Read Kurmanji Încîl Nehemya 2 Bible Online

Nehemya 2 - Kurmanji Încîl bible

Nehemya 2

¹Di meha Nîsanê de ku bîst saliya Artahşastayê Padîşah e, her gava şerab li pêş wî bû, min şerab hilda û da padîşah. Li hizûra wî qet xemgîn nebûm.

²Padîşah ji min re got: «Tu ne nexweşî, çima wisa xemgîn î? Gelo derdekî te heye?» Ez gelekî tirsiyam.

³Min ji padîşah re got: «Bila padîşah her û her bijî! Bajarê goristana bav û kalên min wêran bûye û dergehên wê hatine şewitandin, ezê çawa xemgîn nebim?»

⁴Padîşah ji min re got: «Tu çi dixwazî?» Min ji Xwedayê Ezmanan re dua kir

⁵û ji padîşah re got: «Heger bi dilê te be û dilê te bi xulamê te xweş be, min bişîne Cihûdayê, bajarê ku goristana bav û kalên min li wir e, ezê bajêr ji nû ve ava bikim.»

⁶Gava şahbanû li ba wî bû, padîşah ji min re got: «Rêwîtiya te wê çiqas bidome? Tê kengê vegerî?» Ji ber ku çûyîna min bi dilê wî bû, min jê re wextek diyar kir.

⁷Paşê min ji padîşah re got: «Ezbenî heger bi dilê te be, bila name ji waliyên herêma rojavayê Firatê re bên nivîsandin ku gava ez bigihîjim Cihûdayê, ew rê bidin min.

⁸Herwiha bila nameyek ji Asafê nobedarê daristana padîşah re jî bê nivîsandin. Bila ew daran bidin min ku kêranên ji bo dergehên birca li ba Malê, sûrên bajêr û xaniyê ku ezê lê bimînim bên çêkirin.» Ji bo ku destê Xwedayê min ê qenc li ser min bû, padîşah daxwaza min qebûl kir.

⁹Gava ez hatim ba waliyên herêma rojavayê Firatê, min nameyên padîşah dan wan. Padîşah bi min re serleşker û siwar şandibûn.

¹⁰Sanballatê Horonî û Toviyayê Peywirdarê Ammonî ev yek bihîst. Hatina kesekî ku li qenciya gelê Îsraîl digere, ew gelekî aciz kirin.

¹¹Ez hatim Orşelîmê û li wir sê rojan mam.

¹²Bi şev ez tevî hinek zilaman rabûm. Min tiştê ku Xwedayê min ji bo Orşelîmê bikim xistibû dilê min, ji tu kesî re negot. Min tenê heywanê ez lê siwar bûm, bir.

¹³Bi şev di Dergehê Newalê re, ber bi Kaniya Ejderhayê û Dergehê Zibil re çûm. Min çavdêriya sûrên Orşelîmê yên hilweşiyayî û dergehên şewitî kir.

¹⁴Ez çûm Dergehê Kaniyê û Hewza Padîşah. Lê ji bo heywanê ez lê siwar dibûm cihekî derbasbûnê tunebû.

¹⁵Loma ez bi şev derbasî newalê bûm û min çavdêriya sûran kir. Ez zivirîm û ketim Dergehê Newalê ku vegerim malê.

¹⁶Peywirdar nizanibûn ez çûme ku derê û ez çi dikim. Min ji Cihû, kahin, pêşeng, serek û kesên din ên kar dikin re behsa tiştekî nekiribû.

¹⁷Min ji wan re got: «Hûn rewşa xerab a ku em tê de ne dibînin. Orşelîm wêran e û dergehên wê hatine şewitandin. Werin, em sûrên Orşelîmê ji nûve ava bikin û ji nava vê riswatiyê derkevin.»

¹⁸Min ji wan re got ku destê Xwedayê min ê qenc li ser min e. Min gotinên ku padîşahê min ji min re gotibûn jî ji wan re got. Wan got: «Em rabin û ji nûve ava bikin.» Ji bo vî karê baş zend û bendê xwe ba dan.

¹⁹Lê gava Sanballatê Horonî, Toviyayê Peywirdarê Ammoniyan û Geşemê Ereb ev yek bihîst, wan em kêm dîtin û henekên xwe bi me kirin. Wan got: «Hûn çi dikin? Ma hûn li dijî padîşah serî hildidin?»

²⁰Min bersiv da wan û got: «Yê ku me bi ser bixe, Xwedayê Ezmanan e. Em xulamên wî, rabûn ku ji nûve ava bikin. Li Orşelîmê, wê ne para we, ne jî axa we hebe. Wê kes behsa navê we jî neke.»