Read Kurmanji Încîl Derketin 1 Bible Online

Derketin 1 - Kurmanji Încîl bible

Derketin 1

¹Navên kurên Îsraîl ên ku bi malbatên xwe re bi Aqûb re çûbûn Misrê ev in:

²Rûbên, Şimûn, Lêwî, Cihûda,

³Îssexar, Zebûlon, Binyamîn,

⁴Dan, Neftelî, Gad û Aşêr.

⁵Kesên ku ji ziriyeta Aqûb dihatin li ser hev heftê kes bûn. Ûsiv ji xwe li Misrê bû.

⁶Bi demê re Ûsiv, hemû birayên wî û tevahiya wî nifşî mirin.

⁷Lê Îsraîlî berdar û belav bûn. Ew li hev zêde bûn û her ku çû xurt bûn. Welat bi wan tije bû.

⁸Paşê li Misrê padîşahekî nû rabû ku haya wî jî Ûsiv tunebû.

⁹Wî ji gelê xwe re got: «Va ye Îsraîlî ji me zêdetir û xurtir in.

¹⁰Werin em li dijî wan biaqil bin, an na wê zêdetir bibin. Heger şerek derkeve, wê bi dijminên me re bibin yek, li dijî me şer bikin û ji vî welatî derkevin herin.»

¹¹Îcar Misriyan serkarê suxrê danîn ser wan ku bi karên giran eziyetê li wan bikin. Wan ji bo Firewn, Pîtom û Ramsêsê ava kirin ku bajarên embaran bûn.

¹²Lê çiqas eziyet li wan hat kirin, ew bêtir zêde û belav bûn. Ji ber vê yekê Misrî ji gelê Îsraîl ditirsiyan.

¹³Misrî bi darê zorê Îsraîliyan dan xebatê.

¹⁴Wan bi karên giran ên xerc û kelpîçan û hemû karên cotkarî, jiyan li wan kirin jehr. Di hemû karên xwe de bi darê zorê ew dan xebatê.

¹⁵Padîşahê Misrê ji pîrikên Îbranî yên bi navên Şîfra û Pûayê re wiha got:

¹⁶«Gava hûn ji jinên Îbranî re pîriktiyê bikin û jina li ser textê zarokanînê bibînin wisa bikin: Heger kur be bikujin, lê keç be dest nedinê.»

¹⁷Lê pîrik ji Xwedê ditirsiyan, wan li gorî emrê Padîşahê Misrê nekir. Zarokên kur sax hiştin.

¹⁸Padîşahê Misrê gazî pîrikan kir û ji wan re got: «We çima wisa kir? Çima zarokên kur sax hiştin?»

¹⁹Pîrikan ji Firewn re got: «Jinên Îbraniyan ne wekî jinên Misriyan in. Ew gelekî xurt in û hê beriya pîrik bên, zarokan tînin.»

²⁰Xwedê qencî bi pîrikan kir. Her ku çû gel zêde û xurt bû.

²¹Ji ber ku pîrik ji Xwedê ditirsiyan, Xwedê ew kirin xweyî mal û malbat.

²²Li ser vê yekê Firewn ferman da tevahiya gelê xwe û got: «Her zarokê kur ê Îsraîlî gava çêbû bavêjin Çemê Nîlê lê keçikan sax bihêlin.»