Read Kurmanji Încîl Padîşah II, 20 Bible Online

Padîşah II, 20 - Kurmanji Încîl bible

Padîşah II, 20

¹Di wan rojan de Hîzqiya nexweş ket û li ber mirinê bû. Îşayayê Pêxemberê kurê Amots hat ba wî û got: «Xudan wiha dibêje: ‹Wesiyetê li mala xwe bike, çimkî tê bimirî. Tê baş nebî.›»

²Hîzqiya berê xwe da dîwêr, ji Xudan re dua kir û got:

³«Ax, ya Xudan, lava dikim bîne bîra xwe ku çawa bi te re bi dilsozî, ji dil û can meşiyam û tiştên di çavê te de qenc in kirin.» Piştre Hîzqiya bi dilekî şewat giriya.

⁴Hê Îşaya ji hewşa navîn derneketibû, peyva Xudan jê re hat û got:

⁵«Vegere û ji Hîzqiyayê serwerê gelê min re bêje: ‹Xwedayê bavkalê te Dawid Xudan wiha dibêje: Min duaya te bihîst, min hêsirên çavên te dîtin. Ezê esse te sax bikim. Tê di roja sisiyan de herî Mala Xudan.

⁶Ezê panzdeh salan bixim ser rojên te û ezê te û vî bajarî ji destê Padîşahê Aşûrê rizgar bikim. Ezê vî bajarî ji bo xwe û xatirê xulamê xwe Dawid biparêzim.›»

⁷Îşaya got: «Bila bastîqê hejîran bînin.» Anîn danîn ser kunêra wî û ew baş bû.

⁸Hîzqiya ji Îşaya re got: «Nîşana ku wê Xudan min sax bike û ezê di roja sisiyan de herim Mala Xudan, wê çi be?»

⁹Îşaya got: «Ji bo te nîşana ku Xudan soza xwe pêk bîne ev e: Bila siya rojê, deh derence dirêj be yan deh derence kurt be?»

¹⁰Hîzqiya got: «Deh derence dirêjbûna siyê hêsantir e, bila deh derence kurt be.»

¹¹Li ser vê yekê Îşayayê Pêxember ji Xudan lava kir. Xudan siya ji derenceyên Ahaz berjêr bibû, deh derence kurt kir.

¹²Wê demê Merodak-Baladanê kurê Baladanê Padîşahê Babîlê, ji Hîzqiya re name û diyariyek şandin. Çimkî wî bihîstibû ku Hîzqiya nexweş ketiye.

¹³Hîzqiya qasid qebûl kirin û tevahiya mala tiştên hêja, zêr û zîv, biharat û rûnê bêhnxweş, cebilxane, hemû tiştên odeyên xezîneya xwe nîşanî wan da. Tiştek li qesir û tevahiya welatê wî nema ku Hîzqiya nîşanî wan neda.

¹⁴Îşayayê Pêxember hat ba Hîzqiyayê Padîşah û jê re got: «Van zilaman çi gotin? Ji ku derê hatine ba te?» Hîzqiya got: «Ji welatekî dûr, ji Babîlê hatine.»

¹⁵Îşaya got: «Li qesra te çi dîtin?» Hîzqiya got: «Her tiştên di qesra min de heye dîtin, tiştek nema ku min ji xezîneyên xwe nîşanî wan neda.»

¹⁶Îşaya ji Hîzqiya re got: «Li peyva Xudan guhdarî bike.

¹⁷Xudan dibêje: ‹Wê ew roj were ku hemû tiştên di qesra te de û hemû tiştên heta niha bav û kalên te dane hev, wê bibin Babîlê. Wê tu tişt nemîne.

¹⁸Hinek ji kurên te, yên ji bedena te çêbin, wê bibin û li qesra Padîşahê Babîlê nemêr bikin.›»

¹⁹Hîzqiya ji Îşaya re got: «Peyva Xudan a ku tu dibêjî baş e.» Çimkî di dilê xwe de digot: «Çi ji min re! Jixwe wê di rojên min de aştî û ewlehî pêk bê.»

²⁰Qewimînên din ên di padîşahiya Hîzqiya de, hemû serketinên wî, çawa hewiz û coya binerdî çêkirin û av anî bajêr, di Nivîsa Qewimînên Padîşahên Cihûdayê de hatine nivîsandin.

²¹Ew mir û gihîşt bav û kalên xwe. Kurê wî Minaşşe li cihê wî bû padîşah.