Read Kurmanji Încîl Ezra 4 Bible Online

Ezra 4 - Kurmanji Încîl bible

Ezra 4

¹Gava dijminên Cihûdayî û Binyamîniyan bihîst ku kesên ji sirgûnê vegeriyan Perestgeha Xwedayê Îsraîl Xudan çêdikin,

²rabûn çûn ba Zerûbbabîl û serekên binemalan û ji wan re gotin: «Em bi we re ava bikin. Em jî diperizin Xwedayê we û ji roja Êsar-Haddonê Padîşahê Aşûrê em anîne vir ve, em qurbanan pêşkêşî Xwedayê we dikin.»

³Lê Zerûbbabîl, Yêşû û serekên binemalan ên din ji wan re gotin: «Avakirina Mala Xwedayê me ne karê we ye. Li ser fermana Koreşê Padîşahê Parsê, tenê emê ji Xwedayê Îsraîl Xudan re wê ava bikin.»

⁴Wê gavê gelê derdorê, Cihûdayî tirsandin û hêviyên wan şikandin ku dev ji avakirinê berdin.

⁵Ji rojên padîşahiya Koreşê Padîşahê Parsê heta padîşahiya Daryûs wan bi bertîl şêwirmend girtin ku pîlana wan xera bikin.

⁶Di destpêka padîşahiya Ahaşwêroş[4] de, dijminan li dijî rûniştiyên Orşelîmê û Cihûdayê nameyeke sûcdarkirinê nivîsand.

⁷Di rojên Artahşastayê[5] Padîşahê Parsê de, Bîşlam, Mîtredat, Tavêl û hemû hevalbendên wan ên din, nameyek ji Artahşasta re nivîsandin. Name bi zimanê aramî hat nivîsandin û wergerandin.

⁸Rehûmê Walî û Şîmşayê Nivîsende ji Artahşastayê Padîşah re li dijî Orşelîmê nameyeke sûcdarkirinê nivîsand. Name bi vî awayî bû:

⁹«Rehûmê Walî, Şîmşayê Nivîsende û hevalbendên wan ên din, dadger, serek, peywirdar, Parsî, Erexî, Babîlî, Sûsayî — ku Elamî ne —

¹⁰tevî gelên din ên ku Asurbanîpalê[6] mezin û birûmet ajot û li bajarên Sameryayê û li herêma rojavayê Firatê bi cih kir.»

¹¹Va ye nameya jibergirtî ya ku wan ji Artahşastayê Padîşah re şand ev e. «Ji Artahşastayê Padîşah re, «Ji xulamên wî yên ku li herêma rojavayê Firatê dijîn:

¹²«Bila padîşah bizanibe ku Cihûyên ji ba te derketin, hatin Orşelîmê ba me, vî bajarê serhildêr û xerab ji nû ve ava dikin. Ew dîwarên wê diqedînin û bingeha wê zexim dikin.

¹³Bila padîşah bizanibe ku heger ev bajar ji nû ve bê avakirin û dîwar bên lêkirin, wê Cihûdayî esse bac û xeracê nedin. Ev yek wê ji padîşahiyê re bi zirar be.

¹⁴Niha ji bo ku em nanê qesrê dixwin[7], li me nayê ku em bibînin şermezariya padîşah. Ji ber vê yekê me xeber ji te re şand

¹⁵ku ev yek di nivîsên qewimînên bav û kalên te de bê lêkolandin. Tê di nivîsên qewimînan de bibînî ku ev bajar serhildêr e û ji bo padîşahan û waliyan bi zirar e. Wan ji berê ve li vî bajarî bêbextî kir. Ji ber vê sedemê ev bajar hat helakirin.

¹⁶Gotina me ji padîşah re ev e: Heger ev bajar ji nû ve bê avakirin û dîwarên wê bên qedandin, li herêma rojavayê Firatê tu para te wê nemîne.»

¹⁷Padîşah wiha bersiv da û got: «Ji Rehûmê Walî, Şîmşayê Nivîsende û ji hevalbendên xwe yên din ên li Sameryayê û li cihên din ên herêma rojavayê Firatê re, silav û rêz.

¹⁸«Nameya we ji min re şand, hat wergerandin û li ber min hat xwendin.

¹⁹Min ferman da, lêkolîn hat kirin û hat dîtin ku ev bajar ji berê ve li dijî padîşahan rabûye û tê de serhildan û bêbextî hatine kirin.

²⁰Li ser Orşelîmê padîşahên hêzdar hebûn ku serweriyê li ser tevahiya herêma rojavayê Firatê kirin. Ji wan re bac û xerac jî dihat dayîn.

²¹Niha fermanê bidin ku ev mirov bisekinin. Heta ez fermanê nedim bila ew bajar ji nû ve neyê avakirin.

²²Xwe di vî warî de sist nekin. Bila padîşahî zêdetir zirarê nebîne.»

²³Gava nameya jibergirtî ya Artahşastayê Padîşah, li ber Rehûm, Şîmşayê Nivîsende û hevalbendên wan hat xwendin, bi lez çûn Orşelîmê ba Cihûyan û bi zorê ew dan sekinandin.

²⁴Karê avakirina Mala Xudan a li Orşelîmê wê gavê sekinî. Heta sala diduyan a padîşahiya Daryûsê Padîşahê Parsê avakirina perestgehê sekinî.