Read Kurmanji Încîl Derketin 28 Bible Online

Derketin 28 - Kurmanji Încîl bible

Derketin 28

¹«Ji bo ku ji min re kahintiyê bikin, tu ji nav gelê Îsraîl kekê xwe Harûn û kurên wî Nadav, Avîhû, Êlazar û Îtamar bîne ba xwe.

²Ji bo berzî û rûmetê, tê ji Harûnê kekê xwe re kincên pîroz çêkî.

³Tê ji wan hemû kesên ku min jêhatîbûn daye wan re bêjî ku ji Harûn re kincan çêkin ku wî bi kahintiya min pîroz bikin.

⁴Kincên ku wê çêkin ev in: Bersing, êfod, xiftan, mîntanê binexş, şaşik û şûtik. Ji bo ku ji min re kahintiyê bikin wê ji kekê te Harûn û kurên wî re van kincên pîroz çêkin.

⁵Wê ji bo vî karî, şeridên zêrkirî, tayên şînê tarî, binevşî û sor û kitanê tenik bi kar bînin.

⁶«Wê êfodê bi şeridên zêrkirî, tayên şînê tarî, binevşî û sor û kitanê tenik honandî bi hosteyî çêkin.

⁷Wê di du kujên wî de cihê du sermilan hebe ku bi hev ve bê danîn.

⁸Wê şerîda bi hosteyî ya li ser êfodê, ji heman hosteyî û tiştan bê çêkirin. Wê wekî perçeyekî êfodê, bi şeridên zêrkirî, tayên şînê tarî, binevşî û sor û kitanê tenik honandî bê çêkirin.

⁹Tê du kevirên onîks hilînî û li ser wan navên kurên Îsraîl,

¹⁰li gorî bûyîna wan, navên şeş heban li ser yekî, navên şeşên din jî li ser yê din binivîsî.

¹¹Tê wan herdu keviran, bi karê kevirkol, wekî mora kolayî navên kurên Îsraîl bikolî û wan deynî nav malikên zêrîn.

¹²Tê herdu keviran, ji bo kurên Îsraîl wekî kevirên bîranînê deynî ser sermilên êfodê. Wê Harûn navên wan, li hizûra Xudan li ser herdu sermilên xwe hilgire.

¹³Tê malikên zêr çêkî.

¹⁴Tê ji zêrê xas zincîrên badayî çêkî û deynî ser malikan.

¹⁵«Tê bi karê hosteyî bersingekî biryarê çêkî. Tê wê jî wekî êfodê bi şeridên zêrkirî, tayên şînê tarî, binevşî û sor û kitanê tenik honandî çêkî.

¹⁶Wê çargoşe û du qat be. Wê dirêjahiya wê bostek[44], berfirehiya wê jî bostek be.

¹⁷Tê li ser wê çar rêzên kevirîn deynî. Wê di rêza pêşî de aqût, topaz, zimrûd,

¹⁸di rêza diduyan de eqîqê binevşî, lapîs û eqîqê spî,

¹⁹di rêza sisiyan de eqîqê ezmanî, egad û ametîst

²⁰û di rêza çaran de fîrûze, onîks û yêşîm hebin. Wê kevir di malikên zêrîn de bên bicihkirin.

²¹Wê duwanzdeh kevir hebin ku li ser wan navên kurên Îsraîl hene. Wê li ser her kevirî, wekî mor yek bi yek navê duwanzdeh eşîran hebe.

²²«Tê ji bo bersing ji zêrê xas zincîrên badayî çêkî.

²³Tê ji bo wî du xelekên zêrîn çêkî û herdu xelekan deynî ser du kujên bersing.

²⁴Tê du zincîrên zêr bi xelekên kujên bersing ve bixî.

²⁵Tê herdu serên zincîrên din di ser du malikan re derbas bikî û li pêşiya êfodê bi ser sermilan ve girê bidî.

²⁶Tê du xelekên zêrîn ên din çêkî û li biniya herdu kujên bersing, li pêşiya êfodê, bi kujê hûndir ve bixî.

²⁷Tê du xelekên zêrîn ên din çêkî. Wan li aliyê pêşî yê êfodê, di binê herdu sermilan de, nêzîkî dera ku êfod digihîjê deynî ser şerîda ku bi hosteyî hatiye honandin.

²⁸Tê xelekên bersing û êfodê bi şehbenê şînê tarî bi hev ve girê bidî. Wê bersing, li ser şerîda êfodê ya ku bi hosteyî hatiye honandin bimîne û ji êfodê neqete.

²⁹«Gava Harûn dikeve Cihê Pîroz, wê navên kurên Îsraîl li ser dilê xwe hilgire ku li ser bersingê biryarê nivîsandiye. Bi vî awayî ez Xudan, ezê gelê xwe hergav bi bîr bînim.

³⁰Tê Ûrîm û Tûmmîmî bixî hûndirê bersingê biryarê û gava Harûn bê hizûra Xudan, wê li ser dilê wî bin. Wê Harûn li hizûra Xudan biryara kurên Îsraîl li ser singê xwe hilgire.

³¹«Tê xiftanê di bin êfodê de bi tevahî ji tayê şînê tarî çêkî.

³²Wê ji bo serî tê re derbas be, dora wê vekirî bê hiştin. Ji bo ku neqete, tê dora wê mîna berstûk veçinî û bidirûyî.

³³Tê li dawa xiftên ji tayên şînê tarî, binevşî û sor, motîvên hinarokan çêkî û zengilokên zêrîn li navbera wan li dora wî bi cih bikî.

³⁴Wê dora dawa xiftên, bi awayê hinarokek û zengilokê zêr, hinarokek û zengilokê zêr bê çeperkirin.

³⁵Gava Harûn xizmetê dike wê vî xiftanî li xwe bike. Gava dikeve Cihê Herî Pîroz, hizûra Xudan û dertê, ji bo ku ew nemire wê dengê zengilokan bê bihîstin.

³⁶«Tê ji zêrê xas berenîkekê çêkî û çawa ku morekî li ser wê dikolî, li serê ‹Ji Xudan re pîroz e› binivîsî.

³⁷Tê wê bi şehbenekî şînê tarî girê bidî. Wê li pêşiya şaşikê be.

³⁸Wê li ser eniya Harûn be. Gava Îsraîlî diyariyên xwe yên pîroz tînin, heger sûc kiribin, wê sûcên wan Harûn hilde ser xwe. Ji bo ew li hizûra Xudan bê qebûlkirin, wê ev berenîk hergav li ser eniya Harûn be.

³⁹«Tê ji kitanê tenik mîntan bihonî û ji kitanê tenik şaşikê çêkî. Şûtikeke binexş jî çêkî.

⁴⁰«Tê ji bo kurên Harûn mîntan, şûtik û kumên ku rûmet û berziyê didin çêkî.

⁴¹Tê van kincan li Harûnê kekê xwe û li kurên wî bikî, rûn û tayîn bikî. Ji bo ku ji min re kahintiyê bikin tê wan pîroz bikî.

⁴²«Ji bo ku ew derên xwe yên edebê binixêmin, tê ji wan re derpiyên kitanî çêkî. Wê ji piştê heta ser çokê bin.

⁴³Gava Harûn û kurên xwe dikevin Konê Hevdîtinê yan jî ji bo li Cihê Pîroz xizmetê bikin nêzîkî gorîgehê dibin, ji bo ku sûc nekin û nemirin, wê van derpiyan li xwe bikin. Wê ev ji bo Harûn û ziriyeta wî qanûneke herheyî be.»