Read Kurmanji Încîl Derketin 24 Bible Online

Derketin 24 - Kurmanji Încîl bible

Derketin 24

¹Xudan ji Mûsa re got: «Tu tevî Harûn, Nadav, Avîhû û heftê kesên ji rîspiyên Îsraîlî hilkişî ba min û hûnê ji dûr ve biperizin.

²Divê Mûsa bi tenê nêzîkî min bibe, yên din nêzîk nebin. Gel pê re neyê.»

³Mûsa hat û hemû gotin û rêbazên Xudan ji gel re gotin. Tevahiya gel bi dengekî bersiv da û got: «Hemû tiştên ku Xudan gotin, emê bikin.»

⁴Mûsa hemû gotinên Xudan nivîsî. Ew serê sibê zû rabû û wî li qûntara çiyê gorîgehek ava kir. Wî li gorî duwanzdeh eşîrên Îsraîl, duwanzdeh kêlên kevirîn çikandin.

⁵Piştre wî xortên gelê Îsraîl şandin ku qurbanên şewitandinê pêşkêşî Xudan bikin û wekî qurbanên aştiyê conegayan serjê bikin.

⁶Mûsa nîvê xwînê hilda û kir tasan. Nîvê din jî bi ser gorîgehê ve reşand.

⁷Piştre nivîsa peymanê hilda û ji gel re xwend. Paşê gel got: «Emê bi her gotina Xudan bikin û guhê xwe bidinê.»

⁸ Mûsa xwîna mayî hilda, bi ser gel de reşand û got: «Va ye, xwîna peymanê ku Xudan li gorî van hemû gotinan bi we re çêkir.»

⁹Piştre Mûsa, Harûn, Nadav, Avîhû û heftê rîspiyên Îsraîlî hilkişiyan çiyê.

¹⁰Wan Xwedayê Îsraîl dît. Di bin lingên wî de tiştekî wekî kelpîçên ji lapîsan hebû. Bi paqijiya xwe, ew wekî ezmanan bû.

¹¹Xwedê destê xwe li pêşengên gelê Îsraîl ranekir. Wan Xwedê dît lê dîsa jî rabûn xwarin û vexwarin.

¹²Xudan ji Mûsa re got: «Tu hilkişe çiyê, were ba min û li vir bimîne. Ezê lewheyên kevirîn ên ku min ji bo hînkirinê şerîet û emiran li ser nivîsandine bidim te.»

¹³Mûsa û Yêşûyê xizmetkarê wî rabûn û Mûsa hilkişiya Çiyayê Xwedê.

¹⁴Mûsa ji rîspiyan re got: «Heta ku em bi şûn de hatin, hûn li vir li benda me bin. Harûn û Hûr li ba we ne, meseleyek hebe herin ba wan.»

¹⁵Mûsa hilkişiya ser çiyê. Ewr çiya nixamt.

¹⁶Rûmeta Xudan li ser Çiyayê Sînayê bi cih bû. Ewr şeş rojan çiya nixamt. Roja heftan, Xudan ji nav ewr gazî Mûsa kir.

¹⁷Rewnaqiya rûmeta Xudan li serê çiyê di çavê gelê Îsraîl de wekî agirekî xuya dikir ku dixwe û tune dike.

¹⁸Mûsa ket nav ewr û hilkişiya çiyê. Ew çil şev û çil rojan li serê çiyê ma.