Read Kurmanji Încîl Derketin 13 Bible Online

Derketin 13 - Kurmanji Încîl bible

Derketin 13

¹Xudan ji Mûsa re got:

²«Tevahiya yên pêşî ji bo min pîroz bikin. Li Îsraîlê hemû berê pêşî yê zik, dixwazî mirov, dixwazî heywan be, yê min e.»

³Mûsa ji gel re got: «Vê roja hûn ji Misrê, ji warê koletiyê hatin derxistin bi bîr bînin. Çimkî Xudan bi destê xwe yê hêzdar hûn ji wê derê deranîn, di vê rojê de wê nanê bihevîrtirş neyê xwarin.

⁴Îro hûn di meha Avîv de ji vir derdikevin.

⁵Gava Xudan hûn birin welatê Kenanî, Hîtîtî, Amorî, Hîwî û Yevûsiyan, welatê ku Xudan ji bav û kalên we re sond xwaribû bide we û şîr û hingiv jê diherike, divê hûn di vê mehê de vê cejnê pîroz bikin.

⁶Hûnê heft rojan tenê nanê şikeva bixwin û di roja heftan de ji Xudan re cejnê bikin.

⁷Di van heft rojan de divê nanê şikeva bê xwarin. Divê li ba we û li seranserê welatê we hevîrtirş neyê dîtin.

⁸Wê rojê ji zarokên xwe re bêjin: ‹Ez van tiştan ji bo xatirê wê rojê dikim ku gava em ji Misrê derketin Xudan ji me re kir.›

⁹Ev, wê li ser destê we wekî nîşanekê, li ser eniya we wekî nîşaneke bîranînê bimîne ku Şerîeta Xudan li ser zimanê we be. Çimkî Xudan bi destê xwe yê hêzdar hûn ji Misrê deranîn.

¹⁰Divê hûn her sal li pey hev, di dema kifşkirî de van rê û rêbazan bi cih bînin.

¹¹«Gava Xudan hûn anîn welatê Kenanê, çawa ku wî ji we û ji bav û kalên we re sond xwar û ew der da we,

¹²divê hûn berê pêşî yê zik, zarokên kur ji bo Xudan veqetînin. Divê nixuriyê heywanên we, yên nêr ji Xudan re bin.

¹³Divê hûn berdêla her dehşikê pêşî, bi pezekî bidin. Heger hûn berdêla wê nedin, divê hûn stûyê wî bişikênin. Divê hûn berdêla her kurê xwe yê pêşî bidin.

¹⁴«Gava di pêşerojê de kurê te ji te bipirse: ‹Ev çi ye?› jê re bêje: ‹Xudan em ji Misrê, ji warê koletiyê bi destê xwe yê hêzdar deranî.

¹⁵Çaxê Firewn serhişkî kir û em bernedan, Xudan li welatê Misrê ji pêşiyê mirov bigire heta pêşiyê heywanan, hemû yên pêşî çêbûne kuştin. Ji ber vê yekê em pêşiyê nêr ê heywanan dikin qurban û ji bo kurê xwe yê pêşî jî heywanekî berdêl didin.›

¹⁶Ev kar wê wekî nîşanekê li ser destê we û wekî berenîkeke bîranînê li ser eniya we bimîne. Ev wê bi bîra we bîne ku destê Xudan ê hêzdar em ji Misrê deranîn.»

¹⁷Gava Firewn gel berda, bi ser ku riya diyarê Filîstiyan a herî nêzîk bû jî, Xwedê ew di wê riyê re nebirin. Çimkî fikirî û got: «Heger gel rastî şer bê, ew dikarin fikra xwe biguherin û vegerin Misrê.»

¹⁸Xwedê gel di riya beriyê re, ber bi Derya Sor ve bir. Îsraîliyên çekdar ji welatê Misrê derketibûn.

¹⁹Mûsa hestiyên Ûsiv bi xwe re anîbûn. Çimkî wî sond bi gelê Îsraîl dabû xwarin û gotibû: «Bêguman Xwedê wê bê alîkariya we û divê hûn hestiyên min ji vir bi xwe re bibin.»

²⁰Piştî ku ew ji Sûkkotê koç kirin, li Êtamê, li kêleka beriyê kon vedan.

²¹Ji bo ku ew bikaribin bi şev û bi roj bimeşin, Xudan bi roj di nav stûneke ewran de li pêşiya wan diçû û bi şev jî di nav stûneke agirîn de li wan dikir ronahî.

²²Bi roj stûna ewran, bi şev jî stûna êgir ji ber çavê wan winda nebû.