Read Kurmanji Încîl Padîşah II, 25 Bible Online

Padîşah II, 25 - Kurmanji Încîl bible

Padîşah II, 25

¹Di roja dehê meha dehan a neh saliya padîşahiya Sîdqiya de, Nebûxadnessarê Padîşahê Babîlê bi tevahiya artêşa xwe re hat ser Orşelîmê û artêşgeh ava kir. Li ber sûrên wê pal çêkirin.

²Heta yanzdeh saliya padîşahiya Sîdqiyayê Padîşah, bajar dorpêçkirî ma.

³Di roja nehê meha çaran de, li bajêr xela dijwar bû û ji bo gelê welêt nan nema.

⁴Di dîwarên bajêr de qulek hat vekirin. Tevî ku Kildaniyan seranserê bajêr dorpêç jî kiribû, padîşah bi şev bi tevahiya leşkeran re, ji dergehê di navbera herdu dîwarên li ber bexçeyê padîşah re ber bi Eravayê ve reviya.

⁵Lê artêşa Kildaniyan da pey padîşah, li nêzîkî deştên Erîhayê gihîşt Sîdqiya. Tevahiya artêşa wî terka wî kir û belav bû.

⁶Wan Sîdqiyayê Padîşah girt û bir Rîvlayê, ba Padîşahê Babîlê û wî ew dadgeh kir.

⁷Kurên Sîdqiya li ber çavên wî serjê kirin, çavên wî jî derxistin. Wan ew bi zincîrên tûncîn ve girê da û bir Babîlê.

⁸Di roja heftê meha pêncan a nozdeh saliya padîşahiya Nebûxadnessarê Padîşahê Babîlê de, Nebûzaradanê Fermandarê Parêzvanan, xulamê Padîşahê Babîlê ket Orşelîmê.

⁹Wî agir berda Mala Xudan, qesra padîşah û tevahiya malên Orşelîmê. Tevahiya malên mezin şewitandin.

¹⁰Tevahiya artêşa Kildaniyan ku bi fermandarê parêzvanan re ne, dîwarên Orşelîmê jî hilweşandin.

¹¹Nebûzaradanê Fermandarê Parêzvanan, kesên di bajêr de sax mane û leşkerên firar ên derbasî aliyê Padîşahê Babîlê bûne sirgûn kirin. Wî tevahiya gelê mayî ajot.

¹²Lê fermandarê parêzvanan hinek belengazên welêt hiştin ku bibin rezvan û cotkar.

¹³ Kildaniyan stûnên tûnc, tevî hewza tûncîn û binikan ên li Mala Xudan perçe kirin û tûncên wan birin Babîlê.

¹⁴Sîtil, bêr, meqesên fitîlan, firaxê bixûrê û hemû taximên tûncîn ên li Perestgehê dihatin bikaranîn, birin.

¹⁵Bixûrdank û tas jî birin. Fermandarê parêzvanan tiştên zêrîn, ji bo zêr û tiştên zîvîn jî, ji bo zîv birin.

¹⁶Tevahiya tûncê du stûnan, hewzek û binikên ku Silêman ji bo Mala Xudan çêkiribûn jî, nedihat kişandin.

¹⁷Dirêjbûna stûnekê hijdeh gaz[37] bû. Serikekê wê yê tûncîn hebû û bilindahiya serik jî sê gaz[38] bû. Li dora serik, toreke pêçayî û şiklên hinaran hebûn ku hemû ji tûncê bûn. Xemla herdu stûnan yek bû û bi şeklê torê hatibûn nexişandin.

¹⁸Fermandarê parêzvanan, Serayayê Serkahin, Sefanyayê kahinê diduyan û sê dergevan dîl girtin.

¹⁹Ji bajêr fermandarê ku serweriya leşkeran dikirin û pênc zilamên li bajêr yên ji şêwirmendên padîşah, serleşkerê ku gelê welêt ji bo leşkeriyê dinivîsandin û ji gelê welêt yên ku li bajêr bûn, şêst kes birin.

²⁰Nebûzaradanê Fermandarê Parêzvanan ew birin Rîvlayê, ba Padîşahê Babîlê.

²¹Padîşahê Babîlê li welatê Hamatê, li Rîvlayê li wan xist û ew kuştin. Bi vî awayî Cihûda, ji welatê xwe hat sirgûnkirin.

²²Nebûxadnessarê Padîşahê Babîlê, Gedalyayê kurê Ahîqamê kurê Şafan li ser kesên li welatê Cihûdayê hiştibûn, kir walî.

²³Gava tevahiya fermandar û zilamên wan bihîst ku Padîşahê Babîlê, Gedalya kiriye walî, hatin Mîspayê, ba Gedalya. Îsmaîlê kurê Netanya, Yohananê kurê Qarêah, Serayayê kurê Tanhûmetê Netofayî, Yaazanyayê kurê Maexa û zilamên wan hatin.

²⁴Gedalya ji wan re û ji zilamên wan re sond xwar û got: «Ji serekên Kildaniyan netirsin. Li welêt rûnin, xulamiya Padîşahê Babîlê bikin û wê ji bo we baş be.»

²⁵Di meha heftan de, Îsmaîlê kurê Netanyayê kurê Êlîşamayê ku ji ziriyeta padîşah e, bi deh kesên din re hat. Wan li Gedalya xist. Ew tevî Cihûdayî û Kildaniyên ku li Mîspayê li ba wî bûn, mirin.

²⁶Tevahiya gel, ji biçûkan bigire heta mezinan û fermandarên artêşan rabûn çûn Misrê. Çimkî ji Kildaniyan ditirsiyan.

²⁷Di sî û heft saliya sirgûna Yehoyaxînê Padîşahê Cihûdayê de, di roja bîst û heftê meha duwanzdehan de ku sala ew bûbû padîşah, Ewîl-Merodakê Padîşahê Babîlê, Yehoyaxînê Padîşahê Cihûdayê ji girtîgehê derxist.

²⁸Tiştên xweş jê re gotin û textê wî, ji textên padîşahên li Babîlê pê re ne, bilindtir danî.

²⁹Yehoyaxîn kincên xwe yên girtîgehê avêtin. Wî di tevahiya jiyana xwe ya mayî de, li hizûra Padîşahê Babîlê, tevî wî nan xwar.

³⁰Heta sax bû, her roj xwarina wî ji hêla padîşah ve hate dayîn.