyên pêşkêşiyên berdêlê û paqijiyê neanîn Mala Xudan, çimkî ew para kahinan bû.

¹⁷Wê demê Padîşahê Aramê Hazaêl rabû li dijî Gatê şer kir, ew stand û Hazaêl ji bo ku bistîne berê xwe da Orşelîmê.

¹⁸Yoaşê Padîşahê Cihûdayê, tevahiya diyariyên pîroz ên ku padîşahên Cihûdayê; Yehoşafat, Yehoram û Ahazyayê bav û kalên wî, ew pîroz kiribûn, tevî diyariyên pîroz ên xwe, tevahiya zêrê xezîneyên Mala Xudan û qesrê standin û ew ji Hazaêlê Padîşahê Aramê re şandin. Hazaêl jî, ji Orşelîmê dûr ket.

¹⁹Qewimînên din ên di padîşahiya Yoaş de û hemû kirinên wî, di Nivîsa Qewimînên Padîşahên Cihûdayê de hatine nivîsandin.

²⁰Xulamên Yoaş fen lê kir û ew li ser riya diçe Sîllayê, li Bêtmîlloyê kuştin.

²¹Xulamên wî Yozavadê kurê Şîmat û Yehozavadê kurê Şomêr lê xist û ew mir. Wan ew li Bajarê Dawid, li ba bav û kalên wî veşart. Kurê wî Amatsya li cihê wî bû padîşah.