Read Kurmanji Încîl Nehemya 6 Bible Online

Nehemya 6 - Kurmanji Încîl bible

Nehemya 6

¹Sanballat, Toviya, Geşemê Ereb û dijminên me yên din bihîst ku min sûr lê kiriye û cihekî qelişî jî tê de nemaye. Lê heta wê demê min derî bi dergehan ve nekiribûn.

²Sanballat û Geşem ji min re xeber şand û got: «Were, em li gundekî Deşta Onoyê hev bibînin.» Lê fikra wan ew bû ku xerabiyê bi min bikin.

³Min xeber şand û got: «Ez karekî mezin dikim, nikarim bêm. Çima ez dev ji kar berdim, bêm ba we û di vê navberê de kar bisekine?»

⁴Li ser vê gotina min, wan çar caran xeber ji min re şand û min li gorî vê gotinê bersiva wan da.

⁵Sanballat cara pêncan qasidê xwe şand ba min. Di destê wî de nameyeke vekirî hebû.

⁶Tê de wiha hatibû nivîsandin: «Di nav gelan de tê gotin — Geşem jî dibêje — ku tu û Cihû difikirin serî hildin û ji bo vê yekê ye ku tu sûran lê dikî. Li gorî van gotinan tu dixwazî bibî padîşahê wan.

⁷Ji bo ku bêjin: ‹Li Cihûdayê padîşah heye› û li Orşelîmê bidin bihîstin, te pêxember jî tayîn kirine. Niha wê ev yek ji padîşah re bê gotin. Loma were em bi hev bişêwirin.»

⁸Min xeber jê re şand û got: «Tiştekî tu dibêjî neqewimiye. Tu van tiştan bi xwe çêdikî.»

⁹Çimkî tevahiya wan gotin ku divê ew dev ji kar berdin û kar nekin. Bi vî awayî xwestin me bitirsînin. Lê min ev dua kir: «Xwedêyo, destê min hêzdar bike!»

¹⁰Rojekê ez çûm mala Şemayayê kurê Delayayê kurê Mehêtavêl ku xwe li malê veşartibû. Wî ji min re got: «Li Mala Xwedê, li hûndirê Perestgehê em hev bibînin, lê em deriyê Perestgehê bigirin. Çimkî wê ji bo kuştina te werin! Belê wê bi şev ji bo kuştina te werin.»

¹¹Min got: «Ma mêrekî wekî min direve? Kesekî wekî min ji bo sax bimîne, dikeve Perestgehê? Ez nakevimê.

¹²Min fêm kir ku Xwedê ew neşandiye. Ji ber ku Toviya û Sanballat bi pere ew girtibû, wî wekî pêxemberekî ev gotin li dijî min gotibûn.

¹³Ji bo vî karî, pere dabûn wî. Ji bo ez bitirsim, bi ya wî bikim û guneh bikim. Wan xwest navê min xerab bikin û tinazê xwe bi min bikin.

¹⁴«Ya Xwedayê min! Toviya, Sanballat, Noedyaya Pêxember û pêxemberên din ên dixwazin min bitirsînin, li gorî van karên wan bi bîr bîne.»

¹⁵Jinûveavakirina sûran di pêncî û du rojan de ango di bîst û pêncê Êlûlê[8] de qediya.

¹⁶Gava tevahiya dijminên me bihîst, hemû miletên li derdora me tirsiyan. Bi vî awayî bi tevahî baweriya xwe winda kirin. Çimkî pê hesiyan ku ev kar ji aliyê Xwedayê me ve hatiye kirin.

¹⁷Herwiha di wan rojan de, pêşengên Cihûdayê gelek caran ji Toviya re name dişandin. Nameyên Toviya jî ji wan re diçûn.

¹⁸Li Cihûdayê gelek mirov ji bo wî sond xwaribûn. Çimkî ew zavê Şexanyayê kurê Arah bû. Yehohananê kurê wî jî, keça Meşûllamê kurê Berekya ji xwe re anîbû.

¹⁹Pêşangan li ber min behsa qenciyên Toviya dikirin û gotinên min jê re dibirin. Toviya, ji bo min bitirsîne name dişandin.