Read Kurmanji Încîl Nehemya 8 Bible Online

Nehemya 8 - Kurmanji Încîl bible

Nehemya 8

¹Piştî ku Îsraîlî li bajarên xwe bûn, di meha heftan de[13] tevahiya gel çawa ku yek mirov bin, li meydana pêşberî Dergehê Avê civiya. Wan ji Ezrayê Nivîsende, Nivîsa Mûsa ya Şerîetê xwest ku Xudan tê de li gelê Îsraîl emir kiribû.

²Di roja pêşî ya meha heftan de Ezrayê Kahin, Nivîsa Şerîetê anî pêşberî civakê. Jin, mêr û herkesê ku dikare fêm bike li wir bû.

³Wî li meydana pêşberî Dergehê Avê, ji jin, mêr û her kesê ku dikare fêm bike re ji serê sibê heta nîvro jê xwend. Tevahiya gel guh da Nivîsa Şerîetê.

⁴Ezrayê Nivîsende li ser bilindciyekî darîn sekinî ku ji bo vî karî hatibû çêkirin. Li kêleka wî, li aliyê rastê Mattîtya, Şema, Enaya, Ûriya, Hîlqiya û Maesêya bûn. Li aliyê wî yê çepê Pedaya, Mîşaêl, Malkiya, Haşûm, Haşbaddana, Zekeriya û Meşûllam sekinî bûn.

⁵Ezra li ber çavê tevahiya gel nivîsê vekir. Cihê wî ji tevahiya cihê gel bilindtir bû. Dema wî ew vekir, tevahiya gel rabû ser piyan.

⁶Ezra Xwedayê mezin Xudan pîroz kir û tevahiya gel destê xwe hilda û got: «Amîn, amîn.» Paşê xwe tewandin deverû çûn erdê û perizîn Xudan.

⁷Yêşû, Banî, Şêrêvya, Yamîn, Eqqûv, Şabbetay, Hodiya, Maesêya, Qelîta, Ezarya, Yozavad, Hanan û Pelaya ku Lêwiyî bûn, Şerîetê ji gel re şîrove kirin. Wê gavê gel di cihê xwe de sekinî bû.

⁸Ji Nivîsa Şerîeta Xwedê bi awayekî eşkere xwendin. Wan wateya wê gotin ku tişta hatiye xwendin bê fêmkirin.

⁹Nehemyayê Walî, Ezrayê Kahin û Nivîsende û Lêwiyiyên ku hînî gel dikirin ji tevahiya gel re gotin: «Îro ji Xwedayê we Xudan re pîroz e. Şînê nekin û negirîn.» Çimkî tevahiya gel gava guhdariya gotinên Şerîetê dikir digiriya.

¹⁰Nehemya ji wan re got: «Herin xwarinên bi rûn bixwin, tiştên şîrîn vexwin û ji wan kesan re bişînin ku haziriya xwe nekirine. Çimkî îro ji bo Rebê me pîroz e. Xemgîn nebin, çimkî hêza we şahiya Xudan e.»

¹¹Lêwiyiyan got: «Aram bin, ji ber ku îro pîroz e, xemgîn nebin» û bi vî awayî tevahiya gel aş kirin.

¹²Loma tevahiya gel, ji bo ku bixwin, vexwin, paran bişînin û şahiyên mezin bikin vegeriyan malên xwe. Çimkî wan hemû gotinên hatibûn şîrovekirin fêm kiribûn.

¹³Di roja diduyan de, serekên tevahiya binemalan, kahin û Lêwiyî ji bo ku gotinên Şerîetê baştir fêm bikin, li ba Ezrayê Nivîsende li hev civiyan.

¹⁴Wan di Şerîeta ku Xudan dabû Mûsa de dît ku divê gelê Îsraîl di cejna meha heftan de li holikan rûne.

¹⁵Divê ew ji hemû gundan û Orşelîmê re bêjin: «Çawa ku hatiye nivîsandin, derkevin ser çiyê, çiqlên darzeytûn, darzeytûnên bejî, darên mêrsînê û xurmeyan bînin û holikan çêkin.»

¹⁶Gel rabû çû ew anîn û li ser xaniyên xwe, li hewşên xwe, li hewşên Mala Xwedê, li meydana Dergehê Avê û li meydana Dergehê Efrayîmê ji xwe re holik çêkirin.

¹⁷Tevahiya civaka kesên ji sirgûnê vegeriyan holik çêkirin û di holikan de rûniştin. Gelê Îsraîl ji rojên Yêşûyê kurê Nûn heta wê rojê wisa nekiribû. Loma şabûneke gelek mezin çêbû.

¹⁸Ezra her roj, ji roja pêşî heta roja dawî ji Nivîsa Şerîeta Xwedê xwend. Heft rojan cejn kirin. Di roja heştan de, li gorî rê û rêbazan civîna mezin hat çêkirin.