Read Kurmanji Încîl Derketin 10 Bible Online

Derketin 10 - Kurmanji Încîl bible

Derketin 10

¹Xudan ji Mûsa re got: «Here ba Firewn, çimkî min dilên wî û karmendên wî hişk kirin ku ez van nîşanên xwe di nav wan de raber bikim.

²Tu jî ji kurên xwe û neviyên xwe re bêje min çawa bi nîşanan Misir rezîl kir ku hûn bizanibin Xudan ez im.»

³Mûsa û Harûn çûn ba Firewn û jê re gotin: «Xwedayê Îbraniyan Xudan wiha dibêje: ‹Heta kengê tê xwe li ber min nizim nekî? Gelê min berde ku xulamiya min bike.

⁴Heger tu nekî, ezê sibê kuliyan berdim nav welatê te.

⁵Wê rûyê erdê binixêmin û erd neyê dîtin. Wê tiştên ji ber zîpikê mane û hemû dar û deviyên we yên zeviyan bixwin.

⁶Wê kulî li mala te, mala hemû karmendên te û malên hemû Misriyan tije bibin. Ne bavên te û ne jî bavkalên te, wê heta îro tiştekî wiha li ser rûyê erdê nedîtibin.›» Piştre Mûsa zivirî û ji ba Firewn derket.

⁷Karmendên Firewn jê re gotin: «Ma wê heta kengê ev zilamê hanê ji bo me bibe dafik? Wan berde! Bila herin û xulamiya Xwedayê xwe Xudan bikin. Misir helak bû, ma tu hê fêm nakî?»

⁸Bi vî awayî wan Mûsa û Harûn careke din anîn ba Firewn. Wî ji wan re got: «Herin xulamiya Xwedayê xwe Xudan bikin, lê wê kî û kê herin?»

⁹Mûsa got: «Emê bi kal û xortên xwe, bi kur û keçên xwe, bi pez û dewarên xwe re herin. Çimkî emê cejna Xudan pîroz bikin.»

¹⁰Firewn got: «Heger ez bihêlim hûn û zarokên xwe herin, bila Xudan alîkarê we be! Jixwe niyeta we xerab e!

¹¹Wiha nabe. Niha tenê mêr herin û xulamiya Xudan bikin. Ji xwe daxwaza we ev e.» Piştre Mûsa û Harûn ji ba Firewn hatin qewirandin.

¹²Xudan ji Mûsa re got: «Tu destê xwe bi ser welatê Misrê ve dirêj bike ku kulî li welatê Misrê bibarin, hemû giyayê welat û ya ku ji ber zîpikê maye bixwin.»

¹³Mûsa gopalê xwe bi ser welatê Misrê ve dirêj kir. Tevahiya wê rojê û wê şevê Xudan li welêt bayê rojhilat rakir. Gava bû sibe, bayê rojhilat kulî anîn.

¹⁴Li seranserê welatê Misrê kulî bariyan û her derê tije kirin. Kulî ewqas pir bûn ku tiştek wiha berê tu car çênebûbû û piştre jî wê çênebûya.

¹⁵Wan tevahiya axê nixamt ku welat reş û tarî bû. Wan giyayê tevahiya erdê û fêkiyê hemû darên ku ji ber zîpikê mabûn xwarin. Li seranserê welatê Misrê, ne dar, ne giyayên çolê, tu şînahî nema.

¹⁶Firewn bi lez gazî Mûsa û Harûn kir û got: «Min li dijî we û Xwedayê we Xudan guneh kir.

¹⁷Ez lava dikim vê carê gunehê min bibexişînin û ji bo ku vê mirinê ji ser min rake, ji Xwedayê xwe Xudan re dua bikin.»

¹⁸Mûsa ji ba Firewn rabû û ji Xudan lava kir.

¹⁹Xudan ba zivirand bayekî rojava yê gelekî hêzdar. Wî kulî ajotin Derya Sor. Li seranserê welatê Misrê, kuliyek jî nema.

²⁰Lê Xudan dilê Firewn hişk kir, loma jî wî gelê Îsraîl berneda.

²¹Xudan ji Mûsa re got: «Tu destê xwe ber bi ezmanan ve dirêj bike ku li welatê Misrê şevereşkek çêbe ku herkes pê bihese.»

²²Mûsa destê xwe ber bi ezmanan ve dirêj kir. Li seranserê welatê Misrê, ji bo sê rojan taristanek çêbû.

²³Kes kesî nedît û kes sê rojan ji cihê xwe ranebû. Tenê cihê ku Îsraîlî lê diman, ronahî bû.

²⁴Firewn gazî Mûsa kir û got: «Herin xulamiya Xudan bikin. Bila zarokên we jî bi we re bên lê bila pez û dewarên we bimînin.»

²⁵Lê Mûsa got: «Wî çaxî tê qurbanên şewitandinê û qurbanên din bidî me ku em wan ji Xwedayê xwe Xudan re serjê bikin.

²⁶Ev jî nabe! Divê keriyên me bi me re bin û simekî jî li vir nemîne. Ji bo em xulamiya Xwedayê xwe Xudan bikin, divê em ji nav wan hinekan hilbijêrin û heta em negihîjin wir, emê nizanibin kîjanî pêşkêşî Xwedê bikin.»

²⁷Lê Xudan dilê Firewn hişk kir û wî nexwest wan berde.

²⁸Firewn ji Mûsa re got: «Here ji hafa min! Qet dernekeve pêşiya min. Roja tu rûyê min bibînî, tê bimirî.»

²⁹Mûsa got: «Bila wekî te be! Ezê careke din te nebînim.»