Read Kurmanji Încîl Ezra 6 Bible Online

Ezra 6 - Kurmanji Încîl bible

Ezra 6

¹Daryûsê Padîşah ferman da û li Babîlê di odeya nivîsan de lêkolîn hat kirin.

²Di qesra li Birca Ahmetaya[8] Herêma Medyayê de tomarek hat dîtin û di nav de wiha hatibû nivîsandin:

³«Di yeksaliya padîşahiya xwe de, Koreşê Padîşah li ser Mala Xwedê ya li Orşelîmê fermaneke wiha da: ‹Bila Mala Xwedê ya li Orşelîmê ji nû ve bê avakirin û qurban bên serjêkirin. Bila bingeha wê bê danîn. Bila bilindahiya Malê şêst gaz û berfirehiya wê şêst gaz be.

⁴Bila sê rêz kevirên mezin û rêzek textikên nû bên rêzkirin. Bila mesref ji aliyê qesra padîşah ve bê dayîn.

⁵Herwiha bila taximên zêr û zîv ên Mala Xwedê ku Nebûxadnessar ji Perestgeha li Orşelîmê derxistibû û anîbû Babîlê bê vegerandin. Bila ew li Perestgeha li Orşelîmê, li cihên xwe bên bicihkirin. Tê wan deynî Mala Xwedê.›

⁶«Loma Tattenayê Waliyê herêma rojavayê Firatê, Şêtar-Bozenay û hevalbendên wan, peywirdarên wê derê, hûn ji wir dûr bikevin!

⁷Dest nedin karê Mala Xwedê. Bila waliyê Cihûyan û rîspiyên wan, Mala Xwedê li cihê kevin ji nû ve ava bikin.

⁸Herwiha ji bo avakirina vê Mala Xwedê, ez ferman didim ku hûnê çi ji bo rîspiyên Cihûyan bikin: Tevahiya mesrefa van zilaman wê ji xezîneya padîşah bê dayîn ku ji bacên li herêma rojavayê Firatê hatine standin. Bi vî awayî wê karên avakirinê nesekine.

⁹Hûnê tevahiya hewcedariyên kahinên li Orşelîmê — conega, beran û berxên ji bo qurbanên şewitandinê yên Xwedayê Ezmanan, genim, xwê, şerab û rûn, her çi kahin bixwazin — bêyî ku navberê bixinê, her roj bidin wan

¹⁰ku ji Xwedayê Ezmanan re qurbanên bêhnxweş pêşkêş bikin û ji bo siheta padîşah û kurên wî dua bikin.

¹¹Min ferman da ku heger kesek ev ferman biguhere, bila ji mala wî kêranek bê derxistin û bi wî kêranî ve bê mixkirin. Mala wî jî bila bibe kavil.

¹²Bila Xwedayê ku ev der hilbijart ku navê wî tê de be, her gel û padîşahê ku dixwaze vê fermanê biguhere û vê Mala Xwedê ya li Orşelîmê xera bike, tune bike. Ez Daryûs im, ez vê fermanê didim. Bila ev fermana min bêqisûr pêk were!»

¹³Wê gavê Tattenayê Waliyê herêma rojavayê Firatê, Şêtar-Bozenay û hevalbendên wan, fermana Daryûs bi awayekî bêqisûr pêk anî.

¹⁴Rîspiyên Cihûyan bi pêxemberiyên Hagayê Pêxember û Zekeriyayê kurê Îddo avakirin berdewam kir û karê wan baş meşiya. Li gorî fermanên Xwedayê Îsraîl, Koreş, Daryûs û Artahşastayê[9] Padîşahê Parsê avakirin qedandin.

¹⁵Mal di roja sisiyê meha Adarê ya şeş saliya padîşahiya Daryûsê Padîşah de hat qedandin.

¹⁶Îsraîlî, kahin, Lêwiyî û hemû kesên din ên ji sirgûnê hatin, bi kêf û şahî Mala Xwedê pîroz kirin.

¹⁷Di pîrozkirina vê Mala Xwedê de, wan sed ga, du sed beran, çar sed berx pêşkêş kirin. Li gorî hejmartina eşîrên Îsraîl, ji bo pêşkêşiya paqijiyê duwanzdeh nêrî pêşkêş kirin.

¹⁸Wekî di Nivîsa Mûsa de hatiye nivîsandin, ji bo xizmeta Xwedê ya li Orşelîmê kahin û Lêwiyî li gorî komên wan kifş kirin.

¹⁹Di roja çardehê meha pêşî de, kesên ji sirgûnê vegeriyan Cejna Derbasbûnê pîroz kir.

²⁰Kahin û Lêwiyiyan bi hev re xwe paqij kirin. Hemû paqij bûn. Wan ji bo tevahiya sirgûniyan, ji bo birayên xwe yên kahin û ji bo xwe qurbana Cejna Derbasbûnê serjê kir.

²¹Herkes ji goştê qurbanê xwar. Îsraîliyên sirgûnê tevî tevahiya kesên din ên tevli wan bûn û xwe ji tiştên mirdar ên miletên derdorê veqetandibûn ku li Xwedayê Îsraîlê Xudan vegerin, xwarin.

²²Wan bi şahî heft rojan Cejna Nanê Şikeva pîroz kir. Çimkî Xudan şahiya wan anîbû. Xwedayê Îsraîl dilê Padîşahê Aşûrê zivirand ku di karê Mala Xwedayê Îsraîl de destê wan zexim bike.