Read Kurmanji Încîl Nehemya 1 Bible Online

Nehemya 1 - Kurmanji Încîl bible

Nehemya 1

¹Gotinên Nehemyayê kurê Haxalya ev in: Di sala bîstan a padîşahiya Artahşastayê Padîşah[1] de ku meha Kîslevê ye, gava ez li Birca Sûsayê bûm,

²birayekî min ê Hananî bi hinek Cihûdayiyan re hat. Min li ser Cihûdayiyên filitî yên ji sirgûnê saxmayî û li ser Orşelîmê pirsî.

³Ji min re gotin: «Rewşa kesên li vê herêmê ku ji sirgûnê sax mane, pir xerab e û di nava riswatiyê de ne. Sûrên Orşelîmê hatine hilweşandin û dergehên wê jî hatine şewitandin.»

⁴Gava min ev bihîstin, ez rûniştim û giriyam. Min bi rojan şîn kir. Min rojî girt û ji Xwedayê Ezmanan re dua dikir.

⁵Min digot: «Ya Xwedayê Ezmanan Xudan! Ya Xwedayê mezin û biheybet ê ku tu bi kesên ji te hez dikin û emrên te pêk tînin re bi dilsozî peymanê pêk tînî.

⁶Guhdar be! Çavê xwe veke! Duaya vî xulamê xwe bibihîze ku ez îro, bi şev û roj li hizûra te ji bo Îsraîliyên xulamên te dikim. Ez li gunehên gelê Îsraîl, li gunehên ku me li dijî te kirine mikur hatim. Min jî, bavkalên min jî guneh kiriye.

⁷Me li dijî te gelek xerabî kirin. Me emir, qanûn û rêbazên te yên ku te dan Mûsayê xulamê xwe, pêk neanî.

⁸«Gotina ku te ji Mûsayê xulamê xwe re got, bi bîr bîne. Te gotibû: ‹Heger hûn bi min re nedilsoz bin, ezê we li nav gelan belav bikim.

⁹Lê heger hûn li min vegerin, emrên min bikin û pêk bînin, ezê kesên we yên hatine sirgûnkirin, li binê ezmanan jî bin, ji wir berhev bikim û bînim cihê ku ji bo navê min bi cih bibe, min hilbijartiye.›

¹⁰«Ew gel û xulamên te ne ku te ew bi qeweta xwe ya mezin û destê xwe yê hêzdar rizgar kiriye.

¹¹Ya Reb! Guhdariya duaya xulamê xwe û duaya xulamên xwe yên ku ji tirsa navê te dilşa dibin, bike. Îro karê xulamê xwe bi ser bixe û bike ku padîşah pêşniyara min qebûl bike.» Wê çaxî ez meygerê padîşah bûm.