Read Kurmanji Încîl Padîşah II, 16 Bible Online

Padîşah II, 16 - Kurmanji Încîl bible

Padîşah II, 16

¹Di hivdeh saliya padîşahiya Peqahê kurê Remalya de, Ahazê kurê Yotam bû Padîşahê Cihûdayê.

²Gava Ahaz bû padîşah bîst salî bû. Wî li Orşelîmê şanzdeh salan padîşahî kir. Ahaz wekî bavkalê xwe Dawid tiştên di çavê Xwedayê xwe Xudan de rast in, nekirin.

³Ew di riya padîşahên Îsraîlê de meşiya. Li gorî kirêtiyên gelên ku Xudan ew li ber Îsraîliyan qewirandibûn, rabû kurê xwe jî di êgir de kir qurban.

⁴Li bilindciyên perizînê, li ser giran û li bin her dara şîn wî qurban serjê dikirin û bixûr pêdixistin.

⁵Wê demê Resînê Padîşahê Aramê û Padîşahê Îsraîlê Peqahê kurê Remalya ji bo şer çûn Orşelîmê û Ahaz dorpêç kir. Lê wan ew têk nebir.

⁶Di vê navberê de, Resînê Padîşahê Aramê, Eylatê bi paş ve stand û Cihûyan ji Eylatê derxistin. Edomî ketin Eylatê û heta niha jî ew tê de ne.

⁷Ahaz ji Tîglat-Pîleserê Padîşahê Aşûrê re, qasid şand û got: «Ez xulamê te û kurê te me. Were min ji destên Padîşahê Aramê û Padîşahê Îsraîlê rizgar bike ku li dijî min serî rakirine.»

⁸Ahaz zêr û zîvên di Mala Xudan û xezîneyên qesra padîşah de standin ji Padîşahê Aşûrê re wek diyarî şandin.

⁹Padîşahê Aşûrê guhdariya wî kir. Berê xwe da Şamê û bajar bi dest xist. Paşê xelkê wê derê sirgûnê bajarê Qîrê kir, Resîn jî kuşt.

¹⁰Ahazê Padîşah ji bo Tîglat-Pîleserê Padîşahê Aşûrê pêşwazî bike, çû Şamê û gorîgeha li Şamê dît. Ahazê Padîşah li gorî her karê gorîgehê şêwe û mestera wê, ji Ûriyayê Kahin re şand.

¹¹Ûriyayê Kahin gorîgehek çêkir, li gorî her tiştên ku Ahazê Padîşah ji Şamê şandibû, heta Ahaz ji Şamê hat wisa kir.

¹²Gava padîşah ji Şamê hat, gorîgeh dît. Ew nêzîkî gorîgehê bû û li ser wê pêşkêşî dan.

¹³Wî qurbana şewitandinê kir, pêşkêşiya dexlê û ya rijandinê da û xwîna qurbanên aştiyê bi ser gorîgehê ve reşand.

¹⁴Gorîgeha tûncîn a li ber Xudan, ji pêşiya Malê ku di navbera gorîgeha nû û Mala Xudan de ye, anî û danî bakurê gorîgeha xwe.

¹⁵Ahazê Padîşah emir da Ûriyayê Kahin û got: «Li ser gorîgeha mezin, qurbana şewitandinê ya sibê, pêşkêşiya dexlê ya êvarê, pêşkêşiyên padîşah a şewitandinê û dexlê, bi qurbana şewitandinê ya tevahiya gelê welêt û pêşkêşiyên wan a dexlê û rijandinê re pêşkêş bikin. Piştre tevahiya xwîna qurbanên şewitandinê û tevahiya xwîna qurbanên din, li ser vê gorîgehê bireşînin. Lê gorîgeha tûncîn, ji bo ku ez rojên pêş bizanibim, wê ya min be.»

¹⁶Ûriyayê Kahin, her tiştê ku Ahazê Padîşah emir kir pêk anî.

¹⁷Ahazê Padîşah, lewheyên kêleka binikên ku teştên li Perestgehê li ser rûniştî ne, jê kirin û teşt jî rakirin. Wî hewza li ser gayên tûncîn anî xwarê û danî ser erdekî kevirîn.

¹⁸Ji bo xatirê Padîşahê Aşûrê, dika kursiyê padîşah ê li Mala Xudan hatiye danîn[29] rakir û deriyê taybet girt ku padîşah jê diket perestgehê.

¹⁹Qewimînên din ên di padîşahiya Ahaz de û kirinên wî, di Nivîsa Qewimînên Padîşahên Cihûdayê de hatine nivîsandin.

²⁰Ew mir û gihîşt bav û kalên xwe. Li Bajarê Dawid, li ba pêşiyên xwe hat veşartin. Kurê wî Hîzqiya li cihê wî bû padîşah.