Read Kurmanji Încîl Ezra 3 Bible Online

Ezra 3 - Kurmanji Încîl bible

Ezra 3

¹Gava bû meha heftan, Îsraîlî êdî li bajarên xwe bûn. Wî çaxî ew li Orşelîmê li hev kom bûn.

²Yêşûyê kurê Yosadaq û birayên wî yên kahin, Zerûbbabîlê kurê Şealtiyêl û birayên wî rabûn gorîgeha Xwedayê Îsraîl çêkir. Wan wekî ku di Şerîeta Mûsayê zilamê Xwedê de hatiye nivîsandin, ji bo ku qurbanên şewitandinê li ser pêşkêş bikin, ev gorîgeh çêkir.

³Tevî ku li ser wan tirsa gelên welatên derdorê jî hebû, wan gorîgeh li ser bingeha wê çêkir. Wan li ser wê, serê sibê û êvarê ji Xudan re qurbanên şewitandinê pêşkêş kirin.

⁴Çawa ku hatiye nivîsandin, wan Cejna Holikan pîroz kir. Li gorî rojan ku di rê û rêbazan de hatiye kifşkirin, wan qurbanên şewitandinê yên rojane pêşkêş kirin.

⁵Herwiha wan qurbanên şewitandinê yên hergavî, qurbanên Heyva Nû, tevahiya qurbanên cejnên Xudan û pêşkêşiyên dilxwaziyê yên Xudan, pêşkêş kirin.

⁶Wan ji roja pêşî ya meha heftan dest bi pêşkêşkirina qurbanên şewitandinê kir, lê bingeha Mala Xudan hê jî nehatibû danîn.

⁷Îsraîliyan pere dan kevirbir û necaran û xwarin, vexwarin û rûnê zeytê dan Saydayî û Sûriyên ku ji Lubnanê bi riya deryayê darên sedrê bînin Yafayê. Tevahiya van karan li gorî destûra Koreşê Padîşahê Parsê bûn.

⁸Piştî vegera Mala Xwedê ya li Orşelîmê bi du salan, di meha diduyan de, Zerûbbabîlê kurê Şealtiyêl, Yêşûyê kurê Yosadaq, tevahiya birayên wan, kahin, Lêwî û tevahiya kesên ji Orşelîmê ji sirgûnê vegeriyan, dest bi avakirina Mala Xudan kir. Wan Lêwiyiyên ji bîst salî û mezintir kirin serkar.

⁹Yêşû tevî kur û birayên xwe, Qadmiyêl tevî kurên wî yên ku ji ziriyeta Cihûda[3] ne, Hênadad tevî kur û neviyên xwe ku Lêwiyî ne, serkarên karkerên Mala Xwedê bûn.

¹⁰Gava avakaran bingeha Mala Xudan danî, li gorî emrê Dawidê Padîşahê Îsraîlê, kahinan bi kincên xwe, di destan de borî û Asafiyên Lêwiyî jî bi zîlên destên xwe sekinîn ku pesnê Xudan bidin.

¹¹Paşê wan bi dorê ev strana pesin û şikirdariyê ji bo Xudan got: «Çimkî ew qenc e, Dilovaniya wî her û her e.» Gava wan pesnê Xudan da, herkes qîriya. Çimkî bingeha Mala Xudan dihat avêtin.

¹²Lê gelek kesên ji kahinan, Lêwiyiyan, serekên binemalan û rîspiyên ku Mala berê di bingeha wê de dîtibûn, bi dengekî bilind giriyan. Gelek kesan jî ji kêfa kirin qîrîn û şa bûn.

¹³Dengê qîrînên şahiyê û dengê girînê tevlihev bibû û gel ev deng ji hev cuda nedikir. Gel ewqas zêde diqiriya û şa dibû ku dengên wan ji cihên dûr jî dihat bihîstin.