Read Kurmanji Încîl Padîşah II, 21 Bible Online

Padîşah II, 21 - Kurmanji Încîl bible

Padîşah II, 21

¹Gava Minaşşe bû padîşah duwanzdeh salî bû. Wî li Orşelîmê pêncî û pênc salan padîşahî kir. Dayika wî Hefsîvah bû.

²Wî tiştên di çavê Xudan de xerab in kirin. Wî tiştên kirêt ên miletên ku Xudan li ber Îsraîliyan qewirandin, kirin.

³Bilindciyên perizînê ku bavê wî Hîzqiya hilweşandibûn, wî ji nû ve ava kirin. Çawa ku Ahavê Padîşahê Îsraîlê kiribû, ji bo Baal gorîgeh ava kirin û pûtekî Aşêrayê çêkir. Herwiha li ber tevahiya nexşên ezmanan çû ser çokan.

⁴Li Mala Xudan gorîgeh çêkirin ku Xudan gotibû: «Wê navê min di Orşelîmê de be.»

⁵Lê li herdu hewşên Mala Xudan jî ji bo tevahiya nexşên ezmanan gorîgeh çêkirin.

⁶Kurê xwe di êgir de kir qurban. Wî sêrbazî û remildarî kir. Cinbaz û kesên bi ruhan dişêwirîn bikar anî. Wî gelek tiştên di çavê Xudan de xerab in kirin û Xudan hêrs kir.

⁷Minaşşe pûtê Aşêrayê yê qewartî ku wî çêkir, xist nava wê malê ku li ser wê Xudan ji Dawid û kurê wî Silêman re gotibû: «Li vê malê û li Orşelîma ku min ji hemû eşîrên Îsraîl hilbijartibûn, wê navê min heta hetayê bimîne.

⁸Heger bi tenê ew miqate bin ku li gorî her tiştên min li wan emir kiriye û li gorî tevahiya Şerîeta xulamê min Mûsa li wan emir kiriye bikin, ezê piyên Îsraîliyan, ji welatê ku min daye bav û kalên wan tu carî eware nekim.»

⁹Wan guh neda vê yekê. Minaşşe ew ji rê derxistin ku wan ji gelên ku Xudan ew li ber Îsraîliyan helak kirin, zêdetir xerabî kirin.

¹⁰Xudan bi riya xulamên xwe yên pêxember got:

¹¹«Ji ber ku Minaşşeyê Padîşahê Cihûdayê wan ev tiştên kirêt kirine, ji tiştên Amoriyên beriya xwe bêtir xerabî kirine û bi pûtên xwe bi Cihûdayê dabû gunehkirin,

¹²Xwedayê Îsraîl Xudan wiha dibêje: ‹Ezê xerabiyeke wisa bînim serê Cihûda û Orşelîmê ku kesên bibihîzin, wê zingînî ji herdu guhên wan bê.

¹³Li ser Orşelîmê tayê pîvanê yê Sameryayê û şaqula Mala Ahav ezê vezelînim û çawa ku zilamek firaqekî paqij dike û deverû dike, ezê jî Orşelîmê wisa bikim.

¹⁴Ezê mîrasa min a mayî biterikînim û wan bidim destê dijminên wan. Ewê jî ji bo hemû neyarên xwe bibin malê talên.

¹⁵Çimkî ji çaxê bav û kalên wan ji Misrê derketine heta niha, wan tiştên di çavê min de xerab in kirin û ez hêrs kirim.›»

¹⁶Minaşşe ne bi tenê bi Cihûdayê tiştên di çavê Xudan de xerab in, da kirin, wî herwiha ewqas xwîna bêsûcan rijand ku Orşelîmê ji seriyekî heta seriyê din tije kir.

¹⁷Qewimînên din ên di padîşahiya Minaşşe de, hemû kirin û gunehên wî, di Nivîsa Qewimînên Padîşahên Cihûdayê de hatine nivîsandin.

¹⁸Ew mir û gihîşt bav û kalên xwe. Li bexçeyê qesra xwe — ango li bexçeyê Ûzza — hate veşartin. Kurê wî Amon li cihê wî bû padîşah.

¹⁹Gava Amon bû padîşah bîst û du salî bû. Wî li Orşelîmê du salan padîşahî kir. Dayika wî Meşûllemeta keça Harûsê Yotvayî bû.

²⁰Amon wekî Minaşşeyê bavê xwe tiştên di çavê Xudan de xerab in kirin.

²¹Wî da ser tevahiya riya bavê xwe. Ew perizî pûtên ku bavê wî perizîbû û li ber wan deverû çû erdê.

²²Riya Xudan Xwedayê bav û kalên xwe berda. Li ser riya Xudan nemeşiya.

²³Xulamên Amon fen lê kir û wan ew li qesra wî kuşt.

²⁴Gelê welêt jî rabû û hemû kesên fen lê kiriye, kuştin. Wan Yoşiyayê kurê wî, li cihê wî kir padîşah.

²⁵Qewimînên din ên di padîşahiya Amon de û kirinên wî, di Nivîsa Qewimînên Padîşahên Cihûdayê de hatine nivîsandin.

²⁶Ew li bexçeyê Ûzza di gora xwe de hat veşartin. Kurê wî Yoşiya li cihê wî bû padîşah.