Read Kurmanji Încîl Nehemya 13 Bible Online

Nehemya 13 - Kurmanji Încîl bible

Nehemya 13

¹Wê rojê wan Nivîsa Mûsa ji gel re xwend. Di nivîsê de hatibû gotin ku divê Ammonî û Moavî heta hetayê nekevin civaka Xwedê.

²Çimkî tevî ku wan bi av û nên pêşwaziya Îsraîliyan nekiribûn, wan pere dabû Balam ku naletê li wan bike. Lê Xwedayê me ev nalet kir bereket.

³Gava gelê Îsraîl şerîet bihîst, hemû kesên xerîb ji xwe veqetandin.

⁴Beriya vê yekê, Êlyaşîvê Kahin ku ew danîbûn ser embarên Mala Xwedayê me û ji merivên Toviya bû,

⁵ji Toviya re odeyeke mezin amade kir ku pêşkêşiyên dexil, gunî, taxim, pêşkêşiyên ji bo kahinan û dehyekên genim, şeraba nû û rûn li gorî Şerîetê didan Lêwiyî, stranbêj û dergevanan, berê dixistin wê derê.

⁶Ji ber ku di sî û du saliya Artahşastayê[14] Padîşahê Babîlê de ez çûm ba padîşah, gava tevahiya van karan dibû, ez ne li Orşelîmê bûm. Çendek paşê min ji Padîşah destûrê xwest

⁷û paşê ez hatim Orşelîmê. Wê gavê min xerabiya Êlyaşîv fêm kir. Wî di Mala Xwedê de ji bo Toviya odeyek amade kiribû.

⁸Ez gelek hêrs bûm. Min hemû taximên mala Toviya ji odeyê avêtin derve.

⁹Paşê min ferman da û wan jî hemû ode paqij kirin. Min taximên Mala Xwedê, pêşkêşiya dexil û gunî careke din anî wir.

¹⁰Herwiha min fêm kir ku parên Lêwiyiyan nedane wan û Lêwiyî û stranbêjên ku xizmet dikirin jî vegeriyane zeviyên xwe.

¹¹Min bi qirika peywirdaran girt û got: «Çima dev ji Mala Xwedê hatiye berdan?» Min careke din ew dan hev û danîn cihê wan.

¹²Paşê tevahiya Cihûdayê, dehyeka dexil, şeraba nû û rûnê xwe anîn û xistin embaran.

¹³Ji ber ku mirovên dilsoz dihatin hesibandin, min Şelemyayê Kahin, Sadoqê Nivîsende û Pedayayê Lêwiyî danî ser embaran. Min Hananê kurê Zakkûrê kurê Mattanya jî danî ba wan. Karên wan ew bû ku li birayên xwe parî bikin.

¹⁴Ji bo vê yekê min bi bîr bîne ya Xwedayê min! Karên min ên ku min ji bo Mala Xwedayê xwe û xizmetên wê kirine, tune neke!

¹⁵Di wan rojan de min li Cihûdayê dît ku hinek mirov di Roja Septê de di mehserê de tirî diguvaştin, lodên dexlê hildigirtin û li keran bar dikirin. Herwiha şerab, tirî, hejîr û her cure lod di Roja Septê de dibirin Orşelîmê û difirotin. Ji bo vê yekê min erzê wan şikand.

¹⁶Sûrî jî li bajêr rûdiniştin. Wan masî û her cure mal dianîn û Roja Septê difirotin gelê Cihûdayê. Wan li Orşelîmê jî ev yek kir!

¹⁷Ez ketim qirika pêşengên Cihûdayê û min got: «Ev karê we yê xerab çi ye ku we Roja Septê mirdar kir?

¹⁸Ma bav û kalên we wiha nekir? Ma Xwedayê me tevahiya belayan bi ser me de, bi ser vî bajarî de neanî? Hûn jî bi mirdarkirina Roja Septê, hêrsa Xwedê li ser gelê Îsraîl zêdetir dikin.»

¹⁹Beriya Septê, gava tarî ket ser dergehên Orşelîmê, min emir kir ku derî bên girtin. Min emir kir ku heta dawiya Septê venebin. Min beşek ji xulamên xwe jî danî ber deriyan ku Roja Septê bar nekevin hûndir.

²⁰Bazirgan û kesên ku her cure mal difirotin, çend caran li derveyî Orşelîmê şeva xwe derbas kirin.

²¹Lê min erzê wan şikand û got: «Hûn çima li ber sûran şeva xwe derbas dikin? Hûn careke din bikin, ezê zorê li we bikim.» Piştî wê gotinê, ew Roja Septê nehatin.

²²Min emir da Lêwiyiyan ku ji bo Roja Septê pîroz bikin, xwe paqij bikin, werin û li ber dergehan bisekinin. Ya Xwedayê min, ji bo vê yekê jî min bi bîr bîne. Bi dilovaniya xwe ya mezin min biparêze.

²³Di wan rojan de min hinek Cihû dîtin ku jinên Aşdodî, Ammonî û Moavî ji xwe re anîne.

²⁴Nîvê zarokên wan bi zimanê Aşdodiyan dipeyivî. Wan zimanê Cihûdayiyan nizanibû lê bi zimanê gelên din diaxivîn.

²⁵Min bi qirika wan girt û naletê li wan anî. Min li hinekan xist û porê wan anî xwarê. Li ser heqê Xwedê min sond bi wan da xwarin û ji wan re got: «Hûnê keçên xwe nedin kurên wan. Ji kurên xwe û ji xwe re keçên wan jî neyinin.

²⁶Ma Silêmanê Padîşahê Îsraîlê bi van tevgeran gunehkar nebû? Di nava gelek miletan de padîşahekî wekî wî tunebû. Ew hezkiriyê Xwedê bû û Xwedê ew li ser tevahiya gelê Îsraîl kir padîşah. Lê belê jinên xerîb kirin ku ew bixwe jî gunehan bike.

²⁷Ma em guhdariya we û vê xerabiya mezin bikin?! We jinên xerîb ji xwe re anî û bi vî awayî nedilsozî bi Xwedayê me kir.»

²⁸Kurekî Yoyadayê kurê Êlyaşîvê Serkahin hebû ku bi keça Sanballatê Horonî re zewicî bû. Min ew ji ba xwe qewirand.

²⁹Ya Xwedayê min wan bi bîr bîne. Wan kahintî tevî peymana kahin û Lêwiyiyan mirdar kirin.

³⁰Min gel ji tevahiya xerîban paqij kir û yek bi yek ji bo kahin û Lêwiyiyan wezîfe diyar kir.

³¹Min di demên diyarkirî de ji bo pêşkêşiya daran û ji bo berê pêşî pêşkêşî peyda kirin. Ya Xwedayê min, bi qenciyê min bi bîr bîne.