Read Kurmanji Încîl Nehemya 5 Bible Online

Nehemya 5 - Kurmanji Încîl bible

Nehemya 5

¹Wê demê li ser birayên wan ên Cihû, gel û jinên wan kirin hewar.

²Hinekan digot: «Em bi kur û keçên me pir in. Divê em dexil bistînin bixwin ku em bijîn.»

³Hinekan jî digot: «Ji ber xelayê divê em dexil bistînin, beramberî wê zevî, rez, bexçe û xaniyên xwe rehîn deynin.»

⁴Hinekên din digot: «Ji bo baca padîşah em li ser zevî, rez û bexçeyên xwe ketin bin deynan.

⁵Goştê me wekî goştê canê birayên me ye. Kurên me, wekî kurên wan in, ne wisa ye? Lê niha em kur û keçên xwe dikin kole û hinek keçên me bûne cariye! Tu tişt ji destê me nayê, zevî û rezên me yên kesên din in.»

⁶Gava min ev hewar û gazin bihîstin, ez gelek hêrs bûm.

⁷Bi dilê xwe şêwirîm, min pêşeng û peywirdar sûcdar kirin û ji wan re got: «Tevahiya we ji birayên xwe faîzê distînin.» Min li dijî wan komeke mezin ava kir

⁸û ji wan re got: «Heta ji destê me hat me birayên xwe yên Cihû kirîn ku ji bo miletên din hatibûn firotin. Hûn birayên xwe difiroşin ku em careke din wan bikirin?» Ew bêdeng man, gotineke ku bêjin nedîtin.

⁹Min got: «Ev karê we ne baş e. Ma ne hewce ye, hûn di tirsa Xwedayê me de bimeşin ku miletên dijminên me tinazên xwe bi me nekin?

¹⁰Herwiha ez, birayên min û xulamên min bi xwe jî, em bi deyn zîv û dexil didine wan. Hêvî dikim, em êdî vê faîzê biqedînin.

¹¹Îro rabin zevî, rez, darzeytûn û malên wan bidin wan. Bi ser de jî ji sedî yekê faîza ku hûn ji bo zîv, dexil, şeraba nû û zeytê distînin, li wan vegerînin.»

¹²Gotin: «Emê li wan vegerînin û tiştekî ji wan nexwazin. Çawa tu dixwazî, emê wisa bikin.» Min gazî kahinan kir û min ew dan sondê ku li gorî vê sozê tevbigerin.

¹³Min dawa xwe weşand û got: «Her kesê ku vê sozê neyine cih, bila Xwedê wî jî wisa daweşîne û bavêje, mal û milkê wî jî ji destê wî bistîne.» Tevahiya civakê got: «Amîn» û pesnê Xudan da. Bi vî awayî gel li gorî vê sozê kir.

¹⁴Herwiha ji roja ku ferman dane min ku ez bibim waliyê diyarê Cihûdayê, ji bîst saliya Artahşastayê[6] Padîşah heta sî û du saliya wî, ne min, ne jî hevalên min duwanzdeh salan xwarina walîtiyê nexwar.

¹⁵Waliyên beriya min li ser gel bûn bar û ji wan, ji bilî nan û şerabê, 40 şekel[7] zîv jî distandin. Xulamên wan jî bibûn bela serê gel. Lê ji tirsa Xwedê, min wisa nekir.

¹⁶Min jinûveavakirina sûran berdewam kir. Hemû xulamên min li ser kar bûn, me zeviyek jî nekirî.

¹⁷Sed û pêncî kes li ser sifreya min hebûn. Hem Cihû û peywirdar, hem jî gelên ji derdora me dihatin ba me.

¹⁸Ji bo min her roj gayek, şeş pezên bijare û mirîşk dihatin serjêkirin. Ji deh rojan carek, bi têra xwe şerab dihate amadekirin. Lê dîsa jî, ji ber ku barê koletiyê li ser gel giran bû, min dest neda xwarina walîtiyê.

¹⁹Ya Xwedayê min! Her tiştê min di riya vî gelî de kiriye, ji bo min bi qencî bi bîr bîne.