Read Kurmanji Încîl Derketin 23 Bible Online

Derketin 23 - Kurmanji Încîl bible

Derketin 23

¹«Tê xebera derew negerînî. Tê bi şahidiya zordariyê ji yê xerab re nebî alîgir.

²Tê ji bo xerabiyê li pey qelebalixê nekevî. Tê di dozekê de ji bo neheqiyê li pey qelebalixê neçî.

³Tê di dozeke de meyla kesê belengaz jî nekî.

⁴«Gava tu rastî ga yan kerê winda yê dijminê xwe werî, divê tu wî lê vegerînî.

⁵«Gava tu kerê kesê ji te nefretê dike di bin bar de ketî bibînî û nexwazî rakî nabe. Divê tu jê re bibî alîkar û rakî.

⁶«Di dozekê de heqê kesê hejar nede xwarin.

⁷Tê ji derewan dûr bî û nebî sedema mirina kesê bêsûc û rast. Çimkî ezê kesê xerab mafdar derneyinim.

⁸Tê bertîlê nestînî. Çimkî bertîl kesên dibînin kor dike û dozên kesên mafdar serobino dike.

⁹«Tê xerîban nexî tengasiyê. Hûn bi dilê xerîban dizanin. Çimkî hûn jî li welatê Misrê xerîb bûn.

¹⁰«Tê axê şeş salan biçînî û berê wê hilînî.

¹¹Lê tê di sala heftan de wê beyar bihêlî ku hejarên gelê te jê bixwin û ya ku ji ber wan dimîne heywanên çolê bixwin. Tê ji bo rez û zeytûnan jî wiha bikî.

¹²«Tê şeş rojan karê xwe bikî lê roja heftan bêhna xwe vedî. Bi vî awayî wê ga û kerên we bêhna xwe vedin û kurên koleya te û xerîb xwe rihet bikin.

¹³«Hûnê her tiştê ku ez ji we re dibêjim pêk bînin. Hûnê navê îlahan bi bîr neyinin û navê wan ji devê xwe dernexin.

¹⁴«Tê salê sê caran ji bo min bikî cejn.

¹⁵Tê Cejna Nanê Şikeva pîroz bikî. Çawa ku min li te emir kiriye, di rojên kifş ên meha Avîvê de heft rojan nanê şikeva bixwe. Çimkî tu di wê mehê de ji Misrê derketî. «Bila tu kes destvala neyê pêşberî min.

¹⁶«Tê bi berê pêşî yê ku li zeviyê çandin, Cejna Dirûnê pîroz bikî. Di dawiya salê de, gava tu berê xwe berhev dikî, tê Cejna Berhilanînê pîroz bikî.

¹⁷Wê hemû mêrên te, salê sê caran herin hizûra Reb Xudan.

¹⁸«Tê xwîna qurbana min bi nanê bihevîrtirş serjê nekî. Wê bezê heywên yê qurbankirina cejna min, nemîne serê sibê.

¹⁹«Tê berê pêşî yê bijare yê axa xwe, bînî Mala Xwedayê xwe Xudan. «Tê karikê, li ber şîrê diya wî nekelînî.

²⁰«Va ye, ez li pêşiya te milyaketekî dişînim ku di rê de te biparêze û te bibe axa ku min amade kiriye.

²¹Bila bala te li ser wî be û guhê xwe bide dengê wî. Tê li dijî wî dernekevî. Wê serhildana te nebexişîne, çimkî navê min li ser wî ye.

²²Lê heger tu bi rastî jî guh bidî dengê wî û her tiştê dibêje bikî, ezê ji dijminên te re bibim dijmin û ji neyarên te re bibim neyar.

²³«Çimkî wê milyaketê min li pêşiya te here û te bibe nav Amorî, Hîtîtî, Perîzzî, Kenanî, Hîwî û Yevûsiyan. Ezê jî wan tune bikim.

²⁴Tê li pêş îlahên wan neçî ser çokan. Tê xulamiya wan nekî û karên wan nekî. Lê divê tu îlahên wan hilweşînî û kêlên wan ên kevirîn perçe bikî.

²⁵Hûnê xulamiya Xwedayê xwe Xudan bikin. Ezê nan û ava te pîroz bike û nexweşiyan ji nav te rakim.

²⁶Wê li welatê te jina bêber û ya ku zarok ji ber diçe nemîne. Ezê jiyaneke dirêj bidim te.

²⁷Ezê tirs û sawa xwe li pêşiya te bişînin û her gelê ku tê li dijî wan herî, şaş bikim. Ezê bikim ku hemû dijminên te ji ber te birevin.

²⁸Ezê dehşetê[24] li pêşiya we bişînim ku Hîwî, Kenanî û Hîtîtiyan biqewirîne.

²⁹Lê ji bo ku welat xera nebe û heywanên çolê li ser serê te zêde nebin, ezê di nav salekê de wan ji ber te neqewirînim.

³⁰Heta tu zêde bibî û welat mîras bistînî, ezê hêdî hêdî ji ber te biqewirînim.

³¹«Ezê sînorên te ji Derya Sor heta Derya Filîstiyan[25], ji beriyê heta Firatê deynim. Ezê xelkê welêt bidim destên we ku tê ji pêş xwe biqewirînî.

³²Tê bi wan û bi îlahên wan re tu peymanekê çênekî.

³³Wê li welatê te rûnenin. An na wê bikin ku tu li dijî min gunehan bikî. Çimkî heger tu xulamiya îlahên wan bikî, wê ji bo te bibe dafik.»