Read Kurmanji Încîl Ezra 10 Bible Online

Ezra 10 - Kurmanji Încîl bible

Ezra 10

¹Gava Ezra li ber Mala Xwedê bi girîn xwe diavêt erdê, dua dikir û li gunehên xwe mikur dihat, komeke mezin ji jin, mêr û zarokên Îsraîlî li dor wî civiyan. Gel jî gelekî giriya.

²Şexanyayê kurê Yehiyêlê Elamî ji Ezra re got: «Me nedilsoziyê bi Xwedayê xwe kir û ji gelên welatên derdorê jinên xerîb ji xwe re anîn. Lê dîsa jî ji bo Îsraîl hêviyek heye.

³Niha li gorî şîreta te û kesên ji ber emrên Xwedayê me dilerizin, em bi Xwedayê xwe re peymanekê çêkin ku tevahiya van jin û zarokên ji wan dûr bixin. Bila ev peyman li gorî Şerîetê be.

⁴De rabe! Çimkî berpirsiyarê vê yekê tu yî. Em bi te re ne. Hêzdar be û pêk bîne.»

⁵Ezra rabû û serekên kahinan ên Lêwiyî û tevahiya Îsraîl da sondê ku li gorî vê yekê bikin. Wan jî sond xwar.

⁶Paşê Ezra ji Mala Xwedê rabû ket odeya Yehohananê kurê Êlyaşîv. Gava li wir ma ne nan xwar, ne jî av vexwar. Çimkî ji bo nedilsoziya sirgûniyan şînê dikir.

⁷Wan li sirgûniyan li seranserê Cihûda û Orşelîmê ragihandinek belav kir ku herkes li Orşelîmê bicive.

⁸Herwiha heger kesek di nav sê rojan de nehata, li ser biryara serek û rîspiyan, wê tevahiya malê xwe bida û ji koma sirgûniyan veqetiya.

⁹Paşê tevahiya mêrên li Cihûda û Binyamînê, di nav sê rojan de li Orşelîmê civiyan. Di roja bîstê meha nehan de tevahiya gel li meydana li ber Mala Xwedê rûnişt. Hem ji ber girîngiya kar, hem jî ji ber baranê herkes dilerizî.

¹⁰Ezrayê Kahin rabû û ji wan re got: «We ji xwe re jinên xerîb anîn. Loma we li dijî Xwedê nedilsozî kir û sûcên Îsraîlê jî zêde kirin.

¹¹Niha li sûcên xwe li ber Xwedayê bavkalên xwe Xudan mikur werin. Daxwaza wî pêk bînin û ji gelên welatên derdorê û jinên xerîb veqetin.»

¹²Tevahiya komê bi dengekî bilind bersiv da û got: «Emê hemû gotinên te pêk bînin.

¹³Lê gel zêde ye û dinya şilî ye. Em nikarin li derve bimînin. Ev yek jî ne karê rojek an du rojan e, çimkî di vî warî de gunehên me gelek in.

¹⁴Bila niha ji bo tevahiya civînê, serekên me tevahiya civînê temsîl bikin û ji bo ku hêrsa Xwedayê me ya dijwar ji ser me rabe, bila her kesê li bajarên me yên ku jinên xerîb anîne, di demên diyarkirî de tevî rîspî û hakimên bajarê wî were.»

¹⁵Bi tenê Yonatanê kurê Esahêl û Yahzeyayê kurê Tîqwa li dijî vê yekê derketin. Meşûllam û Şabbetayê Lêwiyî piştevaniya wan kirin.

¹⁶Kesên ji sirgûnê vegeriyan wiha kirin. Ezrayê Kahin li gorî binemalên wan bi navê wan serekên binemalan veqetandin. Di roja pêşî ya meha dehan de ji bo lêkolîna vî karî li hev rûniştin.

¹⁷Heta roja pêşî ya meha pêşî, lêkolîna li ser hemû mêrên ku bi jinên xerîb re zewicîne qedandin.

¹⁸Kesên ziriyeta kahinan ên ku bi jinên xerîb re zewicîbûn ev bûn: Ji ziriyeta Yêşûyê kurê Yosadaq û birayên wî, Maesêya, Êliyezer, Yarîv û Gedalya.

¹⁹Wan dest da hev ku jinên xwe berdin. Ji bo sûcdariyê wan wekî pêşkêşiya berdêlê, her yekî ji wan ji keriyê beranek pêşkêş kir.

²⁰Ji Îmmêriyan, Hananî û Zevadya bûn.

²¹Ji Harîmiyan, Maesêya, Êlyas, Şemaya, Yehiyêl û Ûzziya bûn.

²²Ji Paşhûriyan, Êlyoênay, Maesêya, Îsmaîl, Netanêl, Yozavad û Êlasa bûn.

²³Ji Lêwiyiyan, Yozavad, Şîmî, Qêlaya — Qelîta — Petahya, Cihûda û Êliyezer bûn.

²⁴Ji stranbêjan, Êlyaşîv bû. Ji dergevanan, Şallûm, Telem û Ûrî bûn.

²⁵Ji Îsraîliyên din jî ev bûn: Ramiya, Yîzziya, Malkiya, Miyamîn, Êlazar, Malkiya û Benaya yên ji Paroşiyan,

²⁶Mattanya, Zekeriya, Yehiyêl, Evdî, Yerêmot û Êlyas ên ji Elamiyan,

²⁷Êlyoênay, Êlyaşîv, Mattanya, Yerêmot, Zavad û Ezîza yên ji Zattûyiyan,

²⁸Yehohanan, Hananya, Zabbay û Etlay ên ji Bêvayiyan,

²⁹Meşûllam, Mallûk, Edaya, Yaşûv, Şeal û Yerêmot ên ji Baniyan,

³⁰Edna, Kelal, Benaya, Maesêya, Mattanya, Besalêl, Binnûy û Minaşşe yên ji Pahat-Moaviyan,

³¹Êliyezer, Yîşşiya, Malkiya, Şemaya, Şimûn,

³²Binyamîn, Mallûk û Şemarya yên ji Harîmiyan.

³³Mattenay, Mattatta, Zavad, Êlîfelet, Yerêmay, Minaşşe û Şîmî yên ji Haşûmiyan

³⁴û Maeday, Emram, Ûyêl,

³⁵Benaya, Bedeya, Kelûhû,

³⁶Wanya, Merêmot, Êlyaşîv,

³⁷Mattanya, Mattenay, Yaesay,

³⁸Banî, Binnûy, Şîmî,

³⁹Şelemya, Natan, Edaya,

⁴⁰Maxnadbay, Şaşay, Şaray,

⁴¹Ezarêl, Şelemya, Şemarya,

⁴²Şallûm, Amarya û Ûsiv ên ji Baniyan.

⁴³Yeiyêl, Mattîtya, Zavad, Zevîna, Yadday, Yoêl û Benaya yên ji Neboyiyan.

⁴⁴Tevahiya wan bi jinên xerîb re zewicî bûn. Hinek jî bi wan jinan re bûn xweyî zarok.