Read Kurmanji Încîl Ester 5 Bible Online

Ester 5 - Kurmanji Încîl bible

Ester 5

¹Di roja sisiyan de Esterê cil û bergên şahbanûtiyê li xwe kirin û li hewşa hûndir a qesra padîşah, li ber odeya text sekinî. Padîşah jî li ser textê xwe yê ku li pêşberî deriyê ketinê rûniştibû.

²Gava wî Estera şahbanû li hewşê sekinî dît, Ester ket çavê wî û wî gopalê xwe yê zêrîn dirêjî wê kir. Ester nêzîk bû û destê xwe da serê gopalê.

³Padîşah jê re got: «Te xêr e, Estera Şahbanû? Daxwaza te çi ye? Heger tu bixwazî, wê nîvê padîşahiyê jî ji te re bê dayîn.»

⁴Esterê ji padîşah re got: «Heger bi dilê padîşah be, bila padîşah tevî Haman keremke îro were ziyafeta ku ezê ji bo padîşah amade bikim.»

⁵Padîşah got: «Ji bo em daxwaza Esterê pêk bînin, yekser gazî Haman bikin.» Padîşah û Haman çûn ziyafeta ku wê Ester bide.

⁶Gava şerab vedixwarin, padîşah careke din ji Esterê re got: «De ka bêje, tu çi dixwazî? Wê ji te re bê dayîn. Daxwaza te çi ye? Heger tu bixwazî, wê nîvê padîşahiyê jî ji te re be.»

⁷Esterê got: «Hêvî û daxwaza min,

⁸heger bi dilê padîşah bi min xweş be, bixwaze daxwazên min bi cih bîne, dîsa bila padîşah û Haman sibê keremkin bên ziyafeta ku ezê ji bo wan bidim. Wî çaxî ezê bersiva pirsa padîşah bidim.»

⁹Haman wê rojê bi şahî û dilgeşî derket. Mordexay li ber dergehê qesrê bû, ji ber wî ranabû û rûmetê nîşanî wî nade. Li ser vê yekê Haman gelekî hêrs bû.

¹⁰Dîsa jî xwe ragirt û berê xwe da malê. Paşê wî gazî dostên xwe û jina xwe Zereşê kir.

¹¹Wî ji wan re behsa dewlemendiya xwe ya mezin, pirbûna kurên xwe û ji aliyê padîşah ve rûmetdana xwe kir. Behsa wê yekê kir ku çawa di nav giregir û karmendan de, di ser hemûyan re tê dîtin.

¹²Paşê Haman wiha berdewam kir: «Bi ser de Estera Şahbanû, ji bo ziyafeta ku dide, bi padîşah re tenê gazî min kir. Sibê jî bi tenê ezê bi padîşah re herim ziyafeta wê.

¹³Heta ku ez Mordexayê Cihû li ber dergehê padîşah bibînim, tu qedrê van tiştan li ber çavê min namîne.»

¹⁴Jina wî Zereş û hemû dostên wî jê re gotin: «Bila darekî ku pêncî gaz[3] bilind e bide daçikandin û serê sibê ji padîşah re bêje ku Mordexay li wir bide daleqandin. Paşê bi dilekî rihet bi padîşah re here ziyafetê.» Ev pêşniyar bi dilê Haman bû û wî darê daleqandinê daçikand.