Read Kurmanji Încîl Derketin 2 Bible Online

Derketin 2 - Kurmanji Încîl bible

Derketin 2

¹Zilamekî ji Mala Lêwî bi keçeke ji eşîra xwe re zewicî.

²Jinik bi zaro ma û kurek anî. Jinikê dît ku lawik xweşik e. Loma wê ew sê mehan veşart.

³Çaxê dît êdî nikare wî veşêre, rabû selikeke hesîr anî, bi qîr û qetranê sewax kir, kurik tê de bi cih kir û li ber keviya Nîlê danî nav zilan.

⁴Xwişka wî ji dûr ve sekinî, lê nihêrî ka wê çi pê bibe.

⁵Keça Firewn, ji bo ku xwe bişo çû ber çem. Xizmetkarên wê jî li ber çem digeriyan. Çaxê wê di nav zilan de selik dît, xizmetkara xwe şand ku here bîne.

⁶Wê selik vekir û zarok dît. Kurik digiriya. Ew li ber wî ket û got: «Ev, zarokekî Îbraniyan e.»

⁷Xwişka kurik ji keça Firewn re got: «Gelo ez herim gazî dadikeke Îbranî ya berdergûş bikim ku were û ji bo te şîr bide vî kurikî?»

⁸Keça Firewn got: «Here gazî bike!» Keçik çû gazî diya zarok kir.

⁹Keça Firewn ji jinikê re got: «Vî kurikî hilde û ji bo min şîr bidê. Ezê heqê te bidim.» Jinikê kurik hilda û şîr dayê.

¹⁰Gava kurik mezin bû, wê ew ji keça Firewn re anî. Keça Firewn ew kir kurê xwe, navê wî Mûsa[1] danî û got: «Çimkî min ew ji avê derxist.»

¹¹Paşê Mûsa mezin bû, rojekê ew çû nav gelê xwe û barê wan ê giran dît. Wî dît ku yekî Misrî, li birayekî wî yê Îbranî dixe.

¹²Çaxê li dora xwe nihêrî û dît ku kes tuneye, wî yê Misrî kuşt û di nav sêlakê de veşart.

¹³Dotira rojê dîsa rabû çû derve. Dît ku du Îbranî li hev dixin. Wî ji yê neheq re got: «Tu çima li birayê xwe dixî?»

¹⁴Zilam jê re got: «Kê tu li ser serê me kirî serek û dadger? Wekî ku te yê Misrî kuşt, tu dixwazî min jî bikujî?» Mûsa tirsiya û di dilê xwe de got: «Êdî ev tişt kifş bûye.»

¹⁵Gava Firewn ev yek bihîst, li Mûsa geriya ku wî bikuje. Lê Mûsa ji ber wî reviya, çû diyarê Mîdyanê û li ser bîrekê rûnişt.

¹⁶Heft keçên kahinê Mîdyanê hebûn. Hatin avê ku ji bîrê bikişînin. Wan cirn tije kirin ku av bidin pezê bavê xwe.

¹⁷Lê çend şivan hatin û ew ji wir qewirandin. Li ser vê yekê, Mûsa rabû, alîkariya wan kir û av da pezê wan.

¹⁸Gava keçik zivirîn hatin ba Reûêlê bavê xwe, wî ji wan re got: «Keçikno xêr e hûn îro zû hatin?»

¹⁹Keçikan got: «Zilamekî Misrî em ji destê şivanan rizgar kirin, ji bo me av kişand û da pezê me.»

²⁰Wî ji keçikan re got: «Ka ew li ku ye? We çima ew zilam berda? Herin gazî bikin, bila bê nan bixwe.»

²¹Mûsa razî bû ku li ba wî zilamî bimîne. Wî jî keça xwe Sîpporayê da Mûsa.

²²Sîpporayê kurek anî. Mûsa navê wî Gêrşom[2] danî û got: «Çimkî ez li welatekî biyanî bûm yekî xerîb.»

²³Gelek sal derbas bûn. Wext hat Padîşahê Misrê mir. Îsraîlî hê jî di bin koletiyê de dinaliyan. Wan dikir gazî û hewar. Dem hat gaziya wan gihîşt Xwedê.

²⁴Xwedê nalîna wan bihîst, peymana ku bi Îbrahîm, Îshaq û Aqûb re çêkiribû anî bîra xwe.

²⁵Wî li gelê Îsraîl mêze kir û bala xwe da ser wan.