Read Kurmanji Încîl Padîşah II, 15 Bible Online

Padîşah II, 15 - Kurmanji Încîl bible

Padîşah II, 15

¹Di bîst û heft saliya padîşahiya Yarovamê Padîşahê Îsraîlê de, Ezaryayê kurê Amatsya bû Padîşahê Cihûdayê.

²Gava Ezarya bû padîşah şanzdeh salî bû. Wî li Orşelîmê pêncî û du salan padîşahî kir. Dayika wî Yexolyaya Orşelîmî bû.

³Wî wekî Amatsyayê bavê xwe tiştên di çavê Xudan de rast in, kirin.

⁴Lê wî bi tenê bilindciyên perizînê ji holê ranekirin. Gel hê jî li bilindciyan qurban serjê dikirin û bixûr pêdixistin.

⁵Xudan bi kotîbûnê li padîşah xist ku heta roja mirina wî jî ew kotîbûyî ma û li maleke cuda rûnişt. Yotamê kurê padîşah, serweriya qesrê û gelê welêt kir.

⁶Qewimînên din ên di padîşahiya Ezarya de û hemû kirinên wî, di Nivîsa Qewimînên Padîşahên Cihûdayê de hatine nivîsandin.

⁷Ew mir û gihîşt bav û kalên xwe. Wan ew li Bajarê Dawid, li ba pêşiyên xwe veşart. Kurê wî Yotam li cihê wî bû padîşah.

⁸Di sî û heşt saliya padîşahiya Ezaryayê Padîşahê Cihûdayê de, Zekeriyayê kurê Yarovam li Sameryayê li ser Îsraîlê bû padîşah. Zekeriya şeş mehan padîşahî kir.

⁹Wekî bav û kalên xwe, wî tiştên di çavê Xudan de xerab in, kirin. Wî ji gunehên ku Yarovamê kurê Nevat bi Îsraîlê dabû kirin, xwe neda alî.

¹⁰Şallûmê kurê Yavêş fen lê kir û li ber gelê wî lê xist. Wî ew kuşt û li cihê wî bû padîşah.

¹¹Qewimînên din ên di padîşahiya Zekeriya de, di Nivîsa Qewimînên Padîşahên Îsraîlê de hatine nivîsandin.

¹²Peyva Xudan ku wî ji Yêhû re gotibû ev e: «Wê ziriyeta te, çar nifş li ser textê Îsraîlê rûne.» Wisa jî bû.

¹³Şallûmê kurê Yavêş, di sî û neh saliya padîşahiya Ûzziyayê Padîşahê Cihûdayê de bû padîşah. Wî mehekê li Sameryayê padîşahî kir.

¹⁴Menahêmê kurê Gadî ji Tîrsayê derket û hat Sameryayê. Li wir li Şallûmê kurê Yavêş xist. Wî ew kuşt û li cihê wî bû padîşah.

¹⁵Qewimînên din ên di padîşahiya Şallûm de û fena wî, di Nivîsa Qewimînên Padîşahên Îsraîlê de hatine nivîsandin.

¹⁶Wê demê Menahêm ji bajarê Tîrsayê heta bajarê Tîfsahê êrîş kir û kî ket ber kuşt. Wan dergehê bajêr jê re venekiribûn. Wî jî li bajêr xist û zikên hemû jinên bi zaro qelaştin.

¹⁷Di sî û neh saliya padîşahiya Ezaryayê Padîşahê Cihûdayê de, Menahêmê kurê Gadî li Sameryayê li ser Îsraîlê bû padîşah. Wî deh salan padîşahî kir.

¹⁸Menahêm tiştên di çavê Xudan de xerab in, kirin. Di hemû rojên xwe de, ji gunehên ku Yarovamê kurê Nevat bi Îsraîlê dabû kirin, xwe neda alî.

¹⁹Padîşahê Aşûrê Tîglat-Pîleser[26] bi ser welatê Îsraîlê ve hat. Menahêm hezar telant[27] zîv da Tîglat-Pîleser ku pişta wî bigire û padîşahiya di destê xwe de xurt bike.

