Read Kurmanji Încîl Ezra 8 Bible Online

Ezra 8 - Kurmanji Încîl bible

Ezra 8

¹Qeyda serekên binemalan û kesên di padîşahiya Artahşasta[12] de bi min re ji Babîlê vegeriyan wiha ye:

²Ji Pînehasiyan, Gêrşom bû. Ji Îtamariyan, Daniyêl bû. Ji Dawidiyan, Hattûş bû.

³Ji Şexanyayiyan û Paroşiyan, Zekeriya bû. Tevî wî 150 mêr hatin qeydkirin.

⁴Ji Pahat-Moaviyan, Êlyehoênayê kurê Zerahya û 200 mêr bûn.

⁵Ji kurên Şexanyayê kurê Yahaziyêl, 300 mêr bûn.

⁶Ji Edîniyan Evedê kurê Yonatan û 50 mêr bûn.

⁷Ji Elamiyan, Îşayayê kurê Etalya û 70 mêr bûn.

⁸Ji Şefatyayiyan, Zevadyayê kurê Mîxayîl û pê re 80 mêr bûn.

⁹Ji Yoaviyan, Ovadyayê kurê Yehiyêl û pê re 218 mêr bûn.

¹⁰Ji kurên Şelomîtê kurê Yosîfya, 160 mêr bûn.

¹¹Ji Bêvayiyan, Zekeriyayê kurê Bêvay û pê re 28 mêr bûn.

¹²Ji Ezgadiyan, Yohananê kurê Haqqatan û pê re 110 mêr bûn.

¹³Ji kurên biçûk ên Adonîqam ku navên wan Êlîfelet, Yeiyêl, Şemaya û bi wan re 60 mêr bûn.

¹⁴Ji Bîgwayiyan Ûtay, Zakkûr û 70 mêrên bi wan re bûn.

¹⁵Min ew li kêleka coya ku diherike bajarê Ahawayê civandin. Me sê rojan li wir kon veda. Min di nav gel û kahinan de çavên xwe gerandin, lê min kesekî Lêwiyî li wir nedît.

¹⁶Loma min gazî Êliyezer, Ariyêl, Şemaya, Êlnatan, Yarîv, Êlnatanê din, Natan, Zekeriya, Meşûllamê ku serek in û Yoyarîv û Êlnatan kir ku herdu jî mamoste bûn

¹⁷û ew şandin ba Îddoyê ku serweriya devera Kasîfyayê dikir. Min ji wan re got bila ew ji Îddo û birayên wî yên ku peywirdarên Perestgehê û li Kasîfyayê ne re bêjin ku xizmetkaran bişîne Mala Xwedayê me.

¹⁸Bi destê Xwedayê me yê qenc, wan mirovekî fêmdar ji me re şand. Şêrêvyayê ji ziriyeta Mahliyê kurê Lêwiyê kurê Îsraîl, tevî kur û birayên wî, bi giştî hijdeh kes hatin.

¹⁹Bi wan re Haşavya û Îşayayê ji Mêrariyan, bira û kurên wî, bi giştî bîst kes,

²⁰tevî 220 kesên peywirdarên Perestgehê yên Dawid û serekên wî kifş kiribûn ku alîkariya Lêwiyiyan bikin jî hatin. Navên hemûyan hatibûn qeydkirin.

²¹Li wir, li kêleka Coya Ahawayê, rojî îlan kir ku em xwe li ber Xwedayê xwe dev ji nefsa xwe berdin û jê bixwazin ku ew ji bo xwe, zarokên xwe û tevahiya mal û milkê xwe riyekê ji me re veke.

²²Çimkî min şerm kir û ji padîşah nexwest ku ew leşker û hespan bişîne ku di rê de me ji dijminên me biparêze. Me êdî jê re gotibû: «Destê Xwedayê me, ji bo qenciyê li ser hemû kesan e ku lê digerin. Lê hêz û hêrsa wî li dijî hemû kesan e ku wî berdidin.»

²³Me rojî girt û ji bo vê yekê me lavayî Xwedayê xwe kir. Wî bersiv da lavakirina me.

²⁴Min duwanzdeh serekên kahinan veqetandin; Şêrêvya, Haşavya û deh birayên wan.

²⁵Min zêr, zîv û taximên ku padîşah, şêwirmend, fermandar û Îsraîliyên li wir ku pêşkêşî Mala Xwedayê me kirine kişand û da wan.

²⁶Tiştên ku min kişand û da wan ev bûn: 650 telant[13] zîv, sed telant taximên zîvîn, sed telant zêr,

²⁷bîst tasên zêrîn ên hezar darîkî[14] û du taximên ji tûncê biriqandî yên bi qasî zêr hêja ne.

²⁸Min ji wan re got: «Hûn ji Xudan re pîroz in. Ev taxim jî pîroz in. Ev zêr û zîv pêşkêşiyên dilxwaziyê yên Xwedayê bavkalên we Xudan ne.

²⁹Hay jê hebin û heta ku we ew li ber Lêwiyî û serekên kahinan û serekên binemalên Îsraîliyên li Orşelîmê bên kişandin, di odeyên Mala Xudan de biparêzin.»

³⁰Li ser vê yekê kahin û Lêwiyî zêr, zîv û taximên kişandî hildan ku bibin Orşelîmê, Mala Xwedayê me.

³¹Di roja duwanzdehê meha pêşî de, em ji Coya Ahawayê rabûn ku herin Orşelîmê. Destê Xwedayê me li ser me bû. Wî em ji destên dijminan û kesên di rê de kemîn danîne rizgar kirin.

³²Em gihîştin Orşelîmê û li wir sê roj man.

³³Di roja çaran de, li Mala Xwedayê me, ev zêr, zîv û taxim hatin kişandin û dan destê Merêmotê Kahinê kurê Ûriya. Bi wî re Yozavadê kurê Yêşû û Noedyayê kurê Binnûy ên Lêwiyî û Êlazarê kurê Pînehas jî hebûn.

³⁴Her tişt hatin hejmartin û kişandin. Giraniya wan jî hat qeydkirin.

³⁵Wê gavê kesên ji sirgûnê hatin, ji Xwedayê Îsraîl re qurbanên şewitandinê pêşkêş kirin. Wan duwanzdeh gayên ku ji bo tevahiya Îsraîlê, nod û şeş beran, heftê û heft berx û ji bo pêşkêşiya paqijiyê jî duwanzdeh nêrî pêşkêş kirin. Tevahiya wan wekî qurbanên şewitandinê ji Xudan re hatin pêşkêşkirin.

³⁶Wan nivîsên fermanên padîşah da setrabên padîşah û waliyên li herêma rojavayê Firatê. Wan alîkariya gel û Mala Xwedê kir.