Read Kurmanji Încîl Derketin 19 Bible Online

Derketin 19 - Kurmanji Încîl bible

Derketin 19

¹Îsraîlî, piştî ji welatê Misrê derketin sê meh paşê gihîştin Beriya Sînayê.

²Ew ji Refîdîmê derketibûn û hatibûn Beriya Sînayê. Li pêşberî Çiyayê Sînayê kon vedan û bi cih bûn.

³Mûsa derket ber Xwedê. Xudan ji çiyê deng lê kir û got: «Tê ji Mala Aqûb re, ji gelê Îsraîl re wiha bêjî:

⁴‹We dît ku min bi Misriyan çi kir û çawa we li ser baskê teyrên baz siwar kirin û anîn ba xwe.

⁵Li ser vê yekê heger hûn bi baldarî guh bidin dengê min û bi peymana min ve girêdayî bimînin, hûnê di nav hemû gelan de bibin milkê min bi xwe. Çimkî tevahiya dinyayê ya min e.

⁶Hûnê ji bo min bibin padîşahiya kahinan[19] û miletekî pîroz. Gotina ku tê ji gelê Îsraîl re bêjî ev e.›»

⁷Mûsa çû, gazî hemû rîspiyên gel kir û her tiştê ku Xudan lê emir kiribû danî ber wan.

⁸Tevahiya gel bi hev re bersiv da û got: «Her tiştê ku Xudan gotiye emê bikin.» Mûsa bersiva gel gihand Xudan.

⁹Paşê Xudan ji Mûsa re got: «Ezê di nav ewrekî tarî de bêm ba te, gava ez bi te re bipeyivim bila gel bibihîze û her û her baweriyê bi te bîne.» Mûsa ya ku gel jê re gotibû gihand Xudan.

¹⁰Xudan ji Mûsa re got: «Tu here ba gel, bila îro û sibê xwe pak bikin. Bila kincên xwe bişon.

¹¹Bila ew ji bo roja sisiyan amade bin. Çimkî ezê wê rojê li ber çavê hemûyan dakevim Çiyayê Sînayê.

¹²Sînorekî li dora çiyê bikişîne û ji gel re bêje: ‹Nabe kes derkeve çiyê û xwe nêzîkî qûntara wî bike. Her kî xwe nêzîkî çiyê bike, divê bê kuştin.

¹³Kesê nêzî çiyê bibe, an wê bê kevirkirin, an jî bi tîran bê kuştin. Çi mirov, çi heywan wê nejî.› Kengê demeke dirêj li boriyê hat xistin, bila gel hilkişe çiyê.»

¹⁴Mûsa ji çiyê berjêr bû, hat nav gel û kir ku gel xwe pak bike. Her kesî kincên xwe şûştin.

¹⁵Mûsa ji gel re got: «Ji bo roja sisiyan xwe amade bikin. Bila di vê navberê de kes neçe nav nivîna jina xwe.»

¹⁶Roja sisiyan serê sibê brûsk lê xist û ewrekî giran ser çiyê girt. Dengê boriyeke hêzdar hat bihîstin. Hemû kesên li artêşgehê lerizîn.

¹⁷Mûsa gel ji artêşgehê deranî ku herin pêşwaziya Xwedê. Ew li qûntara çiyê sekinîn.

¹⁸Ji her dera Çiyayê Sînayê dû bilind dibû, çimkî Xudan di nav êgir de daketibû serê çiyê. Wekî dûyê ji êtûnekê rabe, ji serê çiyê dû bilind dibû û hemû çiya dilerizî.

¹⁹Gava dengê boriyê bilind dibû, Mûsa dipeyivî û Xwedê bi lêxistina brûskê re bersiva wî da.

²⁰Xudan daket ser serê Çiyayê Sînayê, gazî Mûsa kir ku were serê çiyê. Mûsa rabû hat serê çiyê.

²¹Xudan ji Mûsa re got: «Berjêr be, gel hişyar bike. Nebî nebî kesek ji bo min bibîne rabe sînor derbas bike! Yan na wê piraniya wan helak bibin.

²²Kahinên nêzîkî min dibûn jî bila ji min dûr bin. An na ezê wan jî ceza bikim.»

²³Mûsa ji Xudan re got: «Gel nikare hilkişe Çiyayê Sînayê, çimkî te bi xwe em şîret kirin û ji me re got: ‹Sînorekî li dora çiyê bikişîne û wî pîroz bike.›»

²⁴Xudan ji Mûsa re got: «Rabe berjêr be û Harûn bîne. Lê bila kahin û gel ji bo dîtina min, sînor derbas nekin. An na ezê wan ceza bikim.»

²⁵Mûsa berjêr bû, gel agahdar kir.