Read Kurmanji Încîl Padîşah II, 24 Bible Online

Padîşah II, 24 - Kurmanji Încîl bible

Padîşah II, 24

¹Di rojên wî de Nebûxadnessarê Padîşahê Babîlê hat û Yehoyaqîm sê salan bû xulamê wî. Lê Yehoyaqîm rabû li dijî wî serî hilda.

²Xudan rêbirên Kildanî, rêbirên Aramî, rêbirên Moavî û rêbirên Ammoniyan bi ser wî de şandin. Li gorî peyva Xudan ku bi riya xulamên xwe pêxemberan hatiye, wî ew bi ser wî de şandin ku Cihûdayê helak bikin.

³Bi rastî ev tişt bi fermana Xudan hat serê Cihûdayê ku ji ber çavê xwe rake. Ji ber tevahiya gunehên Minaşşe

⁴û xwîna bêsûcan ku wî rijand, ev hat serê wî. Çimkî wî Orşelîmê bi xwîna bêsûcan dagirt. Loma Xudan nexwest wî bibexişîne.

⁵Qewimînên din ên di padîşahiya Yehoyaqîm de û hemû tiştên kirine di Nivîsa Qewimînên Padîşahên Cihûdayê de hatine nivîsandin.

⁶Ew mir û gihîşt bav û kalên xwe. Kurê wî Yehoyaxîn li cihê wî bû padîşah.

⁷Padîşahê Misrê, careke din ji welatê xwe derneket. Çimkî Padîşahê Babîlê, ji Newala Misrê heta Çemê Firatê, her tiştên wî jê standin.

⁸Gava Yehoyaxîn bû padîşah hijdeh salî bû. Wî li Orşelîmê sê mehan padîşahî kir. Dayika wî Nehûştaya keça Êlnatanê Orşelîmî bû.

⁹Wî wekî hemû tiştên bavê wî kirin, tiştên di çavê Xudan de xerab in kirin.

¹⁰Wê demê fermandarên Nebûxadnessarê Padîşahê Babîlê hatin ser Orşelîmê û bajar dorpêç kir.

¹¹Gava wan bajar dorpêç dikir, Nebûxadnessarê Padîşahê Babîlê jî hat.

¹²Yehoyaxînê Padîşahê Cihûdayê, dayika wî, xulam, serek û karmendên qesra wî teslîmî Padîşahê Babîlê bûn. Di heşt saliya padîşahiya xwe de, Nebûxadnessar ew dîl girt.

¹³Wekî Xudan gotiye, Nebûxadnessar tevahiya xezîneyên li Mala Xudan û li qesra padîşah birin. Wî hemû taximên zêr ên di Perestgeha Xudan de perçe perçe kirin ku Silêmanê Padîşahê Îsraîlê ew çêkiribûn.

¹⁴Wî tevahiya gelê Orşelîmê, tevahiya serek û mêrxasên wêrek, tevahiya hoste û hesinkaran sirgûn kirin ku hejmara wan deh hezar bû. Li welêt ji bilî belengazan kesek nema.

¹⁵Padîşahê Babîlê, Yehoyaxîn sirgûnê Babîlê kir. Dayika padîşah, jinên padîşah, karmendên wî û serekên welêt jî ji Orşelîmê sirgûnê Babîlê kirin.

¹⁶Ji bilî wan, Nebûxadnessar heft hezar mêrxas û hezar kesên hoste û hesinkarên şerkerên wêrek, sirgûnê Babîlê kirin.

¹⁷Padîşahê Babîlê, Mattanyayê mamê Yehoyaxîn li cihê wî kir padîşah û navê wî kir Sîdqiya.

¹⁸Gava Sîdqiya bû padîşah, bîst û yek salî bû. Sîdqiya li Orşelîmê yanzdeh salan padîşahî kir. Dayika wî, Hamûtala keça Yêremyayê Lîvnayî bû.

¹⁹Wekî hemû tiştên Yehoyaqîm kirin, wî tiştên di çavê Xudan de xerab in kirin.

²⁰Hêrsa Xudan li dijî Orşelîm û Cihûdayê ewqas rabû ku wî ew ji çavê xwe avêtin. Sîdqiya li dijî Padîşahê Babîlê serî rakir.