Read Kurmanji Încîl Derketin 14 Bible Online

Derketin 14 - Kurmanji Încîl bible

Derketin 14

¹Xudan ji Mûsa re got:

²«Ji gelê Îsraîl re wiha bibêje ku bizivirin. Bila li pêş Pî-Hahîrotê, di navbera Mîgdol û deryayê de, li hemberî Baal-Sefonê, li kêleka deryayê kon vedin.

³Wê Firewn ji bo gelê Îsraîl wiha bibêje: ‹Ew bêarmanc li nav welêt digerin, beriyê dor li wan pêça ye.›

⁴Ezê dilê Firewn hişk bikim. Wê li pey wan bikeve û ezê jî li ber Firewn û tevahiya artêşa wî rûmetdar bibim. Wê Misrî bizanibin ku Xudan ez im.» Îsraîliyan wiha kir.

⁵Gava ji Firewn re gotin gel reviyaye, Firewn û karmendên wî fikra xwe guhertin û gotin: «Wey me çi kir? Me Îsraîlî berdan ku herin û me koleyên xwe winda kirin!»

⁶Firewn erebeya xwe ya şer amade kir û artêşa xwe hilda.

⁷Wî tevî şeş sed erebeyên şer ên bijare, hemû erebeyên şer ên Misrê bi fermandarên wan ve bi xwe re birin.

⁸Xudan dilê Firewn hişk kir û wî da pey Îsraîliyên ku bi serfirazî direviyan.

⁹Misrî bi hemû hespên Firewn, bi erebeyên şer, bi siwar û bi artêşa xwe li pey wan ketin û li kêleka deryayê, li nêzîkî Pî-Hahîrotê, li hemberî Baal-Sefonê, dema ku wan kon vedidan gihîştin wan.

¹⁰Gava Firewn nêzîk bû, gelê Îsraîl serê xwe rakir û dît ku Misrî li pey wan tên. Ew gelek tirsiyan û wan ji Xudan re kir hewar.

¹¹Wan ji Mûsa re got: «Ma li Misrê gor tunebûn ku te em anîn beriyê ku li vir bimirin?! Te dît te em ji Misrê deranîn û çi anî serê me!

¹²Li Misrê me ji te re got: ‹Dev ji me berde! Em ji Misriyan re xulamiyê bikin.› Di şûna ku emê li beriyê bimirin, ji Misriyan re xizmetkirin ji bo me çêtir e.»

¹³Mûsa ji wan re got: «Netirsin, li cihê xwe bisekinin û rizgarkirina ku wê Xudan îro ji we re bîne bibînin. Çimkî Misriyên hûn îro dibînin, hûnê tu caran nebînin.

¹⁴Wê Xudan ji bo we şer bike, xema nexwin.»

¹⁵Xudan ji Mûsa re got: «Tu çima li min dikî hewar? Ji gelê Îsraîl re bêje ku bila bi pêş ve herin.

¹⁶Gopalê xwe rake û destê xwe dirêjî ser deryayê bike, wê bibe du şeq û wê Îsraîlî di nav deryayê re, li ser erdê ziwa bimeşin.

¹⁷Ezê dilê Misriyan hişk bikim ku bidin pey wan. Ezê li ber Firewn, tevahiya artêşa wî, erebeyên wî yên şer û siwarên wî rûmetdar bibim.

¹⁸Gava ez li ber Firewn, erebeyên wî yên şer û siwarên wî rûmetdar bûm, wê Misrî bizanibin ku Xudan ez im.»

¹⁹Milyaketê Xwedayê ku li pêşiya artêşa Îsraîliyan rêve diçû cihê xwe guhert û da pey wan. Stûna ewran jî ya ku li pêşiya wan bû, cihê xwe guhert û li pişt wan sekinî.

²⁰Stûna ewran di navbera artêşa Misrê û gelê Îsraîl de sekinî. Tevahiya şevê ewr aliyekî dikir tarî û aliyê din dikir ronahî. Loma seranserê şevê herdu alî nêzîkî hev nebûn.

²¹Mûsa destê xwe dirêjî ser deryayê kir. Xudan tevahiya şevê bi bayê rojhilat yê xurt av dehf da û derya kir erdê ziwa. Av bû du şeq.

²²Îsraîlî li ser erdê ziwa meşiyan û hatin nîvê deryayê. Av li milê çepê û rastê ji wan re bû dîwar.

²³Misrî li pey wan dihatin. Hemû hespên Firewn, erebeyên wî yên şer û siwarên wî li pey wan ketin nav deryayê.

²⁴Di nobeta serê sibê de, Xudan ji stûna êgir û ewran li artêşa Misrê nêrî û ew kirin nav tirs û sawê.

²⁵Wî tekelên erebeyan deranîn ku wan bi zehmetî ew ajotin. Misriyan got: «Em ji ber Îsraîliyan birevin, çimkî Xudan ji bo wan li dijî me şer dike.»

²⁶Xudan ji Mûsa re got: «Destê xwe dirêjî ser deryayê bike ku av bi ser Misriyan, erebeyên wan ên şer û siwarên wan ve bizivire.»

²⁷Mûsa destê xwe bi ser deryayê ve dirêj kir. Ber destê sibê derya zivirî ser rewşa xwe ya berê. Gava Misrî ji ber avê direviyan, Xudan ew di nav deryayê re hiştin.

²⁸Av bi şûn de zivirî, erebeyên şer, siwar û hemû artêşa Firewn a ku dabû pey wan, di bin deryayê de ma. Yek ji wan jî nefilitî.

²⁹Lê Îsraîlî di nav deryayê re, li ser erdê ziwa meşiyabûn. Av li milê çepê û li milê rastê ji wan re bûbû dîwar.

³⁰Xudan wê rojê Îsraîliyan ji destê Misriyan rizgar kirin. Îsraîliyan, laşên Misriyên mirî li keviya deryayê dîtin.

³¹Îsraîliyan karên destê Xudan ên mezin ku li dijî Misriyan kir dîtin. Gelê Îsraîl ji Xudan tirsiya, ji Xudan û xulamê wî Mûsa bawer kir.