Read Kurmanji Încîl Derketin 11 Bible Online

Derketin 11 - Kurmanji Încîl bible

Derketin 11

¹Xudan ji Mûsa re got: «Ezê belayeke din bînim ser Firewn û Misrê, piştre wê we berde. Wê bi awayê ku biqewirîne jî, we berde.

²Niha tu ji gelê xwe re bêje: ‹Bila her mêr ji cîranê xwe, her jin ji cîrana xwe tiştên zêr û zîv bixwaze.›»

³Xudan kir ku Îsraîlî bikevin çavê Misriyan. Jixwe Mûsa li welatê Misrê, li ber çavê karmendên Firewn û gelê wî gelekî mezin bû.

⁴Mûsa ji Firewn re got: «Xudan wiha dibêje: ‹Ezê nîvê şevê di nava Misrê re derbas bibim.

⁵Ji kurê Firewn yê pêşî ku li ser text rûdine bigire heta jina kole ya li ber destêr, heywan jî tê de, wê li welatê Misrê hemû yên pêşî bimirin.

⁶Li seranserê welatê Misrê wê hewareke wisa rabe ku heta niha nehatiye dîtin û wê careke din jî neyê dîtin.

⁷Lê wê seyek jî li ba gelê Îsraîl û heywanên wan devê xwe veneke. Bi vî awayî hûn bizanibin Xudan çawa ferq û meyliyekê di navbera Îsraîlî û Misriyan de çêkiriye.

⁸Wê hemû karmendên te werin, li ber min herin ser çokan û bêjin: Rabin herin, tu û kesên li pey te! Piştî vê yekê, ezê herim.›» Bi vî awayî ew bi hêrsa mezin ji ba Firewn rabû.

⁹Xudan ji Mûsa re got: «Ji bo li welatê Misrê kerametên min zêdetir bibin, wê Firewn guhdariya we neke.»

¹⁰Mûsa û Harûn tevahiya van kerametan li ber Firewn kirin, lê Xudan dilê Firewn hişk kir û wî gelê Îsraîl ji welatê xwe berneda.