Read Kurmanji Încîl Padîşah II, 8 Bible Online

Padîşah II, 8 - Kurmanji Încîl bible

Padîşah II, 8

¹Êlîşa ji jina ku kurê wê ji mirinê rakiribû re gotibû: «Rabe tu bi maliyên xwe re here û li devera tê bikarî lê bibî mêvan, bibe mêvan. Çimkî Xudan heft salan li ser welêt kir xela.»

²Jinik bi gotina zilamê Xwedê kir. Ew tevî maliyên xwe çû û li welatê Filîstiyan heft salan bû mêvan.

³Piştî heft salan jinik ji welatê Filîstiyan vegeriya. Rabû çû ji bo mal û zeviyê xwe ji padîşah lava kir.

⁴Di vê navberê de padîşah bi Gêhazî xulamê zilamê Xwedê re dipeyivî û jê re digot: «De ka ji min re behsa hemû karên mezin ên Êlîşa bike.»

⁵Gava wî behsa Êlîşa dikir bê çawa miriyekî rakiriye ser piyan, jinika ku kurê wê ji mirinê hişyar kiribû, ji bo mal û zeviyê xwe, lava ji padîşah kir. Gêhazî got: «Xweyê min padîşah, jina ku min behs dikir ev e. Kurikê li ba wê jî, ew kurik e ku Êlîşa ji mirinê rakiribû.»

⁶Li ser pirsa padîşah jinikê jê re got. Padîşah gazî karmendekî kir û ev emir dayê: «Her tiştê wê, ji roja ku wê welatê xwe berdaye heta niha, hemû berê zeviya wê lê vegerînin.»

⁷Êlîşa hat Şamê. Padîşahê Aramê Ben-Hadad nexweş bû. Jê re hat gotin ku zilamê Xwedê hatiye vir.

⁸Padîşah ji Hazaêl re got: «Diyariyekê bide destê xwe û here pêşiya zilamê Xwedê û bi riya wî ji Xudan bipirse û bêje: ‹Gelo ezê ji vê nexweşiyê baş bibim an na?›»

⁹Hazaêl çû pêşwaziya wî, wekî diyarî jê re bi barê çil deveyan tiştên herî baş ên Şamê birin, hat li pêşiya wî sekinî û got: «Kurê te, Ben-Hadadê Padîşahê Aramê ez şandim ba te ku bipirsim: ‹Gelo ezê ji vê nexweşiyê baş bibim an na?›»

¹⁰Êlîşa jê re got: «Here jê re bêje: ‹Tê esse baş bibî.› Lê Xudan diyar kir ku wê esse bimire.»

¹¹Êlîşa wisa kûr û dûr lê mêze kir ku Hazaêl şerm kir. Paşê zilamê Xwedê giriya.

¹²Hazaêl got: «Ezbenî, tu çima digirî?» Êlîşa got: «Çimkî ez zanim tê çi xerabiyê bînî serê Îsraîliyan. Tê êgir bi sûrên wan bixî û xortên wan ên bijare bi şûran bikujî. Tê zarokên wan li erdê bixî û perçe bikî. Tê zikên jinên bi zaro jî biqelişînî.»

¹³Hazaêl got: «Ez xulamê te çi se me ku van tiştên xerab bikim?» Êlîşa got: «Xudan nîşanî min da ku tê bibî Padîşahê Aramê.»

¹⁴Hazaêl ji ba Êlîşa rabû hat ba xweyê xwe. Ben-Hadad jê re pirsî: «Êlîşa çi ji te re got?» Hazaêl got: «Wî got ku tê esse baş bijî.»

¹⁵Dotira rojê Hazaêl, çarşefekê şil kir, danî ser rûyê wî û ew xeniqand. Hazaêl li cihê wî bû padîşah.

¹⁶Di pênc saliya padîşahiya Yoramê kurê Ahavê Padîşahê Îsraîlê de — wî çaxî Yehoşafatê Padîşahê Cihûdayê bû — Yehoramê kurê Yehoşafat bû Padîşahê Cihûdayê.

¹⁷Gava Yehoram bû padîşah, sî û du salî bû. Wî li Orşelîmê heşt salan padîşahî kir.

¹⁸Wekî Mala Ahav, wî jî da ser riya padîşahên Îsraîlê, çimkî jina wî keça Ahav bû. Wî tiştên di çavê Xudan de xerab in kirin.

¹⁹Lê ji bo xatirê xulamê xwe Dawid, Xudan nexwest Cihûdayê helak bike. Çimkî wî soz dabû wî û ziriyeta wî ku ronahiyeke herheyî bide wan.

²⁰Di rojên wî de Edomê serî hilda, ji bin destê Cihûdayê derket û li ser xwe padîşahek diyar kir.

²¹Li ser vê yekê Yehoram bi hemû erebeyên şer çû Saîrê. Edomî û fermandarên erebevanên wan dor lê pêça bûn. Lê Yehoram bi şev rabû, li wan xist. Gel jî reviya çû konên xwe.

²²Bi vî awayî Edomî ji bin destê Cihûdayê derketin. Heta roja îro jî wiha ye. Lîvnayê jî wê demê wiha kir.

²³Qewimînên din ên di padîşahiya Yehoram de û hemû kirinên wî, di Nivîsa Qewimînên Padîşahên Cihûdayê de hatine nivîsandin.

²⁴Ew mir û gihîşt bav û kalên xwe. Li Bajarê Dawid, li ba pêşiyên xwe hat veşartin. Kurê wî Ahazya li cihê wî bû padîşah.

²⁵Di duwanzdeh saliya padîşahiya Yoramê kurê Ahavê Padîşahê Îsraîlê de, Ahazyayê kurê Yehoram bû Padîşahê Cihûdayê.

²⁶Gava Ahazya bû padîşah bîst û du salî bû. Wî li Orşelîmê salekê padîşahî kir. Dayika wî Etalyaya neviya Omriyê Padîşahê Îsraîlê bû.

²⁷Wî da ser riya Mala Ahav û çawa ku Mala Ahav kiribûn, wî jî tiştên di çavê Xudan de xerab in kirin. Çimkî ew zavayê Mala Ahav bû.

²⁸Ahazya tevî Yoramê kurê Ahav çû Ramot-Gîlad ku li dijî Padîşahê Aramê Hazaêl şer bike. Aramiyan Yoram birîndar kir.

²⁹Padîşah Yoram vegeriya Yîzreyêlê ku ji birînên xwe baş bibe ku gava li Ramayê li dijî Hazaêlê Padîşahê Aramê şer dikir, Aramiyan kiribûn. Ahazyayê kurê Padîşahê Cihûdayê Yehoram çû Yîzreyêlê ku Yoramê kurê Ahav bibîne. Çimkî ew birîndar bû.