Read Kurmanji Încîl Ezra 7 Bible Online

Ezra 7 - Kurmanji Încîl bible

Ezra 7

¹Piştî van tiştan, di padîşahiya Artahşastayê[10] Padîşahê Parsê de, Ezrayê kurê Serayayê kurê Ezaryayê kurê Hîlqiyayê

²kurê Şallûmê kurê Sadoqê kurê Ahîtûvê

³kurê Amaryayê kurê Ezaryayê kurê Merayotê

⁴kurê Zerahyayê kurê Ûzziyê kurê Bûqiyê

⁵kurê Avîşûayê kurê Pînehasê kurê Êlazarê kurê Harûnê Serkahin rabû.

⁶Ev Ezra ji Babîlê çû. Ezra, nivîsendeyekî ku Şerîeta Mûsa ya Xwedayê Îsraîl Xudan dabû, baş zanibû. Ji ber ku destê Xudan Xwedayê wî li ser wî bû, padîşah her tiştê ku wî xwest da wî.

⁷Di heft saliya padîşahiya Artahşastayê Padîşah de, ji gelê Îsraîl, ji kahin, Lêwiyî, stranbêj, dergevan û peywirdarên Perestgehê hin kes jî çûn Orşelîmê.

⁸Ezra di meha pêncan a heft saliya Artahşastayê Padîşah de hat Orşelîmê.

⁹Ew, roja pêşî ya meha pêşî ji Babîlê derket û ji bo ku destê Xwedayê wî yê qenc li ser wî bû, di roja pêşî ya meha pêncan de gihîşt Orşelîmê.

¹⁰Çimkî Ezra dilê xwe dabû ser hînbûn û pêkanîna Şerîeta Xudan û li Îsraîlê hînkirina qanûn û rêbazan.

¹¹Nameya jibergirtî ku Artahşastayê Padîşah da Ezrayê Kahin û Nivîsende yê ku gotinên emir û qanûnên Xudan ên ji bo Îsraîl baş dizane, ev e:

¹²«Ji Artahşastayê Padîşahê Padîşahan, «Ji Ezrayê Kahin û Nivîsendeyê Şerîeta Xwedayê Ezmanan re silav û rêz.

¹³«Ez ferman didim ku her kesek ji gelê Îsraîl an kahin û Lêwiyiyên wan ên li welatê min ku dixwaze here Orşelîmê, bila bi te re were.

¹⁴Min û heft şêwirmendên xwe tu şandî ku li gorî Şerîeta Xwedayê xwe ya di destê te de ye lêkolîna Cihûda û Orşelîmê bikî.

¹⁵Divê tu zêr û zîvê ku min û şêwirmendên min bi dil û can da Xwedayê Îsraîl ku Meskenê wî li Orşelîmê ye, bi xwe re bibî.

¹⁶Divê tu tevahiya zêr û zîvê ku tê li Herêma Babîlê bi dest bixî û pêşkêşên dilxwaziyê yên gel û kahinan ji Mala Xwedayê wan a li Orşelîmê anîbûn jî bi xwe re bibî.

¹⁷«Tê niha bi vî pereyî ga, beran, berx û pêşkêşiyên wan ên dexlê û rijandinê bikirî û ew li ser gorîgeha Mala Xwedayê xwe ya li Orşelîmê bi awayekî bêqisûr pêşkêş bikî.

¹⁸Tu û birayên te bi zêr û zîvên mayî dikarin li gorî daxwaza Xwedayê xwe bikin.

¹⁹Tevahiya taximên ku ji bo xizmeta Mala Xwedayê te dane te, li ber Xwedayê Orşelîmê teslîm bike.

²⁰Heger ji bo Mala Xwedayê te tiştekî din ku divê tu bidî hebe, tu dikarî ji xezîneya padîşah bidî.

²¹«Ez, Artahşastayê Padîşah, ferman didim tevahiya peywirdarên xezîneya li herêma rojavayê Firatê ku Ezrayê Kahin, Nivîsendeyê Şerîeta Xwedayê Ezmanan çi ji we bixwaze bêqisûr pêk bînin.

²²Ji zîv heta sed telantan[11], ji genim heta sed kewaran, ji şerabê heta sed batan, ji rûn heta sed batan û ji xwê jî heta bixwaze bidin.

²³Xwedayê Ezmanan ji bo Mala xwe çi ferman daye, bila bi awayekî bêqisûr bê kirin. Çima xezeba wî li ser welatê min û kurên min bibare?!

²⁴Herwiha baş bizanin ku hûn ji tu kahin, Lêwiyî, stranbêj, dergevan, peywirdarên Perestgehê û xulamên din ên Mala Xwedê ne bac û ne jî xeracê bistînin.

²⁵«Lê tu Ezrayo! Li gorî şehrezabûna Xwedayê te ya bi te re, serek û dadgeran kifş bike. Bila ew edaletê li ser tevahiya gelê herêma rojavayê Firatê ku Şerîeta Xwedayê te dizanin pêk bînin. Tu jî Şerîetê hînî kesên ku nizanin bike.

²⁶Divê her kesê Şerîeta Xwedayê te û fermanên padîşah bêqisûr pêk neyine, çi mirin be, çi sirgûnkirin be, çi standina mal be, çi jî girtin be, bê kirin.»

²⁷Bila Xwedayê bavkalên me Xudan pîroz be! Wî dilê padîşah kir ku Mala Xudan a li Orşelîmê birûmet dike.

²⁸Wî kir ku padîşah, şêwirmendên wî, fermandarên wî yên mêrxas ji min re dilovan bin. Bi saya destê Xwedayê min Xudan ku li ser min bû, ez hêzdar bûm. Min hinek serekên Îsraîlî da hev ku em bi hev re vegerin Orşelîmê.