²⁰Menahêm ji hemû dewlemendên Îsraîlê, ji serê her kesî pêncî şekel[28] zîv stand û da Padîşahê Aşûrê. Li ser vê yekê Padîşahê Aşûrê li wir nema û vegeriya.

²¹Qewimînên din ên di padîşahiya Menahêm de û hemû kirinên wî, di Nivîsa Qewimînên Padîşahên Îsraîlê de hatine nivîsandin.

²²Ew mir û gihîşt bav û kalên xwe. Kurê wî Peqahya li cihê wî bû padîşah.

²³Di pêncî saliya padîşahiya Ezaryayê Padîşahê Cihûdayê de, Peqahyayê kurê Menahêm li Sameryayê li ser Îsraîlê bû padîşah. Peqahya du salan padîşahî kir.

²⁴Wî tiştên di çavê Xudan de xerab in, kirin. Wî ji gunehên ku Yarovamê kurê Nevat bi Îsraîlê dabû kirin, xwe neda alî.

²⁵Peqahê kurê Remalyayê ku fermandarekî wî ye, tevî pêncî zilamên Gîladî li dijî wî fen kir. Li birca qesra padîşah a li Sameryayê, tevî Argov û Arye lê xist û ew kuşt. Peqah li cihê wî bû padîşah.

²⁶Qewimînên din ên di padîşahiya Peqahya de û hemû kirinên wî, di Nivîsa Qewimînên Padîşahên Îsraîlê de hatine nivîsandin.

²⁷Di pêncî û du saliya padîşahiya Ezaryayê Padîşahê Cihûdayê de, Peqahê kurê Remalya li Sameryayê, li ser Îsraîlê bû padîşah. Peqah bîst salan padîşahî kir.

²⁸Wî tiştên di çavê Xudan de xerab in, kirin. Xwe ji gunehên ku Yarovamê kurê Nevat bi Îsraîlê dabû kirin, neda alî.

²⁹Di rojên Peqahê Padîşahê Îsraîlê de, Tîglat-Pîleserê Padîşahê Aşûrê hat û bajarên Îyonê, Avêl-Bêtmaexayê, Yanoahê, Qedeşê, Hasorê û herêmên Gîladê, Celîleyê û seranserê diyarê Nefteliyê desteser kir û ew sirgûnê Aşûrê kirin.

³⁰Hoşêyayê kurê Ela fen li Peqahê kurê Remalya kir, lêxist û ew kuşt. Di bîst saliya padîşahiya Yotamê kurê Ûzziya de, li cihê wî bû padîşah.

³¹Qewimînên din ên di padîşahiya Peqah de û hemû kirinên wî, di Nivîsa Qewimînên Padîşahên Îsraîlê de hatine nivîsandin.

³²Di du saliya padîşahiya Peqahê kurê Remalyayê Padîşahê Îsraîlê de, Yotamê kurê Ûzziya bû Padîşahê Cihûdayê.

³³Gava Yotam bû padîşah bîst û pênc salî bû. Wî li Orşelîmê şanzdeh salan padîşahî kir. Dayika wî Yerûşaya keça Sadoq bû.

³⁴Wî jî wekî Ûzziyayê bavê xwe tiştên di çavê Xudan de rast in, kirin.

³⁵Lê wî bi tenê bilindciyên perizînê ji holê ranekirin. Gel hê jî li bilindciyan qurban serjê dikirin û bixûr pêdixistin. Yotam Dergehê Jorîn ê Mala Xudan çêkir.

³⁶Qewimînên din ên di padîşahiya Yotam de û kirinên wî, di Nivîsa Qewimînên Padîşahên Cihûdayê de hatine nivîsandin.

³⁷Wan rojan Xudan kir ku Resînê Padîşahê Aramê û Peqahê kurê Remalya bi ser Cihûdayê ve werin.

³⁸Yotam mir û gihîşt bav û kalên xwe. Ew li Bajarê Dawidê bavkalê xwe, li ba pêşiyên xwe hat veşartin. Kurê wî Ahaz li cihê wî bû padîşah.