Read Kurmanji Încîl Padîşah II, 14 Bible Online

Padîşah II, 14 - Kurmanji Încîl bible

Padîşah II, 14

¹Di du saliya padîşahiya Yehoaşê kurê Yoahazê Padîşahê Îsraîlê de, Amatsyayê kurê Yoaş bû Padîşahê Cihûdayê.

²Gava Amatsya bû padîşah bîst û pênc salî bû. Wî li Orşelîmê bîst û neh salan padîşahî kir. Dayika wî Yehoaddana Orşelîmî bû.

³Wî tiştên di çavê Xudan de rast in kirin, lê ne wek bavkalê xwe Dawid bû. Wî hemû tiştên ku bavê wî Yehoaş kiribûn, kirin.

⁴Wî bi tenê bilindciyên perizînê ji holê ranekirin. Gel hê jî li bilindciyan qurban serjê dikirin û bixûr pêdixistin.

⁵Gava padîşahî di destê wî de xurt bû, peywirdarên ku bavê wî kuştibûn, kuştin.

⁶Lê zarokên kujeran nekuştin. Çimkî di Nivîsa Şerîeta Mûsa de, Xudan emir kiribû û gotibû: «Wê bav ji bo kuran, kur jî ji bo bavan neyên kuştin, wê herkes ji bo gunehê xwe bê kuştin.»

⁷Amatsya deh hezar Edomî li Geliyê Xwê kuştin û Selayê bi şer stand. Navê wê kir Yoqteyêl û heta niha jî wisa ye.

⁸Wî çaxî Amatsya, ji Padîşahê Îsraîlê Yehoaşê kurê Yehoahazê kurê Yêhû re qasid şandin û got: «De were, em berê xwe bidin hev!»

⁹Li ser vê yekê Yehoaşê Padîşahê Îsraîlê ji Amatsyayê Padîşahê Cihûdayê re xeber şand û got: «Diriyeke li Lubnanê, ji dara sedrê ya Lubnanê re xeber şand û got: ‹Keça xwe bide kurê min.› Wê gavê heywanekî çolê yê Lubnanê di ser diriyê re derbas bû û ew perçiqand.

¹⁰Te Edomî têk birin û xwe qure kir. Ev besî te ye, here li mala xwe rûne. Çima tu serê xwe dixî belayê? Çima tê tevî Cihûdayê bikevî?»

¹¹Lê Amatsya guhdarî nekir. Li ser vê yekê Yehoaşê Padîşahê Îsraîlê rabû çû bi Amatsyayê Padîşahê Cihûdayê re li bajarê Bêtşemeşa Cihûdayê kete şer.

¹²Cihûda li dijî Îsraîlê têk çû û herkes reviya konên xwe.

¹³Yehoaşê Padîşahê Îsraîlê, Amatsyayê Padîşahê Cihûdayê kurê Yoaşê kurê Ahazya[21] li Bêtşemeşê girt. Paşê ket Orşelîmê û dîwarê Orşelîmê ji Dergehê Efrayîmê heta Dergehê Goşeyê, bi qasî çar sed gazî[22] rûxand.

¹⁴Tevahiya zêr, zîv û firaxên Mala Xudan û xezîneyên qesra padîşah û hinek êsîran wek gerew bi xwe re birin û vegeriya Sameryayê.

¹⁵Qewimînên din ên di padîşahiya Yehoaş de, hemû kirin û serketinên wî yên li dijî Amatsyayê Padîşahê Cihûdayê şer kiriye, di Nivîsa Qewimînên Padîşahên Îsraîlê de hatine nivîsandin.

¹⁶Ew mir û gihîşt bav û kalên xwe. Li Sameryayê, li ba padîşahên Îsraîlê hat veşartin. Kurê wî Yarovam li cihê wî bû padîşah.

¹⁷Amatsyayê kurê Yoaşê Padîşahê Cihûdayê, piştî mirina Yehoaşê kurê Yehoahazê Padîşahê Îsraîlê, panzdeh salan jiya.

¹⁸Qewimînên din ên di padîşahiya Amatsya de, di Nivîsa Qewimînên Padîşahên Cihûdayê de hatine nivîsandin.

¹⁹Li Orşelîmê fen li dijî Amatsya kirin. Ew reviya Laxîşê. Hin kes li pey wî şandin Laxîşê û li wê derê ew kuştin.

²⁰Ew li ser hespan anîn Orşelîmê. Li Bajarê Dawid, li ba bav û kalên xwe hat veşartin.

²¹Tevahiya gelê Cihûdayê rabû Ezarya[23] kir padîşah. Gava gel li cihê bavê wî ew kir padîşah, Amatsya şanzdeh salî bû.

²²Piştî Amatsyayê Padîşah mir û gihîşt bav û kalên xwe, Ezarya bajarê Eylatê ava kir û dîsa xist bin serweriya Cihûdayê.

²³Di panzdeh saliya padîşahiya Amatsyayê kurê Yoaşê Padîşahê Cihûdayê de, Yarovamê kurê Yehoaş li Sameryayê bû Padîşahê Îsraîlê. Yarovam çil û yek salan padîşahî kir.

²⁴Wî tiştên di çavê Xudan de xerab in, kirin. Wî ji hemû gunehên ku Yarovamê kurê Nevat bi Îsraîlê dabû kirin, xwe neda alî.

²⁵Li gorî peyva Xudan ku Xwedayê Îsraîl Xudan bi riya xulamê xwe Ûnisê Pêxemberê kurê Amîttayê Gat-Hêferî gotiye, Yarovam ji Levo-Hamatê heta Gola Eravayê[24] erdê Îsraîlê dîsa bi dest xist.

²⁶Xudan tengasiya dijwar a Îsraîlê dîtibû. Çi ciwan çi jî kal[25] tu kes nemabû û tu kesê ku alîkariya Îsraîlê bike tunebû.

²⁷Xudan nexwest navê Îsraîlê ji ser rûyê erdê rake. Wî ew bi destê Yarovamê kurê Yehoaş rizgar kir.

²⁸Qewimînên din ên di padîşahiya Yarovam de û hemû kirinên wî, serketinên şer, jinûvestandina wî ya Şamê û Hamata Cihûdayê ji Îsraîlê, di Nivîsa Qewimînên Padîşahên Îsraîlê de hatine nivîsandin.

²⁹Ew mir û gihîşt bav û kalên xwe yên padîşahên Îsraîlê. Kurê wî Zekeriya li cihê wî bû padîşah.