Read Kurmanji Încîl Derketin 27 Bible Online

Derketin 27 - Kurmanji Încîl bible

Derketin 27

¹«Tê gorîgehê ji dara aqasyayê çargoşe çêkî. Wê dirêjî û berfirehiya wê pênc gaz[37], bilindahiya wê sê gaz be.

²Tê li ser her çar kujên jorîn qiloçan çêkî. Wê qiloç pê ve yek perçe bin. Tê wê bi tûnc kiras bikî.

³Ji bo gorîgehê, sîtilên xwelî avêtinê, bêr, tasik, sêgoyên goşt û bixûrdankan çêkî. Tê hemû taximên wê ji tûnc çêkî.

⁴Tê ji bo wê seradekê tûncîn çêkî. Tê xeleka tûnc çêkî ku li her çar kujên wê be.

⁵Tê wê deynî jêr, bin keviya gorîgehê. Wê ber bi jêr ve bigihîje nîvê gorîgehê.

⁶Tê ji bo gorîgehê ji dara aqasyayê destiyan çêkî û bi tûnc kiras bikî.

⁷Wê destî li xelekan bên xistin ku gava gorîgeh bê hilgirtin, li herdu kêlekan bin.

⁸Tê gorîgehê ji textikan çêkî ku hûndirê wê vala be. Wê bi awayê ku li çiyê nîşanê te dan, bê çêkirin.

⁹«Tê hewşa meskên çêkî. Wê perdeyên hewşê yên li aliyê başûr, ji kitanê tenik honandî bin û dirêjahiya wan sed gaz[38] be.

¹⁰Wê bîst stûn û binikên wan ên perdeyan ji tûnc bin. Wê çengelên stûnan û bistên wan ji zîv bin.

¹¹Herwiha ji bo aliyê bakur, wê perdeyên dirêjahiya sed gaz hebin. Wê bîst stûn û bîst binikên wan ji tûnc, çengelên stûnan û bistên wan ji zîv bin.

¹²«Wê li aliyê rojavayê hewşê perde hebin ku dirêjahiya wê pêncî gaz[39] e. Wê deh stûn û deh binik jî hebin.

¹³Wê berfirehiya aliyê hewşê yê ku li rojhilat dinêre pêncî gaz be.

¹⁴Wê li aliyekî deriyê hewşê perdeyeke panzdeh gaz[40], sê stûn û sê binik hebin.

¹⁵Wê li aliyê din jî perdeyeke panzdeh gaz, sê stûn û sê binik hebin.

¹⁶«Ji bo deriyê hewşê, wê perdeyeke binexş ya dirêjahiya bîst gazî[41] û ji kitanê tenik honandî û tayên şînê tarî, binevşî û sor hatiye çêkirin hebe. Wê çar stûn û çar binikên wê hebin.

¹⁷Hemû stûnên li dora hewşê wê bi çemberên zîv bên pêçan. Wê çengelên wan ji zîv, binikên wan ji tûnc bin.

¹⁸Wê dirêjahiya hewşê sed gaz, berfirehiya wê ji her aliyî ve pêncî gaz û bilindahiya wê pênc gaz[42] be. Wê perde ji kitanê tenik honandî bin, binik ji tûnc bin.

¹⁹Wê hemû taximên ji bo hemû xizmetên meskên, tevî hemû singên meskên û hewşê wê ji tûnc bin.

²⁰«Tê li gelê Îsraîl emir bikî, bila rûnê xas ê zeytê ji te re bînin ku ronahiya qendîlê hergav pêxistî bimîne.

²¹Wê Harûn û kurên xwe ji êvarê heta serê sibê, li hizûra Xudan qendîlê pêxistî bihêlin ku li Konê Hevdîtinê[43], li derveyî perdeya li ber Şahidiyê. Wê ev ji bo gelê Îsraîl, di nav nifşên wan de qanûneke herheyî be.»