Read Kurmanji Încîl Derketin 21 Bible Online

Derketin 21 - Kurmanji Încîl bible

Derketin 21

¹«Rêbazên ku tê bidî ber wan ev in:

²«Gava tu koleyekî Îbranî bikirî, wê şeş salan xulamiyê bike lê sala heftan wê bêyî ku tiştekî bide azad bibe.

³Heger ew tenê hatibe, wê tenê here. Heger zewicî hatibe, wê bi jina xwe re here.

⁴Heger xweyê wî ew zewicandibe û wê jinê jê re kur an keç anîbin, wê jin û zarok ji xweyî re bimînin. Wê kole tenê here.

⁵Lê heger kole bi eşkereyî bibêje: ‹Ez ji xweyê xwe, jina xwe û zarokên xwe hez dikim. Ez naxwazim azad bibim›,

⁶wê xweyê wî, wî derxe hizûra Xwedê[21]. Wê wî nêzîkî derî yan kêleka derî bike û guhê wî bi dirêşikê qul bike. Bi vî awayî, wê tevahiya jiyana xwe xulamiya wî bike.

⁷«Lê gava kesek keça xwe wekî kole û cariye bifiroşe, wê bi koleyên mêr re neyê berdan.

⁸Heger ew ne bi dilê xweyê xwe yê dergistiyê wê be, wê bihêle ku dîsa bê kirîn. Ew nikare wê bifiroşe malbateke din. Çimkî wî bêbextî lê kiriye.

⁹Heger xweyî wê bide kurê xwe, wê wekî keça xwe bibîne.

¹⁰Heger xweyî bi jineke din re bizewice, wê jina xwe ya berê ji xwarin, cil û berg û ji razana pê re kêm neke.

¹¹Heger ew van her sê tiştan neke, wê jin bêyî ku tiştekî bide azad be. Wê qet pere nede.

¹²«Kesê li kesekî din bixe û bikuje, divê ew jî bê kuştin.

¹³Lê heger bi qestî nehatibe kirin û ev kuştin ji Xwedê be, ezê cihekî ku ew dikare bireve, ji te re kifş bikim.

¹⁴Heger kesek bi qestî êrîşî cîranekî bike û wî bi pîlan bikuje, xwe bavêje gorîgeha min jî, tê wî derxî û bikujî.

¹⁵«Kesê li dê û bavê xwe bixe, divê bê kuştin.

¹⁶«Kesê kesekî din bi darê zorê birevîne, firotibe jî, di destan de be jî, divê bê kuştin.

¹⁷«Kesê naletê li dê û bavê xwe bîne, divê bê kuştin.

¹⁸«Gava hinek kes devjenî bikin û paşê kesek bi kevir an bi kulman li cîranê xwe bixe û cîranê wî nemire û bikeve nav nivînan

¹⁹lê piştre rabe û bikaribe li derve bi gopal bigere, wî çaxî kesê lê xistiye wê bêsûc be. Lê wê mesrefa dema winda kiriye û heta baş bibe hemû mesrefên dermankirinê bide.

²⁰«Gava kesek bi daran li koleyê xwe yan jî li koleya xwe bixe û kole di destên wî de bimire, divê bê cezakirin.

²¹Lê heger kole rojek du rojan bijî, wê xweyî neyê cezakirin. Çimkî malê wî ye.

²²«Gava kesên li hev bixin, li jineke bi zaro bikevin û zarokê wê zû bibe lê zirara din pê nebe, divê kesê lê ketiye bê cezakirin. Pereyê ku mêrê jinikê xwestiye û dadger erê kiriye, wê bide.

²³Heger zirar hebe, wê di ber can de can,

²⁴di ber çav de çav, di ber diran de diran, di ber dest de dest, di ber pê de pê,

²⁵di ber şewitandinê de şewitandin, di ber birînê de birîn, di ber derb de derb bide.

²⁶«Gava kesek li çavê koleyê xwe yan jî li koleya xwe bixe û kor bike, wê di ber çavê wî de wî azad bike.

²⁷Heger ew diranê koleyê xwe yan jî koleya xwe bişikêne, wê di ber dirên de azad bike.

²⁸«Gava gayek bi qiloçên xwe li mêr an jinekê bixe û bikuje, divê ew ga bê kevirkirin. Wê goştê wî neyê xwarin lê xweyê ga bêsûc be.

²⁹Heger gayek ji berê ve boçker be û xweyê wî hatibe hişyarkirin lê xweyî tu tedbîr nestandibe û ga mêr an jinekê bikuje, wê ga bi kevirkirinê bê kuştin û xweyê wî jî bê kuştin.

³⁰Lê heger ji xweyê ga berdêlek bê xwestin, divê hemû berdêla jê tê xwestin bide û canê xwe rizgar bike.

³¹Heger ga bi qiloçên xwe li kurikekî yan li keçikekê bixe û bikuje, wê li gorî heman rêbazê bê kirin.

³²Heger ga bi qiloçên xwe li koleyekî yan jî li koleyekê bixwe û bikuje, wê xweyê ga sî şekel[22] zîv bide xweyê wî û ga jî bê kevirkirin.

³³«Gava kesek çalekê veke yan ser çala ku kolaye negire û ga yan kerek bikeve wê çalê,

³⁴wê xweyê çalê pere bide xweyê heywên û aştiyê bike. Wê heywanê mirî bibe yê wî.

³⁵«Gava gayê yekî li gayê cîranê xwe bixe û bikuje, wê gayê sax bifiroşin û pereyê wî li hev parî bikin. Heywanê mirî jî li hev parî bikin.

³⁶Lê heger ji berê ve bê zanîn ku ga êrîşkar e û xweyê wî ew zeft nekiriye, divê di şûna wî gayî de gayekî din bide û aştiyê bike. Wê gayê mirî ji xweyê xwe re bimîne.»