Read Kurmanji Încîl Padîşah II, 13 Bible Online

Padîşah II, 13 - Kurmanji Încîl bible

Padîşah II, 13

¹Di bîst û sê saliya padîşahiya Yoaşê kurê Ahazyayê Padîşahê Cihûdayê de, Yehoahazê kurê Yêhû li Sameryayê li ser Îsraîlê bû padîşah. Wî hivdeh salan padîşahî kir.

²Yehoahaz tiştên di çavê Xudan de xerab in, kirin. Wî da ser riya gunehên Yarovamê kurê Nevat ku wî bi Îsraîlê dabû kirin. Wî xwe ji wan neda alî.

³Xudan li dijî Îsraîlê hêrs bû û gelek caran ew dan destê Hazaêlê Padîşahê Aramê û Ben-Hadadê kurê Hazaêl.

⁴Yehoahaz ji Xudan lava kir û Xudan dengê wî bihîst, çimkî wî tengasiya Îsraîlê dît ku çawa Padîşahê Aramê wan dixe tengasiyê.

⁵Xudan rizgarkarek da Îsraîlê. Ew ji bin destê Aramê derket û kurên Îsraîliyan wekî berê di konên xwe de rûniştin.

⁶Lê wan ji gunehên ku Mala Yarovam bi Îsraîlê dabû kirin, xwe nedan alî. Dan ser riya wan û pûtê Aşêrayê jî li Sameryayê daçikandî ma.

⁷Çimkî ji gelê Yehoahaz, ji pêncî siwarî, deh erebeyên şer û deh hezar peyayan pê ve, tu kes nemabû. Padîşahê Aramê ew wekî xweliya bênderê perçiqandibûn û tune kiribûn.

⁸Qewimînên din ên di padîşahiya Yehoahaz de, hemû kirin û serketinên wî, di Nivîsa Qewimînên Padîşahên Îsraîlê de hatine nivîsandin.

⁹Ew mir û gihîşt bav û kalên xwe. Li Sameryayê hat veşartin. Kurê wî Yehoaş li cihê wî bû padîşah.

¹⁰Di sî û heft saliya padîşahiya Yoaşê Padîşahê Cihûdayê de, Yehoaşê kurê Yehoahaz li Sameryayê li ser Îsraîlê bû padîşah. Wî şanzdeh salan padîşahî kir.

¹¹Yehoaş tiştên di çavê Xudan de xerab in, kirin. Wî ji hemû gunehên ku Yarovamê kurê Nevat bi Îsraîlê dabû kirin, xwe neda alî û di riya wan de meşiya.

¹²Qewimînên din ên di padîşahiya Yehoaş de, hemû kirin û serketinên wî yên li dijî Amatsyayê Padîşahê Cihûdayê şer kiriye, di Nivîsa Qewimînên Padîşahên Îsraîlê de hatine nivîsandin.

¹³Ew mir û gihîşt bav û kalên xwe û Yarovam[20] li ser textê wî rûnişt. Li Sameryayê, li ba padîşahên Îsraîlê hat veşartin.

¹⁴Êlîşa ket ber nexweşiyeke giran. Yehoaşê Padîşahê Îsraîlê çû ba wî, li ser wî giriya û got: «Wey bavo, wey bavo! Erebeya Îsraîlê û siwarên wê!»

¹⁵Êlîşa jê re got: «Tîr û kevanên xwe hilde.» Wî tîr û kevan hildan.

¹⁶Ji Padîşahê Îsraîlê re got: «Destê xwe deyne ser kevanê.» Wî destê xwe da ser. Êlîşa jî destên xwe danîn ser destên padîşah.

¹⁷Got: «Pencereya li aliyê rojhilat veke.» Wî vekir. Êlîşa got: «Tîr bavêje.» Wî avêt. Got: «Ev tîra rizgariya Xudan e ku li dijî Aramê ye! Çimkî heta tu Aramiyan biqedînî, tê li Afêqê li wan bixî.»

¹⁸Paşê dîsa got: «Tîran hilde.» Wî hilda. Ji Padîşahê Îsraîlê re got: «Li erdê bixe.» Wî sê caran li erdê xist û sekinî.

¹⁹Zilamê Xwedê li dijî wî hêrs bû û got: «Divê te pênc an şeş caran lê bixista. Heger te wisa bikira wê Aram tune bibûya. Lê niha tê tenê sê caran li Aramê bixî.»

²⁰Êlîşa mir û hate veşartin. Her sal di biharê de rêbirên Moavê, êrîşî welat dikirin.

²¹Rojekê gava miriyek dihat veşartin dîtin ku komeke rêbiran tê. Wan mirî avêt gora Êlîşa û reviyan. Gava mirî li hestiyên Êlîşa ket, sax bû û rabû ser piyan.

²²Di tevahiya padîşahiya Yehoahaz de, Padîşahê Aramê Hazaêl, Îsraîl xist tengasiyê.

²³Lê ji ber peymana ku wî bi Îbrahîm, Îshaq û Aqûb re çêkir, Xudan li wan hat rehmê. Dilê wî bi wan şewitî û ew ber bi wan ve çû. Wî nexwest wan helak bike. Heta niha jî wî ew ji ber çavê xwe neavêtine.

²⁴Hazaêlê Padîşahê Aramê mir û kurê wî Ben-Hadad li cihê wî bû padîşah.

²⁵Yehoaşê Padîşahê Îsraîlê, bajarên ku Hazaêl ji destê bavê wî Yehoahaz standibû, ji Ben-Hadadê kurê Hazaêl dîsa standin. Yehoaş, sê caran ew têk bir û bajarên Îsraîlê careke din standin.