Read Kurmanji Încîl Derketin 16 Bible Online

Derketin 16 - Kurmanji Încîl bible

Derketin 16

¹Tevahiya civata Îsraîl ji Elîmê koç kir. Piştî ku ji welatê Misrê derketibûn, di roja panzdehê meha diduyan de, gihîştin Beriya Sînê ya ku di navbera Elîm û Sînayê de ye.

²Tevahiya civata Îsraîl li beriyê ji Mûsa û ji Harûn gazin kirin

³û ji wan re gotin: «Xwezî Xudan hê gava em li welatê Misrê bûn, em bikuştana! Qet nebe em li ser sîtilên goşt rûdiniştin û me têra xwe dixwar. Lê belê hûn, ji bo hûn tevahiya civatê ji birçiya bikujin, we em anîn beriyê.»

⁴Xudan ji Mûsa re got: «Va ye ezê ji ezmanan nan ji bo we bibarînim. Wê gel her roj derkeve û nanê xwe yê rojekê bide hev. Bi vî awayî ezê wan biceribînim, ka li gorî şerîeta min rê ve diçin an na.

⁵Di roja şeşan de, wê ji her rojên din du caran zêdetir bicivînin.»

⁶Mûsa û Harûn ji tevahiya gelê Îsraîl re gotin: «Vê êvarê hûnê bizanibin ku Xudan we ji welatê Misrê derxistiye.

⁷Hûnê serê sibê rûmeta Xudan bibînin. Çimkî Xudan ya ku hûn li dijî wî dibêjin bihîst. Em kî ne ku hûn ji me gazinan dikin?»

⁸Piştre Mûsa got: «Gava Xudan êvarê ji bo xwarinê goşt û serê sibê jî heta ku hûn têr bibin nan bide we, wî çaxî hûnê bizanibin. Çimkî ya ku hûn li dijî wî dibêjin Xudan dibihîze. Ma em kî ne? Gazina we ne ji me, ji Xudan e.»

⁹Mûsa ji Harûn re got: «Ji tevahiya civata Îsraîl re bêje: ‹Werin hizûra Xudan, çimkî Xudan gazinên wan bihîstin.›»

¹⁰Gava Harûn ev ji tevahiya civata Îsraîl re digot, wan li aliyê beriyê nêrî û rûmeta Xudan di nav ewr de xuya bû.

¹¹Xudan ji Mûsa re got:

¹²«Min gazinên gelê Îsraîl bihîstin. Ji wan re bêje: ‹Hûnê ber êvarê goşt bixwin û serê sibê bi nên têr bixwin. Hûnê bizanibin ku Xwedayê we Xudan ez im.›»

¹³Wisa bû ku ber êvarê sûsik hatin û der û dor nixamtin. Serê sibê xunav ketibû derdora cihê ku dimînin.

¹⁴Gava xunav rabû, li beriyê, li ser rûyê erdê, tiştekî biçûk û gilover ê wekî xûsikê xuya bû.

¹⁵Gelê Îsraîl ev dîtin û ji hev re gotin: «Ev çi ye?» Çimkî nizanibûn ew çi ye. Mûsa ji wan re got: «Ev ew nan e ku Xudan ji bo xwarinê da we.

¹⁶Emrê Xudan ev e: ‹Bila herkes li gorî xwarina xwe berhev bike. Ji bo her kesê ku li konê we dimîne omerekî[10] hildin.›»

¹⁷Gelê Îsraîl wisa kir, hinekan pir, hinekan hindik berhev kirin.

¹⁸Gava bi omer pîvan, yê pir berhev kir, zêde nebû, yê hindik berhev kir jî kêm nebû. Her kesî li gorî xwarina xwe berhev kir.

¹⁹Mûsa ji wan re got: «Bila tu kes heta serê sibê jê tiştekî bi xwe re nehêle.»

²⁰Lê wan guhê xwe neda Mûsa û hinekan heta serê sibê ji wê xwarinê bi xwe re hişt. Wî çaxî kurm li xwarina kesên bi xwe re hiştine xist û bêhn ketê û genî bû. Li ser vê yekê Mûsa li wan hêrs bû.

²¹Her sibe li gorî xwarina xwe her kesî jê dida hev. Gava roj germ dibû, ya li erdê mayî diheliya.

²²Lê di roja şeşan de, her yekî du omerî[11], yanî du qat nan da hev û hemû serekên civatê hatin û ji Mûsa re gotin.

²³Mûsa ji wan re got: «Ya ku Xudan emir dike ev e: ‹Sibê roja bêhnvedanê, Roja Septê ye ku ji bo Xudan pîroz e. Ya ku hûnê bipêjin, bipêjin, ya ku hûnê bikelînin, bikelînin. Ya mayî deynin aliyekî, bila bimîne sibê.›»

²⁴Çawa ku Mûsa li wan emir kiribû, ya zêde mayî heta serê sibê hilanîn. Bêhn neketê û kurm lê nexist.

²⁵Mûsa got: «Ya mayî îro bixwin, çimkî îro ji bo Xudan Roja Septê ye. Hûnê li derve nan nebînin.

²⁶Hûnê şeş rojan nan bidin hev, lê roja heftan Sept e, wê di wê rojê de tune be.»

²⁷Roja heftan, hin ji bo ku nan bidin hev derketin derve, lê tiştek nedîtin.

²⁸Xudan ji Mûsa re got: «Hûnê heta kengê guh nedin emrên min û şerîeta min?

²⁹Binêrin, Xudan Roja Septê da we, loma di roja şeşan de ji bo du rojan nanê we dide we. Bila herkes li cihê xwe bimîne û di roja heftan de kes ji cihê xwe dernekeve.»

³⁰Bi vî awayî gel di roja heftan de bêhna xwe veda.

³¹Mala Îsraîl navê wî nanî Manna[12] danî. Ew wekî tovê kîşnîşê spîçolkî bû û tehma wî wekî şilekê bi hingiv bû.

³²Mûsa got: «Ya ku Xudan emir kiriye ev e: ‹Gava min hûn ji welatê Misrê derxistin, di nav nifşên we de ji wî nanê ku min li beriyê bi we da xwarin bibîne, jê omerekî veşêrin.›»

³³Mûsa ji Harûn re got: «Tu cerekî hilde û omerekî Mannayê bixê. Ji bo di nav nifşên we de bê parastin, deyne hizûra Xudan.»

³⁴Çawa ku Xudan li Mûsa emir kiriye, Harûn ji bo ku Mannayê veşêre danî ber Şahidiyê[13].

³⁵Gelê Îsraîl çil salan, heta gihîştin sînorê welatê Kenana ku lê bi cih bûn, Manna xwarin.

³⁶Omerek ji dehan yekê efayê[14] bû.