Read Kurmanji Încîl Derketin 3 Bible Online

Derketin 3 - Kurmanji Încîl bible

Derketin 3

¹Mûsa şivantiya pezê xezûrê xwe Yîtroyê Kahinê Mîdyanî dikir. Wî kerî ajot pişt beriyê û gihîşt Horêva Çiyayê Xwedê.

²Milyaketê Xudan, bi pêta êgir ji nav deviyekê lê xuya bû. Mûsa bala xwe dayê ku agirek heye lê devî naşewite.

³Mûsa got: «Ka ez herim, li vê ecêbê binêrim çima agirek heye û devî naşewite?»

⁴Gava Xudan dît ew ji bo dîtinê hat, Xwedê ji nav deviyê gazî wî kir û got: «Mûsa, Mûsa!» Wî got: «Keremke ezbenî!»

⁵Xwedê got: «Zêde nêzîk nebe. Çaroxên xwe ji piyên xwe derxe, çimkî ew cihê ku tu pê lê dikî, erdê pîroz e.

⁶Ez Xwedayê bavê te, Xwedayê Îbrahîm, Xwedayê Îshaq û Xwedayê Aqûb im.» Mûsa rûyê xwe nixamt, çimkî ew ditirsiya ku li Xwedê binêre.

⁷Xudan got: «Min tengasiya gelê xwe ya li Misrê ji nêzîk ve dît û hewara wan a ji destê serkarên suxrê bihîst. Ez bi êşa wan dizanim.

⁸Loma ez hatim ku wan ji destê Misriyan rizgar bikim. Ez hatim ku wan ji wî welatî derînim û bişînim welatê Kenanî, Hîtîtî, Amorî, Perîzzî, Hîwî û Yevûsiyan, wî welatê xweş û fireh ê ku şîr û hingiv jê diherike.

⁹Hewara gelê Îsraîl gihîşt ba min û min tengasiya ku Misriyan da wan, dît.

¹⁰Niha were, ez te bişînim ba Firewn ku gelê xwe Îsraîliyan ji destê Misriyan derxim.»

¹¹Mûsa ji Xwedê re got: «Ez kî me ku herim ba Firewn û gelê Îsraîl ji Misrê derxim?»

¹²Xwedê got: «Ezê bi te re bim. Nîşana ku ez te dişînim wê ev be: Gava te gel ji Misrê derxist, hûnê li vî çiyayî xulamiya min bikin.»

¹³Mûsa ji Xwedê re got: «Gava ez herim ba gelê Îsraîl û ji wan re bêjim: ‹Xwedayê bav û kalên we ez şandim› û ew ji min re bêjin: ‹Navê wî çi ye?› ezê ji wan re çi bêjim?»

¹⁴Xwedê ji Mûsa re got: «Ez EZ IM. Tê ji gelê Îsraîl re bêjî, ‹EZ IM› ez şandim ba we.»

¹⁵Xwedê ji Mûsa re got: «Tê ji gelê Îsraîl re wiha bêjî: ‹Xwedayê bav û kalên we, Xwedayê Îbrahîm, Xwedayê Îshaq û Xwedayê Aqûb Yahwe[3] ez şandim ba we.› Navê min her û her ev e. Nifş bi nifş ezê wiha bêm bibîranîn.

¹⁶Niha here û hemû rîspiyên Îsraîlî bicivîne û ji wan re bêje: ‹Xwedayê bav û kalên we, Xwedayê Îbrahîm, Îshaq û Aqûb Yahwe li min xuya bû û wiha got: Ji nêzîk ve bala min li ser we ye û min ya ku li Misrê bi we kirin dît.

¹⁷Min soz da, ezê we ji tengasiya Misrê rizgar bikim û we derînim welatê Kenanî, Hîtîtî, Amorî, Perîzzî, Hîwî û Yevûsiyan ê ku şîr û hingiv jê diherike.›

¹⁸«Wê rîspiyên Îsraîlî guhdariya dengê te bikin û hûnê bi hev re herin ba Padîşahê Misrê û bêjin: ‹Xwedayê Îbraniyan Xudan rastî me hat. Niha destûr bide me, ji bo ku em ji Xwedayê xwe Xudan re qurban serjê bikin, em sê rojan di beriyê de rêve herin.›

¹⁹Lê ez dizanim, heta ku ji aliyê destekî hêzdar ve neyê zorkirin, wê Padîşahê Misrê destûr nede we ku hûn herin.

²⁰Ezê destê xwe dirêj bikim û bi kirina hemû karên nedîtî, li Misriyan bixim. Wî çaxî wê Firewn we berde.

²¹«Ezê bikim ku Misrî bi vî gelî re keremdar bin. Herwiha gava hûn herin, wê destên we vala nemîne.

²²Wê her jin ji cîrana xwe yan ji mêvana xwe tiştên zêr û zîv û cilûbergan bixwaze. Hûnê keç û kurên xwe bi wan bixemilînin. Bi vî awayî hûnê Misriyan talan bikin.»