Read Kurmanji Încîl Ester 6 Bible Online

Ester 6 - Kurmanji Încîl bible

Ester 6

¹Wê şevê xewa padîşah nehat û wî xwest ku nivîsên dîrokê jê re bînin. Anîn û li ber wî xwendin.

²Ji qeydan kifş bû ku Mordexay giliyê du dergevanên berdestiyên padîşah Bîgtan û Tereşê nemêr kiribû. Çimkî wan şêwra kuştina Padîşah Ahaşwêroş kiribûn.

³Padîşah got: «Ji ber vê kiryarê, Mordexay çawa hat rûmetkirin, çi xelat danê?» Xizmetkarên wî jê re gotin: «Tu tişt ji bo wî nehat kirin.»

⁴Di vê navberê de padîşah got: «Ka binêrin kî li van dera heye?» Wê gavê Haman ketibû hewşa derve ya qesrê. Wî darekê daçikandibû û hatibû ku ji padîşah bixwaze Mordexay bi darê ve bê daleqandin.

⁵Xizmetkaran ji padîşah re got: «Haman hatiye û li hewşê ye.» Padîşah got: «Bila bê vir.»

⁶Gava Haman hat, padîşah jê re got: «Ka bêje! Ji bo kesekî ku padîşah wî rûmetdar bike, divê em çi bikin?» Haman di dilê xwe de got: «Ma ji min pêve wê padîşah bixwaze kê rûmetdar bike?»

⁷Haman wiha bersiv da: «Heger padîşah bixwaze yekî rûmetdar bike,

⁸bila cil û bergên wî, hespê wî û taca padîşahiyê bînin.

⁹Wan bidin destê serwerekî mezin ê padîşah. Bila ew serwer cil û bergan li wî mirovî bike, li hespê siwar bike, li meydana bajêr bigerîne û bike gazî û bêje: ‹Padîşah mirovekî wiha rûmetdar dike.›»

¹⁰Padîşah ji Haman re got: «De ka rabe, li gorî gotina xwe cil û bergan û hespê bîne, tiştên ku te gotin yek bi yek ji bo Mordexay bike. Ew niha li ber dergehê padîşah e. Tu kêmahiyan di van gotinên xwe de nehêle.»

¹¹Haman rabû cil û berg û hesp hilda, cil û berg li Mordexay kir, ew li hespê siwar kir û li meydana bajêr gerand. Diçû û dihat, dikir gazî: «Padîşah mirovekî wiha rûmetdar dike.»

¹²Mordexay vegeriya dergehê qesrê. Haman serê xwe nixamt û bi şermî ber bi malê ve lezand.

¹³Tişta hat serê wî ji jina xwe Zereşê û dostên xwe re got. Jina wî Zereşê û şêwirmendên wî jê re gotin: «Ew Mordexayê ku tu li ber wî kêm ketî, heger ji gelê Cihûyan be, tê pê nikaribî. Bêguman tê li ber wî tune bibî û herî.»

¹⁴Hê dema ku ew dipeyivîn, axayên harema padîşah hatin, bi lez û bez Haman birin ziyafeta Esterê.